བསྟན་རྒྱས་ལྷན་ཁག་འོག་གི་
བསྟན་རྒྱས་ལས་ཁུངས་ཀྱི་མདོ་ཆེན་
བསོད་ནམས་དབང་ཕྱུག་གིས་
སླབ་དོ་བཟུམ་འབད་བ་ཅིན་
འབྲུག་ལུ་ རྒྱ་གར་གྱི་ས་སྣུམ་
བཱ་རཊ་དང་ ཨིན་ཌི་ཡཱན་ཨོ་ཡེལ་ལས་སྡེ་གཉིས་ལས་
ནང་འདྲེན་འབད་མི་ལས་ ད་ལྟོ་
བཱ་རཊ་ས་སྣུམ་གྱིས་
གོང་ཚད་མར་ཕབ་སོང་བའི་སྐོར་
སྙན་ཞུ་ལྷོད་ཡོདཔ་ལས་
ལས་སྡེ་གིས་ འབྲུག་གི་ནུབ་ཕྱོགས་རྫོང་ཁག་ཚུ་ནང་
བཀྲམ་སྤེལ་འབད་ནི་དེ་གིས་
ད་རེས་ གོང་ཚད་དེ་
མར་ཕབ་འབད་དོ་ཡོདཔ་ཨིན་པས།
དེ་ཡང་
ནུབ་ཕྱོགས་རྫོང་ཁག་ཚུ་ནང་
ཁ་ཉིནམ་ཕྱི་རུ་ལས་
ས་སྣུམ་པེ་ཊོལ་གྱི་གོང་ཚད་
དངུལ་ཀྲམ་༦༧.༣༣
གནས་མི་ལས་ དངུལ་ཀྲམ་༦༥.༢༡
ལུ་ མར་ཕབ་རྐྱབ་ཡོདཔ་ཨིན་རུང་
ཤར་ཕྱོགས་དང་ དབུས་ཕྱོགས་རྫོང་ཁག་ཚུ་ནང་
ཨིན་ཌི་ཡཱན་ཨོལ་ཡེལ་ལས་སྡེ་གིས་
བཀྲམ་སྤེལ་འབད་ནི་དེ་གིས་
གོང་ཚད་མར་ཕབ་སྐོར་ལས་
ལས་སྡེ་གིས་ བསྟན་རྒྱས་ལས་ཁུངས་ནང་
སྙན་ཞུ་མ་ལྷོད་མི་ལུ་བརྟེན་
གོང་ཚད་དེ་ ཧེ་མ་བཟུམ་སྦེ་ར་
གནས་ནི་ཨིན་རུང་ འཕྲལ་མགྱོགས་ར་
གོང་ཚད་ཀྱི་ སྙན་ཞུ་ཐོབ་ཚུགས་པའི་
རེ་བ་ཡོད་ཟེར་ མདོ་ཆེན་གྱིས་བཤད་ཅི།
བསྟན་རྒྱས་ལྷན་ཁག་གིས་
ཌི་ཟིལ་གྱི་གོང་ཚད་ཡང་
མར་ཕབ་འགྱོ་ཡོདཔ་སྦེ་
བཤདཔ་ཨིན་རུང་ ཐིམ་ཕུ་ལུ་ཡོད་མི་
ས་སྣུམ་བཀྲམ་སྤེལ་ཁང་ཚུ་གིས་འབད་བ་ཅིན་
གོང་ཚད་ལུ་ བསྒྱུར་བ་མེད་ཟེར་ཨིན་པས།
རྒྱ་གར་གྱི་རྒྱང་མཐོང་
ཨེན་ཌི་ཊི་བི་ནང་
བཀོད་དོ་བཟུམ་འབད་བ་ཅིན་
པེ་ཊོལ་གྱི་གོང་ཚད་དེ་
རྒྱལ་སྤྱི་ནང་ བེ་རལ་རེ་ལུ་
དངུལ་ཀྲམ་ཡུ་ཨེསི་ཌོ་ལར་༣
ལྷགཔ་ཅིག་ མར་ཕབ་སོང་མི་ལུ་བརྟེན་
ཨིནམ་སྦེ་ བཤད་ཡོདཔ་ད་
པེ་ཊོལ་གྱི་གོང་ཚད་དེ་
སྤྱི་ཟླ་༢ པའི་ནང་ ཐེངས་གཉིས་རེ་
ཡར་སེང་སོང་ཡོདཔ་ཨིན་པས།
རྒྱ་གར་ལས་སྡེ་གཉིས་ཀྱིས་
རྫོང་ཁག་སོ་སོ་ཚུ་ནང་
བཀྲམ་སྤེལ་འབད་དོ་ཡོདཔ་ཨིན་རུང་
ས་སྣུམ་གྱི་ གོང་ཚད་ལུ་
ཕྱེད་ཀྲམ་དག་པ་ཅིག་གི་
ཁྱད་པར་ཞུགས་འོང་ཟེར་ཨིནམ་ད་
དེ་ཡང་ རྫོང་ཁག་སོ་སོའི་ནང་
སྐྱེལ་འདྲེན་གྱི་གནས་སྟངས་དང་འཁྲིལ་
གོང་ཚད་ལུ་ ཁྱད་པར་ཞུགསཔ་ཨིན་ཟེར་
ཨིན་པའི་གནས་ཚུལ།
བཀྲ་ཤིས་བསྟན་འཛིན།
No comments:
Post a Comment