 |
| གངས་གཟིག་༣ ཁཝ་ནང་ འགྲོ་འགྲུལ་འབད་བའི་པར། |
གསང་བའི་པར་ཆས་དེ་གིས་ ན་ཧིང་ སྤྱི་ཟླ་༡༢ པའི་ཚེས་༢༠ ལུ་ ཚར་གཅིག་དང་ དུས་ཅི་ སྤྱི་ཟླ་༣ པའི་ཚེས་༡༠ དང་ ཚེས་༡༧ ལུ་ ཚར་རེ་འབདཝ་ད་ པར་ཐེངས་༣ བཏབ་ཡོད་མི་དེ་ ད་ཚུན་གི་རིང་ལུ་ གངས་གཟིག་༣ གཅིག་ཁར་སྦེ་ པར་བཏབ་མི་དེ་ འགོ་དང་པ་འོང་ནི་ཨིན་པས།
པར་ཆས་ཚུ་ གཞི་བཙུགས་འབད་བའི་ཤུལ་ལུ་ ཁཝ་ཤུགས་སྦེ་ རྐྱབ་མི་ལུ་རྟེན་ ལོག་བསྡུ་མ་ཚུགས་པར་ ལུས་སོཔ་ལས་ འཕྲལ་ཁམས་ཅིག་ཁར་ བསྡུ་བའི་སྐབས་ མཐོང་གསལ་བྱུང་ཡོདཔ་ཨིན་པས།
དེ་བཟུམ་སྦེ་ དུས་ཅི་ སྤྱི་ཟླ་༣ པའི་ཚེས་༨ ལས་ ཟླཝ་༦ པའི་ཚེས་༤ ཚུན་ཚོད་ གླིང་ཁ་དེ་གི་ ས་ཁོངས་ཁག་༢༨ དེ་ཅིག་ནང་ གངས་གཟིག་དང་འབྲེལ་བའི་ ཞིབ་འཚོལ་གྱི་ ལཱ་འབད་ནི་གི་དོན་ལུ་ གསང་བའི་པར་ཆས་༥༦ དེ་ཅིག་ བཙུགས་བཞག་མི་ཚུ་གིས་ གངས་གཟིག་གི་པར་ ལེ་ཤ་ཅིག་ར་ ཐོབ་ཡོདཔ་ལས་ གླིང་ཁ་དེ་ནང་ གངས་གཟིག་གི་གྱངས་ཁ་ཚུ་ ལེགས་ཤོམ་ཡོད་པའི་ མངོན་གསལ་བྱུངམ་མས་ཟེར་ གླིང་ཁའི་འགོ་དཔོན་ཚུ་གིས་ བཤདཔ་ཨིན་པས།
དེ་ཡང་ ས་གོ་༢༨ ཀྱི་གྲས་ལས་ གངས་གཟིག་གི་པར་ མང་ཤོས་ཅིག་ ས་གོ་༡༤ ནང་བཀལ་བཞག་མི་ པར་ཆས་ཚུ་ནང་ ཚུད་ནུག་ཟེར་ཨིན་པས།
རི་དྭགས་སྲུང་སྐྱོབ་འགོ་དཔོན་ཅིག་གིས་ སླབ་དོ་བཟུམ་འབད་བ་ཅིན་ གསང་བའི་པར་ཆས་ཀྱིས་གངས་གཟིག་གི་པར་ ལེ་ཤ་ཅིག་ཐོབ་ཡོད་མི་ལུ་བརྟེན་ གླིང་ཁ་དེ་ནང་ གངས་གཟིག་གི་གནས་སྟངས་ ལེགས་ཤོམ་ཡོད་པའི་ གསལ་སྟོན་འབདཝ་ཨིན་རུང་ ད་རུང་ པར་ཆས་མང་སུ་སྦེ་ གཞི་བཙུགས་ཐོག་ལས་ ཞིབ་འཚོལ་ཅིག་ འབད་ཞིནམ་ལས་ པར་ཚུ་ནང་ཚུད་མི་ གཟིག་ཚུ་ ཕུད་རྡོག་གཅིག་ཨིན་ན་དང་ ཡང་ཅིན་ ལེ་ཤ་སྦེ་འདུག་ག་ དབྱེ་ཞིབ་འབད་དགོཔ་ཡོད་ཟེར་ཨིན་པས།
གླིང་ཁའི་འགོ་དཔོན་ཚུ་གིས་འབད་བ་ཅིན་ ད་རུང་ གངས་གཟིག་གི་གནས་སྟངས་ ཞིབ་འཚོལ་གྱི་དོན་ལུ་ གསང་བའི་པར་ཆས་བཙུག་ནིའི་ ལས་རིམ་༢ པ་དེ་ དུས་ཅི་ སྤྱི་ཟླ་༡༡ པའི་ནང་ལས་ འགོ་བཙུག་ནི་དང་ དེ་ཡང་ ཤོ་ཐེངས་དང་པའི་སྐབས་ ཁྱབ་མ་ཚུགས་པའི་ ས་ཁོངས་ཚུ་ནང་ འགོ་འདྲེན་འཐབ་ནི་ཟེར་ཨིན་པས།
དེ་གི་སྐབས་ གླིང་ཁའི་ནང་ གངས་གཟིག་གི་ཁྱབ་ཚད་དང་ ད་ལྟོ་ པར་བཏབ་ཡོད་པའི་ གངས་གཟིག་ཚུ་ ངོས་འཛིན་འབད་ཚུགས་ཟེར་ འགོ་དཔོན་ཚུ་གིས་ སླབ་ཨིན་པས།
པར་བཏབ་འཕྲུལ་ཆས་ཚུ་ནང་ གངས་གཟིག་གིས་མ་ཚད་ སེམས་ཅན་གཞན་ཡང་ ལེ་ཤ་གཅིག་གི་པར་ཚུ་ ཐོབ་ཡོདཔ་ད་ གཅན་གཟན་དེ་གིས་ བཟའ་མིའི་ རི་དྭགས་སེམས་ཅན་ཚུ་གི་ ཁྱབ་ཚད་ཚུ་ཡང་ ལེགས་ཤོམ་ཡོདཔ་ མཐོང་གསལ་བྱུང་ཡོད་པའི་གནས་ཚུལ།
བསམ་གཏན་ཡེ་ཤེས།
No comments:
Post a Comment