ན་གཞོན་སློབ་ཕྲུག་ཚུ་གིས་ སྦྱོང་བརྡར་འབད་བའི་བསྒང་། |
འབྲུག་བཱསི་ཀེཌ་བཱོལ་ཚོགས་པ་གིས་ གནམ་དགུན་ལུ་ སྦྱོང་བརྡར་ལས་རིམ་འགོ་འདྲེན་འཐབ་སྟེ་ ལོ་༣ ལང་ཡོདཔ་བཞིན་དུ་ ལོ་རེའི་ནང་ བཅའ་མར་གཏོགས་མི་ ཡར་ཕར་འགྱོ་དོ་ཡོདཔ་ལས་ འགོ་འདྲེན་འཐབ་དགོ་པའི་ དམིགས་ཡུལ་འགྲུབ་ཚུགས་ནི་ལུ་ འོས་འབབ་སྦོམ་འདུག་ཟེར་ འགོ་དཔོན་ཚུ་ སེམས་དགའ་ཡོདཔ་ཨིན་པས།
འབྲུག་བཱསི་ཀེཌ་བཱོལ་ཚོགས་པའི་འགོ་དཔོན་ རྒྱ་མཚོ་གིས་སླབ་མི་དང་འཁྲིལཝ་ད་ རྒྱལ་ཡོངས་བཱསི་ཀེཌ་བཱོལ་ རྩེད་འགྲན་འབད་མི་ཚུ་གིས་ ཨེ་ཤེ་ཡཱན་དང་ ལུང་ཕྱོགས་རྒྱལ་ཁབ་ཚུ་ནང་ མཐུན་འབྲེལ་གྱི་རྩེད་འགྲན་དང་ འགྲན་བསྡུར་འབད་བའི་སྐབས་ འབྲུག་མི་ཚུ་གི་རེ་བ་ལས་འབད་བ་ཅིན་ རྒྱལ་ཁ་འཐོབ་སྟེ་ རྒྱལ་རྟགས་ཚུ་ ལེན་དགོཔ་སྦེ་ཨིན་རུང་ རྒྱལ་ཁ་འཐོབ་མ་ཚུགས་པའི་སྐབས་ སེམས་ཕམ་ནི་དང་ སྐྱོན་བརྗོན་འབདཝ་མས་ཟེར་ཨིན་པས།
ཁོ་གིས་ འབད་བ་ཅིན་ འབྲུག་པའི་ན་གཞོན་ཚུ་གིས་ རྒྱལ་རྟགས་ཀྱི་གསོལ་རས་འཐོབ་ནི་བ་ འགྲན་བསྡུར་ཚུ་ནང་ བཅའ་མར་གཏོགས་ནི་དེ་ ཁག་ཆེ་ཟེར་ཨིནམ་ད་ རྩེད་འགྲན་ཚུ་ནང་ བཅའ་མར་གཏོགས་པའི་སྐབས་ ཤེས་ཡོན་ཡར་འཕེལ་གཏང་ཚུགས་པའི་ཁར་ རྒྱལ་ཁབ་ཚུ་དང་མཐུན་འབྲེལ་དང་ རིག་རྩལ་ ཤེས་ཡོན་ དེ་ལས་ ལྕོགས་གྲུབ་ཚུ་ ཡར་རྒྱས་འགྱོ་ཚུགས་པའི་ ཕན་ཐོགས་ཡོད་ཟེར་ཨིན་པས།
ལོ་བསྟར་བཞིན་དུ་ འགོ་འདྲེན་འཐབ་ནི་ཨིན་མི་ སྦྱོང་བརྡར་ལས་རིམ་གྱི་ དམིགས་ཡུལ་དེ་ མ་འོངས་ན་གཞོན་ཚུ་གིས་ བཱསི་ཀེཌ་བཱོལ་རྩེད་འགྲན་གྱི་ ཤེས་ཡོན་འཐོབ་ཚུགསཔ་བཟོ་ནི་དང་ རིག་རྩལ་ཡར་དྲགས་གཏང་ནི་ དེ་ལས་ ན་གཞོན་ཚུ་གི་བར་ན་ སྤྲོ་བ་འབྱུང་ནི་དོན་ལུ་ ཨིན་ཟེར་ཨིན་པས།
སྦྱོང་བརྡར་ལས་རིམ་དེ་ཡང་ སྤྱི་ཟླ་༡ པའི་ཚེས་༧ ལས་༣༠ ཚུན་ འགོ་འདྲེན་འཐབ་ནི་ཨིནམ་ད་ ལས་རིམ་དེ་ ཕྱི་རྒྱལ་ཨ་མི་རི་ཀ་ལས་ མཁས་མཆོག་སྡེ་ཚན་ཅིག་གིས་ སློབ་སྟོན་འབད་དོ་ཡོདཔ་མ་ཚད་ སྦྱོང་བརྡར་གྱི་མཐུན་རྐྱེན་ཚུ་ འབག་འོང་ཡོདཔ་ཨིན་པས།
ལས་རིམ་དེ་ ཐིམ་ཕུ་རྫོང་ཁག་ནང་རྐྱངམ་གཅིག་ འགོ་འདྲེན་འཐབ་མེན་པར་ སྤ་རོ་རྫོང་ཁག་ནང་ཡང་ འགོ་འདྲེན་འཐབ་ཡོདཔ་ལས་ བཅའ་མར་གཏོགས་མི་༥༠ ལྷགཔ་ཅིག་འོང་ཡོདཔ་ཨིན་པས།
བཱསི་ཀེཌ་བཱོལ་རྩེད་འགྲན་འབད་ནི་ལུ་ སྤྲོ་བ་དང་དང་འདོད་ཡོད་མི་ གཞན་རྫོང་ཁག་ནང་ལས་ཡོད་པ་ཅིན་ སྦྱོང་བརྡར་ལས་རིམ་དེ་ རྫོང་ཁག་ཚུ་ནང་ འགོ་འདྲེན་འཐབ་ནིའི་དམིགས་ཡུལ་ཡོདཔ་ ཨིན་པའི་གནས་ཚུལ།
བཀྲིས་ཕུན་ཚོགས།
No comments:
Post a Comment