 |
| ས་ཆ་ཨེ་ཀར་༢༧ དེ་ཅིག་གི་ས་ཁོངས་ནང་ བཞེངས་པའི་བསྒང་ཡོད་མི་ གུ་རུ་སྣང་སྲིད་ཟིལ་གནོན་གྱི་སྐུ་འདྲ། |
མཁན་པོ་དཀར་པོ་གིས་ བཤད་མིའི་ནང་ གུ་རུ་སྣང་སྲིད་ཟིལ་གནོན་གྱི་སྐུ་འདྲ་ཅིག་ ལྷུན་རྩེ་ལུ་ ངེས་པར་དུ་བཞེངས་དགོཔ་སྦེ་ སྔོན་བྱོན་རྒྱལ་བ་གོངམ་ཚུ་གིས་ ལུང་བསྟན་ལེ་ཤ་ཅིག་ར་ གནང་མི་ལུ་བརྟེན་ ལུང་བསྟན་དང་འཁྲིལ་ ས་གནས་སྟག་སྐྱིད་ལ་དེ་ ལྷུན་རྩེ་རྫོང་ཁག་གི་ ལྟེ་བ་ལུ་ ཕོག་ནི་དེ་གིས་ ས་གནས་དེ་ཁར་བཞེངས་ནི་ འགོ་བཙུགས་ཅི་ཟེར་ཨིན་པས།
སེང་ཁྲིའི་འོག་ལུ་ དེ་བཟུམ་གྱི་ ནང་རྟེན་ཚུ་གི་གྲངས་སུ་ འཇིག་རྟེན་སོ་ནམ་པའི་ ལག་ཆས་ཚུ་ ཕུལ་དོ་ཡོདཔ་མ་ཚད་ བར་ནང་ལུ་ ས་བཅུད་བུམ་གཏེར་དང་ ཀླུ་བུམ་ རིལ་བུ་ ཤིང་སྣ་ ས་ཆུ་ལ་སོགས་པའི་རིགས་སྣ་ སྨན་སྣ་ དེའི་གུ་ལུ་ བསྐལ་པའི་མར་མེ་དང་ རིན་ཆེན་རྫས་བརྒྱད་ བཀྲིས་རྟགས་བརྒྱད་ རྒྱལ་སྲས་སྣ་བདུན་ གཡང་བུམ་ལ་སོགས་པའི་ རིན་པོ་ཆེ་གི་བྱེ་བྲག་ཚུ་ ཕུལ་གནང་དོ་ཡོདཔ་ཨིན་པས།
དེ་བཟུམ་མའི་ ནང་གཟུངས་བྱིན་ཅན་ཚུ་ ཕུལ་དགོ་མི་དེ་ཡང་ འཇིག་རྟེན་གྱི་ཁམས་འདི་ནང་ ནད་མུ་འཁྲུག་རྩོད་ལ་སོགས་པ་ཚུ་ ག་ནི་ཡང་ འབྱུང་བ་བཅུག་པར་ བཀྲིས་ཕུན་སུམ་ཚོགས་ཐབས་ལུ་ཨིན་པས།
ནང་གཟུངས་ཚུ་ཕུལ་བའི་སྐབས་ལུ་ ཐུགས་སྨོན་གནང་པར་ ལྷུན་རྩེ་རྫོང་བདག་དང་ མོང་སྒར་རྫོང་བདག་གིས་གཙོས་པའི་ ལས་ཁུངས་ཁག་གི་འགོ་དཔོན་ཚུ་དང་ དད་མོས་ཅན་གྱི་ མི་སེར་བརྒྱ་ལས་བཅད་དེ་ འཛོམས་ཡོདཔ་ཨིན་པས།
