རྒེད་འོག་གི་ དམངས་མི་རྣམ་རྒྱས་ཀྱིས་ བཤད་མི་དང་འཁྲིལཝ་ད་ དགེ་བསྙེན་རྒེད་འོག་ནང་ སྤྱི་འོག་༥ ཡོད་ས་ལས་ མཐོ་རིམ་ཤེས་ཚད་ མཐར་འཁྱོལ་མི་ ག་ཡང་མེད་མི་དེ་ བློ་ཕམ་གི་གཞི་གནས་ཅིག་ཨིན་མས་ཟེར་ཨིན་པས།
ཁོ་གིས་འབད་བ་ཅིན་ དགེ་བསྙེན་གཡུས་ཚན་ནང་ལས་ ན་གཞོན་ཚུ་གིས་ སློབ་རིམ་༡༢ པ་ཚུན་ ལྷབ་ཡོདཔ་མ་གཏོགས་ མང་ཤོས་ཅིག་གིས་ སློབ་རིམ་༧ པ་དང་༨ པ་ཚུན་ལྷབ་ཞིནམ་ལས་ དམག་མི་དང་ སོ་ནམ་ཞིང་ལཱ་ དེ་ལས་ དགེ་སློང་ནང་འགྱོ་མི་ཚུ་ ཨིན་མས་ཟེར་ཨིན་པས།
ད་རེས་ནངས་པ་འབད་བའི་བསྒང་ལས་ ཤེས་ཡོན་དེ་ ག་དེམ་ཅིག་ཁག་ཆེཝ་ཨིན་ན་ ཤེས་རྟོགས་བྱུང་ཡོད་པའི་ཁར་ ཁོ་གི་ མནོ་བསམ་ལས་འབད་བ་ཅིན་ ན་གཞོན་ཚུ་གིས་ ཉུང་མཐའ་མཐོ་རིམ་ཤེས་ཚད་ ལྷབ་དགོཔ་དེ་ ཁག་ཆེ་བའི་དུས་ཚོད་ཁར་ ལྷོད་དེ་འདུག་ཟེར་ཨིན་པས།
དམངས་མི་ རྣམ་རྒྱས་ལུ་ ཨ་ལུ་གཉིས་ཡོད་མི་དེ་ ཅིག་སློབ་རིམ་༨ པ་དང་ ཅིག་སློབ་རིམ་༤ པའི་ནང་ ལྷབ་དོ་ཡོདཔ་ལས་ ཁོ་ལུ་ དཀའ་ངལ་ག་དེམ་ཅིག་ར་ བྱུང་སྟེ་འབད་རུང་ ཁོ་རའི་ ཨ་ལུ་གཉིས་ལུ་ ཤེས་ཡོན་སྤྲོད་ནི་ལས་ ཟུར་ཐབས་མི་འབད་ཟེར་ཨིན་པས།
བཟང་ལེགས་ཁ་སྤྱི་འོག་ལས་ སྐྱེས་ལོ་༥༧ ལང་མི་ ཨཔ་རྣམ་རྒྱས་ཀྱིས་ བཤད་མི་དང་འཁྲིལཝ་ད་ འབྲུག་རྒྱལ་ཁབ་འདི་ ད་རེས་གྱི་གནས་སྟངས་ནང་བཟུམ་སྦེ་ དམངས་གཙོའི་རིང་ལུགས་ནང་འགྱོ་འོང་ཟེར་བའི་ མནོ་བསམ་རྩ་ལས་ར་ མ་བཏང་ཟེར་ཨིན་པས།
འབྲུག་རྒྱལ་ཁབ་ནང་ དམངས་གཙོའི་རིང་ལུགས་ འགོ་བཙུགས་པའི་བསྒང་ལས་ དེ་ནང་ བཅའ་མར་གཏོགས་དགོ་པ་ཅིན་ ཉུང་མཐའ་མཐོ་རིམ་ ཤེས་ཚད་ ཡོད་མི་དགོཔ་ལས་ ཤེས་ཡོན་གྱི་གལ་ཆེ་ཧིང་དེ་ ཧ་གོ་ཡི་ཟེར་ཨིན་པས།
དགེ་བསྙེན་རྒེད་འོག་ནང་ལས་ འདེམས་ངོ་ཐོན་མི་ མེད་དེ་འབད་རུང་ ནུབ་ཕྱོགས་ཐིམ་ཕུ་ལས་ ཐོན་མི་ཚུ་ལུ་ ལྕོགས་གྲུབ་ཅན་ ག་ཡོདཔ་ཨིན་ན་ ལྟ་ཞིནམ་ལས་ ཚོགས་རྒྱན་བཙུགས་ཏེ་ བཙག་འཐུ་འབད་ནིའི་འཆར་གཞི་ ཡོད་ཟེར་ཨིན་པས།
གཞུང་གི་ ཁ་ཐུག་ལས་དེ་ ཤེས་ཡོན་གྱི་གོ་སྐབས་ འདྲ་མཉམ་སྦེ་ གནང་ཡོད་རུང་ ན་གཞོན་ཚུ་གིས་ ལཱ་གཡོག་ནང་འཛུལ་ནི་ལུ་ སྤྲོ་བ་བསྐྱེད་མི་ལུ་བརྟེན་ ཤེས་ཡོན་མཐར་འཁྱོལ་ བྱུང་མ་ཚུགས་པས་ཟེར་ཨིན་པས།
མ་འོངས་པར་ རྒེད་འོག་གི་ན་གཞོན་ཚུ་གིས་ མཐོ་རིམ་ཤེས་ཚད་མཐར་འཁྱོལ་ཏེ་ རྒྱལ་ཁབ་ཀྱི་དམངས་གཙོ་རིང་ལུགས་ནང་ འདེམས་ངོ་སྦེ་ བཅའ་མར་གཏོགས་ཚུགས་པའི་རེ་བ་ཡོད་ཟེར་ རྣམ་རྒྱས་ཀྱིས་ བཤདཔ་ཨིན་པའི་གནས་ཚུལ།
ཡེ་ཤེས་སྒྲོལ་མ།
No comments:
Post a Comment