 |
| Add caption |
འདི་དང་འབྲེལ་ ཞལ་འཛོམས་ནང་བཅའ་མར་གཏོགས་མི་ ཚོགས་པའི་འཐུས་མི་དང་ རྒྱབ་སྐྱོར་བ་ཚུ་ལུ་ ཚོགས་པའི་འདེམས་ངོ་ཚུ་ རེ་རེ་བཞིན་དུ་སྦེ་ ངོ་སྤྲོད་འབད་མིའི་ནང་ འདེམས་ངོ་ཚུ་གི་གྲས་ཁར་ ཨམ་སྲུ་གཞོན་ཤོས་༣ གྱི་ ངོ་སྤྲོད་འབད་ཡི།
ཨམ་སྲུ་གཞོན་ཤོས་༣ དེ་ཡང་ ཧཱ་གསང་སྦས་ཁ་འདེམས་ཁོངས་ལས་ སྐྱེས་ལོ་༢༥ ལང་མི་ ཤེས་རབ་རྩེ་ ཚན་རིག་ནང་ མཐོ་རིམ་ཤེས་ཚད་མཐར་འཁྱོལ་མི་ རྡོ་རྗེ་དབང་མོ་དང་ ལྷུན་རྩེ་སྒང་ཟུར་སྨིན་རྒྱས་ འདེམས་ཁོངས་ལས་ སྐྱེས་ལོ་༢༦ ལང་མི་ ཚོང་རིག་ནང་ མཐོ་རིམ་ཤེས་ཚད་མཐར་འཁྱོལ་ཏེ་ ཁྲིམས་དོན་ཤེས་ཡོན་ལྷབ་མི་ ཚེ་དབང་སྒྲོལ་མ་དང་ གློག་རིག་ལག་ལེན་འཕྲུལ་རིག་ནང་ མཐོ་རིམ་མཐར་འཁྱོལ་མི་ སྐྱེས་ལོ་༢༥ ལང་མི་ ཨོ་རྒྱན་སྒྲོལ་མ་དེ་ ཚོགས་པའི་བྲག་སྟེང་གླང་ཐལ་གྱི་ འདེམས་ངོ་ཚུ་ཨིན་པས།
འབྲུག་མཉམ་རུབ་ཚོགས་པ་གིས་ ད་ཚུན་ འདེམས་ངོ་༤༠ གཏན་འཁེལ་སོང་ཡོད་པའི་ཁར་ ཚོགས་པའི་འདེམས་ངོ་ཚུ་གི་གྲངས་སུ་ ཨམ་སྲུ་༥ ལས་བརྒལ་ མ་ཐོནམ་ཨིན་པས།
ཐིམ་ཕུ་སྟོད་ཀྱི་འདེམས་ངོ་ ད་ལྟོ་ རྒྱལ་ཡོངས་ཚོགས་སྡེའི་འཐུས་མི་སྦེ་ཡོད་མི་ སངས་རྒྱས་བཟང་མོ་ཡང་ ཚོགས་པའི་གྲངས་སུ་ཡོད་རུང་ གཏན་འཁེལ་མ་འགྱོ་བས།
ཚོགས་པའི་ཁྲི་འཛིན་ རྡོ་རྗེ་ཆོས་སྒྲོན་གྱིས་ སླབ་མིའི་ནང་ འདེམས་ངོ་ཨམ་སྲུ་ཐོབ་ནི་དེ་ དོ་འགྲན་སྦོམ་འདུག་ཟེར་ཨིནམ་ད་ སྲིད་དོན་ནང་ འབྲེལ་གཏོགས་འབད་བའི་བསྒང་ལས་ སྒེར་གྱི་གསང་བྱ་ག་ནི་ཡང་མེད་པའི་ མི་མང་འབྲེལ་དོན་ཅིག་ལུ་ འགྱུར་བའི་གནད་དོན་ལུ་བརྟེན་ སྲིད་དོན་ནང་ ཨམ་སྲུའི་འབྲེལ་གཏོགས་ཉུང་བའི་གཞི་གནས་དེ་ འབྲུག་ལུ་རྐྱངམ་གཅིག་མིན་པར་ རྒྱལ་སྤྱིའི་རྒྱལ་ཁབ་ ག་ཏེ་ལུ་ཡང་ བཅོག་ར་འཐད་པས་ཟེར་ཨིན་པས།
