ད་ལྟོ་ཡོད་མི་ འབྲུག་ཕུན་སུམ་ཚོགས་པ་དང་ མི་སེར་དམངས་གཙོ་ཚོགས་པ་དང་གཅིག་ཁར་ བཙག་འཐུ་ལྷན་ཚོགས་ཀྱི་ ཐོ་བཀོད་ཆ་འཇོག་འབད་མི་ལུ་བརྟེན་ བྷུ་ཊཱན་ཀུན་མཉམ་པར་ཊི་དང་ འབྲུག་སྤྱིར་དབང་ཚོགས་པ་༢ ཡང་ ཐོ་བཀོད་ཅན་གྱི་ སྲིད་ཚོགས་ཀྱིས་ ངོས་འཛིན་འབད་ཡོདཔ་ཨིན་པས།
ཨིན་རུང་ ཐོ་བཀོད་གྲུབ་མི་ སྲིད་ཚོགས་གསརཔ་༢ ཀྱིས་ དུས་ཅི་ སྤྱི་ཚོགས་བཙག་འཐུའི་ནང་ བཅའ་མར་གཏོགས་ཆོག་པའི་དོན་ལུ་ གནད་དོན་དག་པ་ཅིག་ ཁ་གསལ་བཟོ་དགོཔ་ཡོདཔ་ཨིན་པས།
དེ་ཡང་ སྲིད་ཚོགས་ཀྱི་ རྩ་ཁྲིམས་དང་ མ་དངུལ་གྱི་རྩིས་ཁྲ་ དེ་ལས་ ཚོགས་པའི་རྒྱལ་ཡོངས་བཀོད་ཁྱབ་ཚོགས་ཆུང་གི་ འཐུས་མི་ཚུ་གི་ མིང་ཐོ་ཚུ་ ལྷན་ཚོགས་ལུ་ ཕུལ་དགོཔ་ཨིན་པས།
དེ་བཟུམ་སྦེ་ སྲིད་ཚོགས་གསརཔ་ བྷུ་ཊཱན་ཀུན་མཉམ་པར་ཊི་གིས་ ཚོགས་པའི་འདེམས་ཁོངས་ཀྱི་ འདེམས་ངོ་༤༧ གྱི་ མིང་ཐོ་ཚུ་ ལྷན་ཚོགས་ལུ་ གསལ་བཀོད་འབད་དགོཔ་ཨིན་པས།
འབྲུག་སྤྱིར་དབང་ཚོགས་པ་གིས་ ཚོགས་པའི་ལས་རྟགས་དེ་ བདེ་སྲུང་གི་ ལས་རྟགས་དང་ཆ་འདྲཝ་སྦེ་ མཐོང་མི་དེ་ བསྒྱུར་བཅོས་འབད་དགོཔ་ཨིན་པའི་ཁར་ ཐོ་བཀོད་ཅན་གྱི་ ཚོགས་རྒྱན་བཙུགས་མི་ ཞི་གཡོག་དང་ དམག་སྡེ་ལ་སོགས་པའི་ མི་ངོ་བཙག་འཐུའི་ཁྲིམས་ལུགས་ནང་ བཀག་ཆ་འབད་ཡོད་མི་ཚུ་ ཐོ་བཀོད་འབད་མ་ཆོགཔ་ལས་ ཚོགས་པའི་རྩ་ཁྲིམས་ནང་ འབྲུག་མི་ག་འབད་རུང་ ཚོགས་པའི་འཐུས་མི་སྦེ་ ཐོ་བཀོད་འབད་ཆོག་ཟེར་མི་དེ་ དག་བཅོས་འབད་དགོཔ་ཨིན་པས།
ཐོ་བཀོད་གྲུབ་མི་དེ་ ཚོགས་པའི་བརྩོན་ཤུགས་ཀྱི་ གྲུབ་འབྲས་ཅིག་ཨིན་པའི་ ངོས་འཛིན་ཐོག་ བྷུ་ཊཱན་ཀུན་མཉམ་པར་ཊི་གི་ གནས་སྐབས་གཙོ་འཛིན་ བསོད་ནམས་སྟོབས་རྒྱས་ཀྱིས་ སླབ་མིའི་ནང་ ཚོགས་པ་གིས་ ཐོ་བཀོད་གྲུབ་མི་ལུ་ སྤྲོ་བ་བྱུང་ཡོད་རུང་ ཐོ་བཀོད་དང་གཅིག་ཁར་ འགན་འཁྲི་སྦོམ་སྦེ་ར་འོངམ་ཨིནམ་ལས་ ཚ་གྱང་ཡང་ ཐེབས་ར་ཕོག་སྟེ་ཡོད་ཟེར་ཨིན་པས།
ཨིན་རུང་ རྩ་བ་གསུམ་ལུ་ ཕྱག་ཞུ་ནི་གི་དོན་ལུ་ རང་དོན་བློས་བཏང་ཐོག་ལས་ བརྩོན་ཤུགས་བསྐྱེད་དེ་ ཐོ་བཀོད་གྲུབ་མི་དང་བསྟུན་ གཞུང་དང་ མི་སེར་གྱི་མཐའ་དོན་ལུ་དམིགས་པའི་ དམིགས་དོན་ཚུ་ འགྲུབ་ཚུགསཔ་འབད་ནི་གི་ ཁས་བླངས་ཡོད་ཟེར་ཨིན་པས།
འབྲུག་སྤྱིར་དབང་ཚོགས་པའི་གཙོ་འཛིན་ ལི་ལི་དབང་ཕྱུག་གིས་ སླབ་མིའི་ནང་ ཐོ་བཀོད་གྲུབ་མི་དེ་གིས་ ཚོགས་པའི་འཐུས་མི་ག་ར་གི་སེམས་ཁར་ སྤྲོ་བ་དང་ དགའ་སྤྲོ་བྱུང་ཡི་ཟེར་ཨིན་པས།
དེ་འབདཝ་ད་ བཙག་འཐུའི་དོན་ལུ་ ཟླཝ་༣ དེ་ཅིག་ལས་ མེད་ནི་དེ་གིས་ ཚོགས་པ་གིས་ བརྩོན་ཤུགས་ཐེབས་བསྐྱེད་དེ་ ལཱ་འབད་དགོཔ་ཡོད་ཟེར་བཤད་ཅི།
དེ་དང་གཅིག་ཁར་ ད་རུང་ དང་འདོད་ཅན་གྱི་ སྲིད་ཚོགས་ཅིག་ཨིན་མི་ འབྲུག་མཉམ་རུབ་ཚོགས་པ་གིས་ཡང་ འདས་པའི་སྤྱི་ཟླ་༡༢ པའི་ཚེས་༡༠ ལུ་ བཙག་འཐུ་ལྷན་ཚོགས་ལུ་ ཐོ་བཀོད་ཀྱི་ ཞུ་ཡིག་བཙུགས་ཏེ་ ད་ལྟོ་ ལྷན་ཚོགས་ཀྱིས་ སྲིད་ཚོགས་དེ་གི་ ཡིག་རིགས་ཚུ་ བསྐྱར་ཞིབ་འབད་བའི་བསྒང་ ཡོདཔ་ཨིན་པའི་གནས་ཚུལ།
བསམ་གཏན་ཡེ་ཤེས།
No comments:
Post a Comment