གཟིགས་གནང་མི་ལུ་བཀའ་དྲིན་ཆེ།

༉ ང་བཅས་ཀྱིས་ ཉིན་བསྟར་བཞིན་དུ་

ཡོངས་འབྲེལ་འཆར་སྒོ་འདི་ནང་

གནས་ཚུལ་ཚུ་ དུས་མཐུན་བཟོ་སྟེ་ གསལ་བཀོད་འབདཝ་ཨིན།

We update at the earliest possible for you!

རྫོང་ཁའི་གནས་ཚུལ་གཟིགས་ དུས་མཐུན་ཞུགས་ཚུགས།

ནངས་པ་ རྒྱལ་ཁབ་མཐའ་དབུས་མེད་པར་ འཛམ་གླིང་དགའ་སྐྱིད་ཀྱི་ཉིནམ་ བརྩི་སྲུང་འབད་ནི།

  ནངས་པ་ འཛམ་གླིང་དགའ་སྐྱིད་ཀྱི་ཉིནམ་ བརྩི་སྲུང་འབདཝ་དང་འབྲེལ་ བློན་ཆེན་འཇིགས་མེད་འོད་ཟེར་འཕྲིན་ལས་མཆོག་གིས་ ཁོ་རའི་ཨ་ལུ་ཚུ་དང་ དི་བུ་དང་ དི་བུམོ་ཚུ་ཁྱིད་དེ་ ཐིམ་ཕུའི་ས་གནས་ཚུ་ནང་ ཁམས་སངས་བྱོན་ནི་ཨིན་པས།

གཞན་དལ་གཞི་ བློན་ཆེན་གྱིས་ ཁོ་རའི་ མི་རབས་༤ གི་ ནང་མི་ཚུ་ཁྱིད་ཐོག་ལས་ ཉིནམ་བརྩི་སྲུང་འབད་ཚུགས་པ་ཅིན་ ལྷག་པར་དུ་ སྤྲོ་སྣང་སྦོམ་འབྱུང་ཚུགས་ནི་ཨིན་རུང་ ཁོ་རའི་ སྐྱེས་བའི་ཡུམ་དང་གཅིག་ཁར་ བཞུགས་ནིའི་ དུས་སྐལ་དེ་ ཟླ་ངོ་དག་པ་ཅིག་གི་ཧེ་མར་ རྫོགས་སོ་ཡི་ཟེར་གསུངས་ཡི།


དེ་ཡང་ འཛམ་གླིང་ནང་ འགོ་དང་པ་ འགོ་འདྲེན་འཐབ་མི་ དུས་ཅི་གི་ འཛམ་གླིང་དགའ་སྐྱིད་ཀྱི་ཉིནམ་དེ་ དམིགས་བསལ་དུ་ ནང་མི་བཟའ་ཚང་ཚུ་དང་ ལྟ་ལྟོ་ཚང་ དེ་ལས་ མི་སྡེ་ཚུ་གཅིག་ཁར་འཛོམས་བཅུག་སྟེ་ འབྲེལ་བ་གོང་འཕེལ་གཏང་ནིའི་དོན་ལུ་ ཨིན་ཟེར་ཨིན་པས།

བློན་ཆེན་གྱིས་གསུངས་མིའི་ནང་ དགའ་སྐྱིད་ཀྱི་ཉིནམ་དེ་ མི་དབང་འབྲུག་རྒྱལ་༤ པ་མཆོག་གི་ ཐུགས་ཀྱི་དགོངས་བཞེད་ གཙོ་ཅན་ཅིག་ཨིན་མི་ རྒྱལ་ཡོངས་དགའ་སྐྱིད་དཔལ་འཛོམས་ལུ་བརྟེན་ འབྲུག་རྒྱལ་ཁབ་ནང་ལས་ བྱུང་ཡོདཔ་ལས་ ད་རེས་ རྒྱལ་སྤྱི་གིས་ བརྩི་སྲུང་ཞུ་བའི་སྐབས་ ངལ་རངས་སྦོམ་ བསྐྱེད་དགོཔ་ཅིག་ ཨིན་མས་ཟེར་ཨིན་མས།

