བ་འཇོ་ཁྲོམ་ བྱ་ཆི་ཆི་སྦེ་ མཐོངམ་ཨིན་རུང་ ནང་ན་ཚུལ་ལྡན་མེདཔ།

བ་འཇོ་ཁྲོམ་སྦུག་ལུ་ བཟོ་སྐྲུན་གྱི་ཅ་ཆས་ལྷག་ལུས་ རག་རོག་དང་
གསང་སྤྱོད་ཚུ་གི་མཐོང་སྣང་།

དབང་འདུས་ལས་ བསྟན་འཛིན་རྣམ་རྒྱལ།

༉ དབང་འདུས་ཕོ་བྲང་ བ་འཇོ་ཁྲོམ་དེ་ ཕྱི་ཁ་ལས་བལྟཝ་ད་ བྱ་ཆི་ཆི་སྦེ་ མཐོངམ་ཨིན་རུང་ ཁྲོམ་ནང་ན་ འགྱོ་བལྟ་བ་ཅིན་ རྣམ་རྟོག་ལང་སི་སིའི་ མཐོང་སྣང་བྱུང་མི་དེ་ཡང་ བཟོ་སྐྲུན་གྱི་ ཅ་ཆས་རག་རོ་ཚུ་ ག་ལྷོད་སར་ བཀོག་བཞག་པའི་ཁར་ གཡུར་བ་ཚུ་ མ་སེལ་བར་ བཞག་མི་ལུ་བརྟེན་ ཁྲོམ་ལམ་བདའ་སྟེ་ ཆུ་འཁྱིལ་ཡོདཔ་མ་ཚད་ ས་གོ་ལ་ལུ་ཅིག་ནང་ བཙོག་གཡུར་མེདཔ་ཐལ་མི་ལས་ དྲིམ་སྡུག་ཁིག་ཁི་སྦེ་ མནམ་ཨིན་པས།

ཁྱིམ་གྱི་ཇོ་བདག་ཚུ་གིས་ སླབ་མིའི་ནང་ འདི་བཟུམ་མའི་ གནས་སྟངས་ཁམས་ལོག་སི་སི་ཡོད་མི་ལུ་བརྟེན་ གཟུགས་ཁམས་འཕྲོད་བསྟེན་ལུ་ གནོད་ཉེན་ཡོདཔ་ལས་ ཁྲོམ་སྡེ་ལུ་ དཀའ་ངལ་སེལ་ཐབས་འབད་དགོ་པའི་སྐོར་ ཚར་ལེ་ཤ་ཅིག་ར་ སྙན་ཞུ་འབད་ཡོད་རུང་ ངོས་ལེན་འབད་ནི་མིན་འདུག་ཟེར་ཨིན་པས། 

ཚོང་པ་རིན་ཆེན་གྱིས་འབད་བ་ཅིན་ བཙོག་གཡུར་བསུབས་མི་ལུ་བརྟེན་ ཆབ་གསང་གི་བཙོག་ཆུ་ ཁོ་གི་ ཁྱིམ་གདོང་ཁར་ འཁྱིལ་སྡོདཔ་ལས་ ཨ་རྟག་ར་ སེལ་དགོཔ་འཐོནམ་མ་ཚད་ ཕྱིའི་མགྱོནམ་དང་ ལྟ་བཤལ་པ་ཚུ་འོངམ་ད་ ངོ་ཚ་སྟེ་ ཕྱི་ཁ་རང་ འཐོན་ནི་མེད་ཟེར་ཨིན་པས།

