ཤི་རྐྱེན་བྱུང་མི་ གླངམོ་ཆེ་གི་རོ། |
ནགས་ཚལ་འགོ་དཔོན་ཚུ་གིས་ སླབ་མི་དང་འཁྲིལཝ་ད་ སྐྱེས་ལོ་༤༩ ལས་༥༠ འི་བར་ན་འབད་མི་ གླངམོ་ཆེ་དེ་ གློག་རྒྱུན་རེག་མི་ལུ་བརྟེན་ ཤི་རྐྱེན་བྱུང་ནུག་ཟེར་ཨིན་པས།
གཟུགས་ཀྱི་མཐོ་ཚད་ཕིཊ་༨ དང་ཨིན་ཅི་༦ འབད་མི་ གླངམོ་ཆེ་དེ་ གློག་ཤུགས་མཐོ་དྲགས་ཡོད་མི་ གློག་ཐག་ཅིག་གུ་ རེག་པའི་ཤུལ་ལུ་ ཤི་རྐྱེན་བྱུང་ནུག་ཟེར་ ནགས་ཚལ་འགོ་དཔོན་ཚུ་གིས་ བཤདཔ་ཨིན་པས།
ངང་ལམ་གྱི་ ནགས་ཚལ་འགོ་དཔོན་ཚུ་གིས་ ཞིབ་དཔྱད་འབད་བའི་སྐབས་ གླངམོ་ཆེ་དེ་ གློག་རྒྱུན་གྱིས་ ཁ་འཚིགས་བཏང་ཡོདཔ་སྦེ་ མཐོང་ཡོདཔ་ཨིན་པས།
ནགས་ཚལ་འགོ་དཔོན་ཚུ་གིས་ བཤད་དོ་བཟུམ་འབད་བ་ཅིན་ ན་ཧིང་ གནམ་བྱཱར་གྱི་སྐབས་ལུ་ ཤིང་འགྱེལ་སོང་མི་ཅིག་ གློག་ཐག་གུ་ཕོགཔ་ལས་ གློག་ཐག་དམའ་སུ་ཅིག་སྦེ་ དཔྱངས་ཡོད་མི་ལུ་བརྟེན་ རྐྱེན་ངན་བྱུང་ནུག་ཟེར་ཨིན་པས།
ས་གནས་ཀྱི་ མི་ཚུ་གིས་ ས་ཁོངས་ནང་ དྲིམ་མ་འདྲཝ་ཅིག་ ཚོར་ཡོདཔ་ལས་ བལྟ་བར་འགྱོ་བའི་བསྒང་ལས་ གླངམོ་ཆེ་ཅིག་ ཤི་ཡོདཔ་མཐོང་བའི་ཤུལ་ལུ་ ནགས་ཚལ་འགོ་དཔོན་ཚུ་ལུ་ སྙན་ཞུ་འབད་ཡོདཔ་ཨིན་པས།
རིང་ཚད་ཕིཊ་༡.༥ འབད་མི་ གླངམོ་ཆེའི་མཆེཝ་དེ་ གཞུང་ལུ་ ཕུལ་ཡོདཔ་བཞིན་དུ་ རོ་དེ་ ས་དོང་ནང་ བཙུགས་ཡོདཔ་ཨིན་པས།
ས་གནས་ཀྱི་ མི་ཅིག་གིས་ སླབ་དོ་བཟུམ་འབད་བ་ཅིན་ གློག་ཐག་ཚུ་ དེ་སྦེ་བཞག་པ་ཅིན་ ད་ལྟོ་ གླངམོ་ཆེ་ལུ་ རྐྱེན་ངན་བྱུང་དོ་བཟུམ་སྦེ་ མི་ཚུ་ལུ་ཡང་ འབྱུང་ནིའི་ཉེན་ཁ་ སྦོམ་འདུག་ཟེར་ སླབ་ཨིན་པའི་གནས་ཚུལ།
རྩོམ་འབྲི་ལས་བྱེདཔ།
No comments:
Post a Comment