ད་ཚུན་གྱི་རིང་ མི་ཚུ་གིས་ དགའ་སྐྱིད་འབྱུང་དགོ་པ་ཅིན་ རྒྱུ་ནོར་ལོངས་སྤྱོད་ བསག་དགོཔ་སྦེ་ མནོ་བསམ་བཏང་སྟེ་ཡོདཔ་ད་ རྒྱུ་ནོར་ལོངས་སྤྱོད་དང་ལྡན་རུང་ ལུས་ལུ་མ་གཏོགས་ སེམས་ལུ་བདེ་བ་མེདཔ་ལས་ ཉིནམ་བརྩི་སྲུང་དེ་ལུ་བརྟེན་ མི་སེར་ཚུ་གིས་ བདེ་སྐྱིད་ངོ་མ་དེ་ ག་ཅི་བཟུམ་ཅིག་ལུ་སླབ་ཨིན་ན་ ཧ་གོ་ཚུགས་པའི་ རེ་བ་ཡོད་ཟེར་ བློན་ཆེན་གྱིས་གསུངས་ཡི།

ཉིནམ་བརྩི་སྲུང་གི་དོན་ལུ་ དྲོ་པ་ བཀྲིས་ཆོས་རྫོང་གི་ རྒྱལ་དར་མཐའ་འཁོར་ལུ་ ཁྲོ་༨ དེ་ཅིག་ནང་ ཆུ་ལྟེམ་ལྟེམ་སྦེ་ བཀང་ཐོག་ལས་ འགོ་བཙུགས་ནི་ཨིན་པས།

དེ་བཟུམ་སྦེ་ དྲོ་པའི་ཆུ་ཚོད་༧ ལས་༡༡ ཚུན་ བཀྲིས་ཆོས་རྫོང་ནང་ མི་མང་ལུ་ མཐོང་གྲོལ་གྱི་ མཇལ་ཁ་གནང་ནི་དང་ མཐོང་གྲོལ་མཇལ་བར་འོང་མི་ དད་ཅན་ཚུ་གིས་ བཀྲིས་ཆོས་རྫོང་གི་ འཛུལ་སྒོ་ལས་ འཐོབ་ཚུགས་ནི་ཨིན་མི་ པད་འདབ་ཚུ་ རང་གི་དང་འདོད་དང་འཁྲིལ་ རིན་དུམ་གྲ་རེ་སྤྲོད་དེ་ ཉོ་འབག་ཞིནམ་ལས་ རྩ་བ་༣ ལུ་ གུས་བཏུད་ཞུ་ནིའི་ཚུལ་དུ་ ཆུ་བཀང་བཞག་མི་ཁྲོ་ཚུ་ནང་ ཕུལ་དགོཔ་ཨིན་པས།

དེ་བཟུམ་སྦེ་ ཉིནམ་དེ་ལུ་ ནོར་འཛིན་ལམ་བདའ་སྟེ་ སྣུམ་འཁོར་ཚུ་ འགྲོ་འགྲུལ་འབད་ནི་ལས་ བཀག་ཆ་འབད་དེ་ ས་གནས་ཐདམ་ཐད་ཁ་ལས་ཕར་ སྒྲ་དབྱངས་ཁང་ཚུ་ནང་ ལཱ་འབད་མི་ཚུ་གིས་ ཞབས་ཁྲའི་ལས་རིམ་ཚུ་ འགོ་འདྲེན་འཐབ་ནི་དང་ ལྕང་གླིང་མི་ཐང་གི་ སྣུམ་འཁོར་བཞག་ས་དང་ ནོར་འཛིན་ལམ་བདའ་སྟེ་ བཟའ་ཁང་ཚུ་ཡང་ བཙུགས་ནི་ཨིན་པས།