ཁྲོམ་སྡེའི་བཀོད་ཁྱབ་བཟོ་རིག་འགོ་དཔོན་འོག་མ་ བློ་བཟང་གིས་ སླབ་མིའི་ནང་ ཁྲོམ་གྱི་ལམ་དང་ གཡུར་བ་ཚུ་ བ་འཇོ་ཁྲོམ་མ་ཆགས་པའི་ཧེ་མ་ལས་ གཞུང་གིས་ བསལ་ཡོད་རུང་ ཤུལ་ལས་ མི་ཚུ་གིས་ ག་ཐོབ་རྐྱབ་སྟེ་ སྒྲིང་ཁྱིམ་རྐྱབ་པའི་སྐབས་ མཐུན་རྐྱེན་དེ་ཚུ་ མེདཔ་བཏང་ནུག་ཟེར་ཨིནམ་ད་ དེ་ཡང་ བཟོ་སྐྲུན་གྱི་ཅ་ཆས་ རྡོ་དང་ཤིང་ དེ་ལས་ ལྕགས་ཚུ་ འཁོར་ལམ་དང་ གཡུར་བ་ཚུ་གི་ཐོག་ཁར་ བཞག་པའི་སྐབས་ མེདཔ་ཡར་སོ་ནུག་ཟེར་ཨིན་པས།

ཨིན་རུང་ གཞུང་གིས་ གཡུར་བ་དེ་ དངུལ་ཀྲམ་ས་ཡ་༣.༥ གི་ཐོག་ལས་ ཉམས་བཅོས་འབད་ནི་དང་ ཁྲོམ་ལམ་དེ་ཡང་ ཉམས་བཅོས་འབད་ནི་ཟེར་ བློ་བཟང་གིས་ བཤདཔ་ཨིན་པས།

ཚོང་པ་ཚུ་ དབང་འདུས་ཁྲོམ་རྙིངམ་ལས་ བ་འཇོ་ཁྲོམ་ནང་ ན་ཧིང་ སྤྱི་ཟླ་༨ པའི་ནང་ སྤོ་བཤུད་འབད་ཡོདཔ་ཨིན་རུང་ ཁྲོམ་གྱི་སྦུག་ལུ་ བཟོ་སྐྲུན་གྱི་ ཅ་ཆས་ལྷག་ལུས་ཚུ་ ག་ལྷོད་སར་ སྤུངས་བཞག་ཡོདཔ་མ་ཚད་ ལས་མི་སྡོད་སའི་ གནས་སྐབས་ཀྱི་སྒར་དང་ གསང་སྤྱོད་ཚུ་ཡང་ ག་ལྷོད་སར་ བཟོ་ཡོདཔ་ལས་ ཁྲོམ་སྡེ་ལས་འཛིན་གྱི་ཧོངས་ལས་ འབྲེལ་ཡོད་ཇོ་བདག་ཚུ་ལུ་ ཅ་ཆས་ཚུ་ བསྡུ་དགོ་པའི་སྐོར་ ཡང་བསྐྱར་དུ་ དྲན་གསོ་འབད་ཡོད་རུང་ མང་ཤོས་ཅིག་གིས་ར་ ངོས་ལེན་འབད་མ་བཏུབ་པས་ཟེར་ འགོ་དཔོན་ཚུ་གིས་ བཤདཔ་ཨིན་པས།

འགོ་དཔོན་ཚུ་གིས་འབད་བ་ཅིན་ ཇོ་བདག་ཚུ་གིས་ སྤྱི་ཟླ་༣ པའི་ཚེས་༢༢ ཀྱི་ ནང་འཁོད་ལུ་ ཅ་ཆས་རག་རོ་ཚུ་ བསྡུ་མ་གཏང་པ་ཅིན་ ཁྲོམ་སྡེ་གིས་ བསྡུ་བསྒྱོམ་ཐོག་ བཀོ་གཏང་ནི་དང་ སྦ་སྒོར་ཚུ་ཡང་ བཤིག་གཏང་ནི་ཟེར་ཨིན་པས།

ཁྲོམ་སྦུག་ལུ་ཡོད་མི་ ས་གོ་དེ་ གཞུང་ས་ཨིནམ་ལས་ བཟོ་སྐྲུན་གྱི་ ཅ་ཆས་དང་ རག་རོ་ཚུ་ བསྡུ་ཐོག་ལས་ ས་གོ་དེ་ནང་ རྩེད་ཐང་དང་ ཨ་ལུ་རྩེདམོ་རྩེ་སའི་ས་ཁོངས་བཟོ་ནི་ དེ་ལས་ ཁྲོམ་དཔོན་གྱི་ ཡིག་ཚང་ཚུ་ བཟོ་སྐྲུན་འབད་ནི་ཨིན་པའི་གནས་ཚུལ།