སེང་ཁྲའི་འོག་ལུ་ ཆོས་ལོངས་སྤྲུལ་༣ གྱི་ ལྷ་ཁང་ཐོག་ཚད་༣ ཡོདཔ་ད་ དེ་ཡང་ སྟེང་ཐོག་ལུ་ རྒྱལ་བ་རིགས་ལྔའི་ ལྷ་ཚོགས་བཞུགས་སུ་གསོལ་ནི་དང་ བར་ཐོག་ལུ་ ཞི་ཁྲོ་དམ་པ་རིགས་བརྒྱ་ འོག་ཐོག་ལུ་ གུ་རུ་དང་མཁན་སློབ་ཆོས་གསུམ་གྱིས་གཙོས་པའི་ རྗེ་འབངས་ཉེར་ལྔ་ དེ་ལས་ ལྡེབས་རིས་ཚུ་བཞེངས་ནི་ཨིན་པས།
དེ་ཡང་ གཙོ་བོ་ར་ སྤྱིར་འཛམ་གླིང་གི་ ཞི་བདེ་དང་ ལྷག་པར་དུ་ འབྲུག་རྒྱལ་ཁབ་ནང་ དམག་འཁྲུག་ལ་སོགས་པ་ཚུ་བཟློག་སྟེ་ བདེ་སྐྱིད་ཀྱི་ངང་ལུ་ གནས་ཐབས་ལུ་ཨིན་ཟེར་ཨིན་པས།
དེ་མ་ཚད་ འོག་ཐོག་ལུ་ རྒྱལ་རབས་དང་ལྡན་པའི་ འགྲེམས་སྟོན་ཁང་ཅིག་ཡང་ བཟོ་ནི་ཨིནམ་ད་ མཁན་པོ་དཀར་པོ་གིས་ སླབ་མིའི་ནང་ གུ་རུ་སྣང་སྲིད་ཟིལ་གནོན་གྱི་ སྐུ་འདྲ་དེ་ཡང་ དུས་ཅི་ བསྒྲུབ་ཚུགསཔ་འབད་དེ་ རྒྱལ་བ་ལྷ་ལས་འབབ་པའི་ དུས་ཆེན་ཁྱད་པར་ཅན་དང་འབྲེལ་ བཀྲིས་རབ་གནས་མཛད་ཚུགས་པའི་ རེ་སྨོན་ཡོད་ཟེར་ཨིན་པས།
ས་ཆ་ཨེ་ཀར་༢༧ དེ་ཅིག་གི་ས་ཁོངས་ནང་ བཞེངས་པའི་བསྒང་ཡོད་མི་ གུ་རུ་སྣང་སྲིད་ཟིལ་གནོན་གྱི་ སྐུ་འདྲ་དེ་ སྤྱི་ལོ་༢༠༠༥ ལུ་ ས་སླངས་རྟེན་འབྲེལ་བརྩི་ཡོདཔ་ད་ སྐུ་འདྲ་བཞེངས་ནིའི་ལཱ་ངོ་མ་དེ་ སྤྱི་ལོ་༢༠༠༨ ལས་མ་གཏོགས་ འགོ་བཙུགས་མ་ཚུགསཔ་ཨིན་པས།
སྟག་མོ་ཆུ་ གཡུས་ཚན་གྱི་ལྟག་ལུ་ གཟི་བརྗིད་དང་ལྡནམ་སྦེ་ སྔར་མེད་པའི་ གུ་རུའི་སྐུ་འདྲ་སྦོམ་ཤོས་ཅིག་ བཞེངས་མི་དེ་ལུ་ མི་དང་སེམས་ཅན་ཚུ་གིས་ མཇལ་བ་ཙམ་ཅིག་གིས་ ངན་སོང་གསུམ་གྱི་ སྡུག་བསྔལ་ལས་འགྲོལ་ཚུགས་ནི་ཨིནམ་མ་ཚད་ སྟག་མོ་ཚུ་གཡུས་ཚན་དེ་ མ་འོངས་པ་ལུ་ ས་གནས་བྱིན་ཅན་ཅིག་ལུ་ འགྱུར་ཚུགས་ནི་ཨིན་པའི་གནས་ཚུལ།
ལྷུན་རྩེ་ལས་ བདེ་ཆེན་ཚེ་རིང་།
No comments:
Post a Comment