ཕོ་སྐྱེས་༢ པོ་དེ་ སྤྱི་ཟླ་༡ པའི་ཚེས་༩ ལུ་ ས་མཚམས་ཀྱི་གཡུས་ཚན་ ས་རཱལ་པ་རི་དང་ ཨུལ་ཏ་པ་ནི་ལས་ འཛིན་བཟུང་འབད་ཡོདཔ་ཨིན་པས།
གསར་སྤར་ཁྲོམ་ཁ་ལས་ ས་རཱལ་པ་རི་དེ་ ཀི་ལོ་མི་ཊར་༣ གྱི་ས་ཁར་ཨིནམ་ད་ དེ་བཟུམ་སྦེ་ ཨུལ་ཏ་པ་ནི་དེ་ ཀི་ལོ་མི་ཊར་༡༠ གྱི་ས་ཁར་ཨིན་པས།
བོ་དོ་ས་ཁོངས་ཚོགས་སྡེའི་ སྤྱི་ཁྱབ་འགོ་དཔོན་འོག་མ་ ཀམ་པ་ བོལ་ཡ་རི་གིས་ བཤད་དོ་བཟུམ་འབད་བ་ཅིན་ ཁྲིམས་སྲུང་འགག་པ་ཚུ་གིས་ ཕོ་སྐྱེས་༢ པོ་དེ་ དྲི་བཀོད་འབད་དོ་ཡོདཔ་ལས་ ཁོང་༢ འཛིན་བཟུང་འབད་མི་ལུ་བརྟེན་ བཙན་ཁྲིད་འབད་མི་ གཙོ་ཅན་ཚུ་ བདའ་ཟུན་ཟེར་ཨིན་པས།
སྐྱེས་ལོ་༣༧ ལང་མི་ གླ་འཁོར་གྱི་དེད་གཡོགཔ་དེ་དང་ སྐྱེས་ལོ་༥༡ ལང་མི་ གཡུས་སྒོའི་རྩིསཔ་དེ་ བཙན་ཁྲིད་འབད་བའི་གནད་དོན་ནང་ འབྲེལ་གཏོགས་ཡོད་མི་ ཕོ་སྐྱེས་༡ འདས་པའི་བདུན་ཕྲག་ནང་ འཛིན་བཟུང་འབད་ཡོདཔ་ཨིན་པས།
ཕོ་སྐྱེས་དེ་གིས་ གླ་འཁོར་དེད་གཡོགཔ་དང་ རྩིསཔ་༢ བཙན་ཁྲིད་འབད་བའི་སྐབས་ འབྲེལ་གཏོགས་ཡོད་མི་ ཕོ་སྐྱེས་༥ ཡོད་པའི་གྲས་༡ ཨིནམ་ད་ གཞན་མི་༤ པོ་དེ་ ཁྲིམས་སྲུང་འགག་པ་ཚུ་གིས་ འཚོལ་བའི་བསྒང་ཡོདཔ་ཨིན་པས།
ཕོ་སྐྱེས་དེ་ རྒྱ་གར་གྱི་ དམག་མི་གིས་ འཛིན་བཟུང་འབད་ཡོདཔ་བཞིན་དུ་ ད་ལྟོ་ཡང་ དོ་དམ་འོག་ལུ་ར་ ཡོདཔ་ཨིན་པས།
སྤྱི་ཁྱབ་འགོ་དཔོན་འོག་མ་ ཀམ་པ་གིས་ བཤད་དོ་བཟུམ་འབད་བ་ཅིན་ རྒྱ་གར་གྱི་ དམག་མི་དང་ ཁྲིམས་སྲུང་འགག་པ་ཚུ་གིས་ བྱང་སྟོར་ཤོར་ཡོད་མི་ བུཚ་དེ་དང་ བཙན་ཁྲིད་འབད་མི་ ཕོ་སྐྱེས་ཚུ་ འཚོལ་བའི་བསྒང་ཡོད་ཟེར་ཨིན་པས།
ཁོ་གིས་འབད་བ་ཅིན་ འཛིན་བཟུང་འབད་དེ་ཡོད་མི་ ཕོ་སྐྱེས་༣ གྱི་སྐོར་ལས་ ག་དེ་སྦེ་འབད་ནི་ཨིན་ནའི་སྐོར་ལས་ ད་ལྟོ་ ལྟ་བའི་བསྒང་ཡོད་ཟེར་ཨིན་པས།
མ་གཞི་ ཁོང་༣ གྱིས་ འབྲུག་མི་ བཙན་ཁྲིད་འབད་བ་གིས་མ་ཚད་ འབྲུག་གི་ ཞི་བདེ་དང་སྲུང་སྐྱོབ་ལུ་ ཐོ་རྐྱབ་པའི་ཁར་ རྒྱལ་ཁབ་༢ ཀྱི་མཐུན་ལམ་ནང་ གནོད་པ་བཀལ་ཡོདཔ་ལས་བརྟེན་ འབྲུག་པའི་ ཁྲིམས་ལུགས་དང་འཁྲིལ་ཏེ་རང་ འབད་དགོཔ་ཅིག་འདུག་ཟེར་ཨིན་པས།
ཨིན་རུང་ ཁྲིམས་སྲུང་འགག་པ་དང་ ནང་སྲིད་ལྷན་ཁག་གིས་ ཉེས་ཅན་ཚུ་ རྩིས་སྤྲོད་ལེན་འབད་ནིའི་དོན་ལུ་ བྱ་རིམ་ཚུ་ བཟོ་དོ་ཡོདཔ་ཨིན་པས།
ཁྲིམས་སྲུང་འགག་པ་དང་ ནང་སྲིད་ལྷན་ཁག་གི་ གནས་ཚུལ་བཤད་མི་ཅིག་གིས་ སླབ་མི་དང་འཁྲིལཝ་ད་ ཁྲིམས་སྲུང་འགག་པ་གིས་ ནང་སྲིད་ལྷན་ཁག་ནང་ ཞུ་ཡིག་བཙུགས་ཡོདཔ་ད་ ནང་སྲིད་ལྷན་ཁག་གིས་ ཕྱི་འབྲེལ་ལྷན་ཁག་ནང་ བཏང་ནུག་ཟེར་ཨིན་པས།
ཕྱི་འབྲེལ་ལྷན་ཁག་གིས་ མངོན་མཐོ་ཁྲིམས་བདུན་གྱིས་སྦེ་ ཨ་སམ་ཁྲིམས་འདུན་ལུ་ ཉེས་ཅན་ཚུ་ རྩིས་ལེན་ཆོག་པའི་ ཞུ་བ་འབད་ནི་མས་ཟེར་ སླབ་ཨིན་པའི་གནས་ཚུལ།
ཡེ་ཤེས་སྒྲོལ་མ།
No comments:
Post a Comment