གཟིགས་གནང་མི་ལུ་བཀའ་དྲིན་ཆེ།

༉ ང་བཅས་ཀྱིས་ ཉིན་བསྟར་བཞིན་དུ་

ཡོངས་འབྲེལ་འཆར་སྒོ་འདི་ནང་

གནས་ཚུལ་ཚུ་ དུས་མཐུན་བཟོ་སྟེ་ གསལ་བཀོད་འབདཝ་ཨིན།

We update at the earliest possible for you!

རྫོང་ཁའི་གནས་ཚུལ་གཟིགས་ དུས་མཐུན་ཞུགས་ཚུགས།

གནས་ཡུན་ཚངམ་དང་བསྟུན་ ཁས་བླངས་འབད་མི་ཚུ་ག་ར་ གྲུབ་ཚར་ཡོདཔ།

སོ་ནམ་བློན་པོ་ ཌོག་ཊར་ པདྨ་རྒྱ་མཚོ་གིས་ ཁོ་རའི་ 
འདེམས་ཁོངས་ནང་ ལྟ་སྐོར་འབད་བའི་བསྒང་།
༡༤/༠༡/༢༠༡༣། ༉ དམངས་གཙོའི་གཞུང་འགོ་དང་པའི་ནང་ བཙག་འཐུ་ལས་གྲུབ་མི་ འཐུས་མི་མང་ཤོས་ཀྱིས་ འོས་འབབ་མེད་པའི་ ཁས་བླངས་འབད་ནུག་ཟེར་བའི་ ལོ་རྒྱུས་འདྲ་མིན་སྣ་ཚོགས་ གོ་དོ་ཡོདཔ་ཨིན་རུང་ བུམ་ཐང་སྡེ་བཞི་ནང་འབད་བ་ཅིན་ ཁས་བླངས་འབད་མི་ཚུ་ མང་ཤོས་ར་ གྲུབ་ཚར་ཡོདཔ་ཨིན་པས།དེ་ཡང་ སྤྱི་ལོ་༢༠༡༢ ཀྱི་ ལོ་མཇུག་བསྡུ་ཁམས་ལུ་ བུམ་ཐང་གི་ སྤྱི་ཚོགས་ཀྱི་འཐུས་མི་༢ ཀྱིས་ ཁོང་རའི་ རྒེད་འོག་ཚུ་ནང་ གྲུབ་འབྲས་ལྟ་སྐོར་མཇུག་བསྡུ་ཡོདཔ་ད་ ཆུ་སྨད་དང་ ཨུ་ར་འདེམས་ཁོངས་ཀྱི་འདེམས་ངོ་ ཀརྨ་དབང་ཕྱུག་གིས་ སླབ་དོ་བཟུམ་འབད་བ་ཅིན་ གཡུས་སྒོ་ཚུ་ནང་ མི་མང་སྐྱེལ་འདྲེན་བཱསི་གི་ཞབས་ཏོག་ འགོ་བཙུགས་ནི་རྐྱངམ་གཅིག་ མཐར་འཁྱོལ་འབྱུང་མ་ཚུགས་པར་ཡོདཔ་ཨིན་རུང་ ཁོ་རའི་འདེམས་ཁོངས་ནང་ ཁས་བླངས་འབད་མི་ཚུ་ག་ར་ གྲུབ་ཚར་ཡི་ཟེར་ཨིན་པས།

འཐུས་མི་གིས་ བཤད་དོ་བཟུམ་འབད་བ་ཅིན་ ཁོ་གིས་ ཁས་བླངས་འབད་མིའི་ནང་ལས་ ཁག་ཆེ་ཤོས་ར་ འཁོར་ལམ་དང་ གློག་མེ་ དེ་ལས་ བརྒྱུད་འབྲེལ་གྱི་མཐུན་རྐྱེན་༣ བྱིན་ནི་གི་ ཁས་བླངས་འབད་མི་ཚུ་ག་ར་ མཁོ་སྤྲོད་འབད་ཚར་ཡི་ཟེར་ཨིན་པས།


དེ་ཡང་ གཞུ་རི་སྐེར་གཙོ་གཡུས་ཚན་ནང་ སོ་ནམ་ཞིང་ལམ་ ཀི་ལོ་མི་ཊར་༡༤ འབད་མི་ཅིག་ གསརཔ་བཏོན་ཡོདཔ་ད་ ཐར་པ་གླིང་དགོན་པ་ལུ་ ལྕགས་ཀྱི་རཝ་རྐྱབ་བྱིན་ཡོདཔ་མ་ཚད་ ཤིང་མཁར་ལྷ་ཁང་གི་ ལྕགས་ཤོག་ཡང་ སོར་ཡོདཔ་ཨིན་པས།