རྡོ་རྗེ་ཆོས་སྒྲོན་གྱིས་འབད་བ་ཅིན་ ཁོང་གི་ཚོགས་པའི་འདེམས་ངོ་ཚུ་གི་གྲས་ཁར་ ཨམ་སྲུ་ཉུང་སུ་ལས་མེད་དེ་འབད་རུང་ སྤྱི་ཚོགས་ནང་ བཙག་འཐུ་གྲུབ་པ་ཅིན་ ཨམ་སྲུ་དང་འབྲེལ་བའི་གནད་དོན་དེ་ གཙོ་ཅན་ཅིག་སྦེ་ ལག་ལེན་འཐབ་ནི་ཨིན་པའི་ཁར་ འདེམས་ངོ་ཕོ་སྐྱེས་ཚུ་གིས་ཡང་ རྒྱབ་སྐྱོར་འབད་འོང་ཟེར་ཨིན་པས།
མོ་གིས་ སླབ་མིའི་ནང་ ཁྱིམ་ཚང་རྒྱལ་ཁབ་གཞན་དང་ཕྱདཔ་ད་ འབྲུག་ལུ་ ཕོ་མོའི་འདྲ་མཉམ་གནས་སྟངས་དེ་ ངལ་རངས་དང་ ཡིད་ཆེས་ཏོག་ཏོ་འདུག་ཟེར་ཨིན་རུང་ ཕོ་མོ་འདྲ་མཉམ་གནས་སྟངས་དང་འབྲེལ་བའི་ སྙན་ཞུ་མེདཔ་མེན་ཟེར་ཨིན་པས།
རྒྱལ་སྤྱིའི་གནས་ཚད་ཀྱི་ གོང་འཕེལ་ལས་རིམ་ཚུ་ནང་ ཨམ་སྲུའི་འབྲེལ་གཏོགས་གནས་སྟངས་དེ་ ག་ཅི་དེ་ ཡར་རྒྱས་ འགྱོ་དོ་ཟེར་བཤད་ཅི།
ཚོགས་པའི་འདེམས་ངོ་ ཨམ་སྲུ་༣ གྱིས་འབད་བ་ཅིན་ ལོ་དང་ ན་ཚོད་དང་ ཕོ་མོའི་གནས་སྟངས་ཀྱི་ ཁྱད་པར་ལུ་མ་བལྟ་བར་ གཙོ་བོ་ར་ རྒྱལ་ཁབ་ལུ་ ཕྱག་ཞུ་ནིའི་དོན་ལུ་ དམིགས་གཏད་བསྐྱེད་དེ་ བཅའ་མར་གཏོགས་ཅི་ཟེར་ཨིན་པས།
རྡོ་རྗེ་དབང་མོ་གིས་ སླབ་མིའི་ནང་ མོ་ལུ་ མི་མང་ཤོས་ཅིག་གིས་ ད་ལྟོ་ སྲིད་དོན་ནང་འབྲེལ་གཏོགས་འབད་ནི་དེ་ དུས་ཚོད་མེན་པས་ཟེར་ སླབ་མི་ཐོན་ཡོད་རུང་ མོ་རའི་ཁ་ཐུག་ལས་འབད་བ་ཅིན་ དུས་ཚོད་དེ་ ད་ལྟོ་འ་ནེམ་ཅིག་ཁར་ཨིནམ་མ་ཚད་ མི་ངོ་རེ་གིས་ ཁྱད་པར་རེ་ བཟོ་ཚུགས་པའི་ འོས་འབབ་ཡོད་ཟེར་ཨིན་པས།