ནང་སྲིད་ལྷན་ཁག་གི་ འགོ་དཔོན་ཚུ་གིས་ སླབ་མིའི་ནང་ ཉིནམ་བརྩི་སྲུང་གི་ སྤྲོ་སྟོན་ལས་རིམ་གཙོ་ཅན་དེ་ ཐིམ་ཕུ་ཆུ་ཚོད་འཁོར་ལོའི་ ཀ་ཆེན་གྱི་ས་ཁོངས་ནང་སྦེ་ འབྲུག་པའི་གློག་བརྙན་ཚོགས་སྡེ་དང་ འབྲུག་བརྒྱུད་འཕྲིན་ལས་འཛིན་༢ ཀྱིས་ མཉམ་འབྲེལ་ཐོག་ལས་ སྤྲོ་སྟོན་ལས་རིམ་ཚུ་ འགོ་འདྲེན་འཐབ་ནི་ཟེར་ཨིན་པས།

ཁོ་གིས་འབད་བ་ཅིན་ ལྕང་ཇི་ཇི་དང་ བདེ་ཆེན་ཆོས་གླིང་གི་ ས་གནས་ཚུ་ནང་ཡང་ སྤྲོ་སྟོན་ལས་རིམ་ཚུ་ འགོ་འདྲེན་འཐབ་ནི་དང་ འབྲུག་གི་སྙན་ཆ་དང་ཞིབ་འཚོལ་ལྟེ་བའི་མདོ་ཆེན་ ཁེངས་བསོད་ནམས་རྡོ་རྗེ་གིས་ མི་དབང་འབྲུག་རྒྱལ་༣ པའི་སྐབས་ཀྱི་ ཞབས་ཁྲ་རྐྱབ་མི་ཚུ་དང་གཅིག་ཁར་ ཞབས་ཁྲའི་ལས་རིམ་ཚུ་ འགོ་འདྲེན་འཐབ་འོང་ཟེར་ཨིན་པས།

དེ་བཟུམ་སྦེ་ བརྒྱ་འཁོར་གླིང་ཁ་ནང་ རྒས་ཤོསམ་ཚུ་གི་དོན་ལུ་ རང་ལུགས་ཀྱི་ རྩེདམོ་རྙིངམ་ཅིག་ཨིན་མི་ སྟག་དང་ནོར་གྱི་ རྩེདམོ་ཚུ་ཡང་ འགོ་འདྲེན་འཐབ་ནི་དང་ ས་གནས་ཚུ་ནང་ གསོ་བའི་ལྷན་ཁག་གིས་ ནད་རིག་བརྟག་དཔྱད་ཀྱི་ ཞབས་ཏོག་ཚུ་ཡང་ འགོ་འདྲེན་འཐབ་ནི་ཨིན་པས།

འཛམ་གླིང་དགའ་སྐྱིད་ཀྱི་ཉིནམ་དེ་ སྤྱི་ལོ་༢༠༡༡ ཟླ་༧ པའི་ནང་ འཛམ་གླིང་སྤྱི་ཚོགས་ཀྱི་ ཡོངས་ཁྱབ་ཞལ་འཛོམས་ནང་ ཆ་འཇོག་གྲུབ་ཡོདཔ་ད་ བརྩི་སྲུང་གི་ཉིནམ་དེ་ཡང་ སྤྱི་ཟླ་༣ པའི་ཚེས་༢༠ ལུ་ ཉིན་མཚན་དུས་མཉམ་དང་འབྲེལ་ འགོ་འདྲེན་འཐབ་ནི་སྦེ་ གྲོས་ཐག་བཅད་ཡོདཔ་ཨིན་པས།

དགའ་སྐྱིད་ཀྱི་ཉིནམ་དེ་ ཐིམ་ཕུ་ལུ་བཟུམ་སྦེ་ རྒྱལ་ཁབ་ཀྱི་རྫོང་ཁག་ ཆ་མཉམ་ནང་ རང་སོའི་ལས་རིམ་ཚུ་ འགོ་འདྲེན་འཐབ་ནི་ ཨིན་པའི་གནས་ཚུལ།
                                                                                ཉི་མ་དབང་འདུས།



No comments:

Post a Comment