 |
| རིན་མེད་ཞབས་ཏོག་ལྟེ་བའི་ ལས་བྱེདཔ་ཨམ་སྲུ་ཅིག་གིས་ བརྒྱུད་འཕྲིན་ཐོག་ ཉོགས་བཀོད་ལེན་པའི་བསྒང་། |
དེ་ཡང་ མི་ཚུ་གིས་ ཁྲོམ་སྡེའི་ཞབས་ཏོག་ལེགས་ཤོམ་མེད་པའི་ཁར་ ཞབས་ཏོག་ཚུ་ མགྱོགས་སུ་སྦེ་ མཁོ་སྤྲོད་མི་འབད་བའི་སྐོར་ ཁ་བཏང་ཡོདཔ་མ་ཚད་ ཉོགས་བཤད་བཀོད་རུང་ དེ་ལུ་ ངོས་ལེན་མི་འབད་བས་ཟེར་ སྐྱོན་བརྗོད་འབད་བའི་ཤུལ་ལུ་ ཕུན་ཚོགས་གླིང་ཁྲོམ་སྡེ་གིས་ རིན་སྤྲོད་མ་དགོ་པར་ ལས་མགྲོན་པའི་ བརྒྱུད་འཕྲིན་ཞབས་ཏོག་ལྟེ་བ་ཅིག་ འགོ་བཙུགས་ཡོདཔ་ཨིན་པས།
ད་ཚུན་གྱི་བར་ན་ ཁྲོམ་སྡེ་ལུ་ ཞབས་ཏོག་ཕན་ནུས་ཅན་མེད་པའི་སྐོར་ ཉོགས་བཤད་བཀོད་མི་དེ་ཡང་ བརྒྱུད་འཕྲིན་ཐོག་ ཉོགས་བཀོད་ལེན་མི་ ཕུད་རྡོག་གཅིག་ལས་བརྒལ་མེད་པའི་ཁར་ ཡིག་ཚང་གི་ ལཱ་གཞན་ཚུ་ཡང་འབད་དགོ་ནི་དེ་གིས་ཨིན་ཟེར་ ཁྲོམ་སྡེའི་མཐའ་འཁོར་གནས་སྟངས་སྡེ་ཚན་གྱི་འགོ་འཛིན་ འཇིགས་མེད་ཕུན་ཚོགས་ཀྱིས་ སླབ་ཨིན་པས།
ཁོ་གིས་འབད་བ་ཅིན་ མི་ག་ར་གིས་ བརྒྱུད་འཕྲིན་གཅིག་གི་ཐོག་ལས་ ཉོགས་བཤད་བཀོདཔ་ད་ རྒྱུན་ལམ་སོ་སོའི་ནང་ འགྱོ་མི་ལུ་བརྟེན་ ཟད་འགྲོ་འཕྲོ་བརླག་འགྱོ་བའི་ཁར་ ཉོགས་བཤད་ཚུ་ འབྲེལ་ཡོད་སྡེ་ཚན་ནང་ མ་ལྷོད་པའི་ དཀའ་ངལ་ཚུ་ བྱུང་ཡོད་ཟེར་ཨིན་པས།
མ་གཞི་ ཁྲོམ་སྡེ་ཡིག་ཚང་གིས་ བརྒྱུད་འཕྲིན་ནང་ལྷོད་མི་ ཉོགས་བཤད་ཚུ་ ཐོ་བཞག་ནི་མེད་རུང་ ཉིན་བསྟར་བཞིན་དུ་ ཉོགས་བཤད་༡༠ ལྷགཔ་རེ་ ཐོབ་དོ་ཡོདཔ་ཨིན་པས།
ད་རེས་ རིན་སྤྲོད་མ་དགོ་པའི་ བརྒྱུད་འཕྲིན་ཨང་གསརཔ་བཙུགས་མི་དང་འཁྲིལ་ མི་ཚུ་གིས་ ཁྲོམ་སྡེའི་ཞབས་ཏོག་ དཔེར་ན་ འཐུང་ཆུ་དང་ བཙོག་ཡུར་ ཕྱགས་སྙིགས་ ཁྲོམ་རྒྱུན་སྐྱོང་ དེ་ལས་ དཀའ་ངལ་གཞན་ཚུ་གི་སྐོར་ལས་ ཉོགས་བཤད་བཀོད་ཚུགས་ནི་ཨིན་པས།
ད་ལས་ཕར་ ཆུ་དུང་ཆག་ཡོདཔ་དང་ ཡང་ཅིན་ ཆུ་འཛགས་པ་ཅིན་ མི་ཚུ་གིས་ ཐད་ཀར་དུ་ ཁྲོམ་སྡེའི་བརྒྱུད་འཕྲིན་གཏོང་ཁང་ནང་བཏང་སྟེ་ ཉོགས་བཤད་བཀོད་ཚུགས་ནི་ཨིནམ་ལས་ འཕྲོ་བརླག་མི་འགྱོ་ཟེར་ འཇིགས་མེད་ཕུན་ཚོགས་ཀྱིས་ སླབ་ཨིན་པས།
ད་རེས་ནངས་པ་ ཕུན་ཚོགས་གླིང་ཁྲོམ་སྡེ་ཡིག་ཚང་ནང་ ཆུ་དང་ གློག་མེ་ བཙོག་ཆུ་ལ་སོགས་པའི་ ཞབས་ཏོག་ཚུ་ནང་ ལཱ་འབད་མི་༤༠ དེ་ཅིག་ཡོདཔ་ཨིན་པས།
འཇིགས་མེད་ཕུན་ཚོགས་ཀྱིས་འབད་བ་ཅིན་ རིན་མེད་བརྒྱུད་འཕྲིན་ཞབས་ཏོག་དེ་ ཉོགས་བཤད་བཀོད་ནིའི་དོན་ལུ་རྐྱངམ་གཅིག་མེད་པར་ ཕུན་ཚོགས་གླིང་ཁྲོམ་ལུ་ཕན་པའི་ བསམ་འཆར་དང་ ཚ་གྱང་ གྲོས་འཆར་ཚུ་བཀོད་སའི་ ལྟེ་བ་ཅིག་སྦེ་ཡང་ ལག་ལེན་འཐབ་དགོ་ཟེར་ཨིན་པས།
ལས་མགྲོན་པའི་ ཞབས་ཏོག་ལྟེ་བ་དེ་ སྤྱི་ཟླ་༡༠ པའི་ཚེས་༥ ལུ་ འགོ་འབྱེད་འབད་ཡོད་པའི་གནས་ཚུལ།
རྩོམ་འབྲི་ལས་བྱེདཔ།
No comments:
Post a Comment