ཨོ་རྒྱན་སྒྲོལ་མ་གིས་འབད་བ་ཅིན་ གོ་སྐབས་དེ་ ག་ར་ལུ་ ཁྱད་པར་མེདཔ་སྦེ་ བྱིན་ཡོདཔ་ལས་ མོ་གིས་གོ་སྐབས་ལེན་ལེནམ་ཨིན་ཟེར་ཨིནམ་ད་ ལ་ལུ་ཅིག་གིས་ ཉམས་མྱོང་དགོ་པའི་སྐོར་ལས་ ལོ་རྒྱུས་ལེ་ཤ་ཅིག་སླབ་ཨིན་རུང་ མོ་ར་གིས་ སེམས་ཐག་བཅད་ཅི་ཟེར་ཨིན་པས།
ཚེ་དབང་སྒྲོལ་མ་གིས་འབད་བ་ཅིན་ ད་རེས་ རྒྱལ་ཁབ་ནང་འགྱུར་བ་འགྱོ་བའི་ནམ་དུས་ལུ་ འགོ་ཁྲིདཔ་དང་ ཁྲིམས་བཟོ་མི་ཚུ་ནང་ཡང་ དུས་མཐུན་གྱི་འགྱུར་བ་དགོ་པའི་ དུས་ཚོད་ཅིག་ཨིནམ་ལས་ འགྱུར་བ་དེ་ དུས་ཚོད་དང་བསྟུན་ ཐབས་ཤེས་གསརཔ་ལུ་ རག་ལས་དགོཔ་ལས་ འབྲེལ་གཏོགས་འབད་མི་ ག་དེ་མང་མང་དགོཔ་འདི་ ཁག་ཆེ་ཟེར་ཨིན་པས།
དེ་དང་འབྲེལ་ ཚོགས་པའི་ཞལ་འཛོམས་ནང་ གཙོ་འཛིན་དང་ ཡོངས་ཁྱབ་དྲུང་ཆེན་ དེ་ལས་ དངུལ་གཉེར་ ནང་འཁོད་རྩིས་ཞིབ་པ་ཚུ་ཡང་ བཙག་འཐུ་འབད་ཡོདཔ་ཨིན་པས།
བཙག་འཐུའི་སྐབས་ གཙོ་འཛིན་གྱི་དོན་ལུ་ འོས་ངོ་རེ་རེའི་ དགོ་མི་དགོ་གི་ ཚོགས་རྒྱན་བཙུགས་པའི་སྐབས་ ཚོགས་པའི་ཐོ་བཀོད་ཅན་གྱི་འཐུས་མི་༡༢༡ ཡོད་མི་ལས་ རྡོ་རྗེ་ཆོས་སྒྲོན་གྱིས་ དགོ་ཟེར་བའི་ཚོགས་རྒྱན་༡༡༧ ཐོབ་སྟེ་ གཙོ་འཛིན་དང་ བསྟན་འཛིན་ལེགས་འཕེལ་གྱིས་ཡང་ ཚོགས་རྒྱན་༡༡༧ ཐོབ་སྟེ་ ཡོངས་ཁྱབ་དྲུང་ཆེན་ དེ་ལས་ ཀ་རྩ་དངོས་གྲུབ་ཀྱིས་ཚོགས་རྒྱན་༡༡༩ ཐོབ་སྟེ་ དངུལ་གཉེར་དང་ ཇེ་བི་རའི་གིས་ ཚོགས་རྒྱན་༡༡༨ ཐོབ་སྟེ་ ནང་འཁོད་རྩིས་ཞིབ་པའི་ གོ་གནས་ལུ་ བཙག་འཐུ་གྲུབ་ཅི།
ཞལ་འཛོམས་དེ་གི་ཐོག་ལས་ ཚོགས་པའི་བཀོད་ཚོགས་འཐུས་མི་དང་ ཚོགས་པའི་སྒྲིག་གཞིའི་རྩ་ཁྲིམས་དེ་ཡང་ ཆ་འཇོག་འབད་ཡོད་པའི་གནས་ཚུལ།
བསམ་གཏན་ཡེ་ཤེས།
No comments:
Post a Comment