ཁོ་གིས་ ཁས་བླངས་འབད་མི་ནང་ མ་ཚུད་མི་ འདེམས་ཁོངས་གོང་འཕེལ་མ་དངུལ་གྱིས་ འབྲེལ་ཡོད་ཚོགས་པ་ཚུ་དང་གཅིག་ཁར་ གྲོས་བསྟུན་འབད་དེ་ གཡུས་སྒོ་ཚུ་ནང་ཡོད་མི་ ལྷ་ཁང་དང་ དགོན་སྡེ་ཚུ་ནང་ རྒྱབ་སྐྱོར་ཚུ་བྱིན་ཏེ་ ཡོད་ཟེར་ཨིནམ་ད་ ཆུ་སྨད་དོམ་མཁར་ལྷ་ཁང་ནང་ ལོ་བསྟར་གྱི་ བསྒྲུབས་འབད་བའི་སྐབས་ ཐབ་ཚང་མེད་པའི་དཀའ་ངལ་ཡོདཔ་ལས་ དེ་ནང་ཡང་ ཐབ་ཚང་ཅིག་བཟོ་སྐྲུན་འབད་དེ་ བྱིན་ཡོདཔ་ཨིན་པས།


འདེམས་ཁོངས་གོང་འཕེལ་མ་དངུལ་གྱི་ཐོག་ལས་ ཨུ་ར་གཡུས་ཚན་ནང་ ཕམ་ཉམ་ཆུང་ཚུ་གི་ ཨ་ལུ་བདུན་ལུ་ སློབ་གྲྭའི་སྒྲིག་གོ་ལས་ འགོ་བཙུགས་ཏེ་ རྒྱབ་སྐྱོར་འབད་ཡོདཔ་ཨིན་པས།


འདེམས་ངོ་གིས་ གཡུས་ཚན་ཁག་ཚུ་ནང་ མི་མང་སྐྱེལ་འདྲེན་གྱི་ ཞབས་ཏོག་བཙུགས་ནིའི་ ཁས་བླངས་འབད་དེ་ འགོ་བཙུགས་ཡོདཔ་ཨིན་རུང་ རྒེད་འོག་གི་ ས་གནས་མང་ཤོས་ར་ བཀྲ་ཤིས་སྒང་འགྱོ་སའི་ གཞུང་ལམ་ཁར་འབད་ནི་དེ་གིས་ མི་མང་ཤོས་ཀྱིས་ སྣུམ་འཁོར་ག་ཐོབ་སྦེ་ འཛུལ་འགྱོ་མི་ལུ་བརྟེན་ སྐྱེལ་འདྲེན་བཱསི་བཙུགས་མི་ལུ་ གྱོང་རྒུད་ཕོག་ནི་དེ་གིས་ ཟླཝ་དག་པ་ཅིག་བཙུགས་ཏེ་ ལོག་འགོ་བཙུགས་མ་ཚུགས་ཟེར་ཨིན་པས།


དེ་བཟུམ་སྦེ་ ཆོས་འཁོར་རྒེད་འོག་ནང་ཡང་ ཞབས་ཏོག་བཙུགས་ཡོད་རུང་ ལམ་དེ་ སོ་ནམ་ཞིང་ལམ་འབད་ནི་དེ་གིས་ སྒེར་སྡེ་གིས་བཙུགས་མི་ སྐྱེལ་འདྲེན་བཱསི་དེ་ འཕྲོ་མཐུན་འབད་མ་བཏུབ་ཟེར་ཨིན་པས།
ཁས་བླངས་ཚུ་གི་གྲས་ལས་༡ ཅུང་་འཕེལ་སློབ་གྲྭ་ཆུང་བ་དེ་ སློབ་རིམ་༨ པ་ཚུན་ རྒྱ་བསྐྱེད་འབད་ནི་གི་ ཁས་བླངས་འབད་ཡོད་རུང་ ད་ལྟོ་ ཨ་ལུ་༢༠ ལས་མེད་པའི་ཁར་ ཤེས་རིག་གི་ སྲིད་བྱུས་སོ་སོར་ཡོདཔ་ལས་ འགྱོ་མ་བཏུབ་ཟེར་ཨིནམ་ད་ ཨིན་རུང་ མ་འོངས་པ་ལུ་ རྒྱ་བསྐྱེད་འབད་ཚུགས་པའི་ རེ་བ་ཡོད་ཟེར་ཨིན་པས།


སྤྱི་ཚོགས་ཀྱི་ འཐུས་མི་ཚུའི་ གནས་ཡུན་ ཟླཝ་དག་པ་ཅིག་ལས་མེདཔ་བཞིན་དུ་ འཆར་གཞི་ནང་མེད་པའི་ལཱ་འབད་ནི་གི་ འཆར་གཞི་ཡང་ མེད་པའི་ཁར་ ལོག་དོ་འགྲན་འབད་ནིའི་དོན་ལུ་ གྲོས་ཐག་མ་བཅད་པར་ཡོད་ཟེར་ཨིན་པས།


འཐུས་མི་གཞན་ སོ་ནམ་དང་ནགས་ཚལ་བློན་པོ་ ཌོག་ཊར་ པདྨ་རྒྱ་མཚོ་གིས་ཡང་ ཁོ་རའི་ ཁས་བླངས་གསལ་བསྒྲགས་འབད་མི་ཚུ་ མང་ཤོས་ར་ གྲུབ་ཚར་ཡོདཔ་ཨིན་པའི་གནས་ཚུལ།

བུམ་ཐང་ལས་ བཀྲ་ཤིས་བསྟན་འཛིན།



No comments:

Post a Comment