༨/༤/༢༠༡༣ ཚོགས་པ་དེ་ལུ་ འདེམས་ངོ་བསྡོམས་༤༡ ལུ་ ལྷོད་ཡོད་རུང་ འདེམས་ཁོངས་༤༧ གྱི་དོན་ལུ་ འདེམས་ངོ་༦ མ་ལང་པར་ཡོདཔ་ཨིན་པས།༉ སྤྱི་ཟླ་༤ པའི་ཚེས་༥ ལུ་ འབྲུག་མཉམ་རུབ་ཚོགས་པ་གིས་ ཞི་གཡོག་འགོ་དཔོན་ལས་ ཚོང་ལས་འཐབ་མི་དང་ མཐོ་རིམ་ཤེས་ཚད་མཐར་འཁྱོལ་མི་གསརཔ་ཚུན་ཚོད་ སྐྱེས་ལོ་༢༥ ལས་༦༡ གི་བར་ན་འབད་མི་ འདེམས་ངོ་༨ འབད་མི་ སྡེ་ཚན་གཞན་ཅིག་ ངོ་སྤྲོད་འབད་ནུག།
ད་ཚུན་གྱི་བར་ན་ ཚོགས་པ་གིས་ འདེམས་ངོ་༤༡ གཏན་འཁེལ་སོང་ཡོད་པའི་ གསལ་བསྒྲགས་འབད་ཡོད་རུང་ ད་རུང་ ཚོགས་པ་ལུ་ འདེམས་ངོ་༦ གིས་ མ་ལང་པར་ཡོདཔ་ཨིན་པས།
ཀུན་ལེགས་རྡོ་རྗེ། ར་སྡི་-སག་སྟེང་འདེམས་ཁོངས། བཀྲིས་སྒང་།
འདེམས་ངོ་གསརཔ་༨ ཀྱི་གྲས་ལས་ རྒས་ཤོས་ཅིག་ཨིན་མི་ སྐྱེས་ལོ་༦༡ ལང་མི་ ཀུན་ལེགས་རྡོ་རྗེ་དེ་ ལས་གཡོག་ལྷན་ཁག་གི་ མི་སྟོབས་མདོ་ཆེན་བགྲེསཔ་ཨིནམ་ད་ ཁོ་གིས་ ར་སྡི་-སག་སྟེང་འདེམས་ཁོངས་ནང་ལས་ དོ་འགྲན་འབད་ནི་ཨིན་པས།
རྒྱལ་ཁབ་ལུ་ དད་དམ་ལྷད་མེད་ཀྱི་སྒོ་ལས་ ཕྱག་ཞུ་བའི་ ཡིད་ཆེས་ཀྱི་ ངོ་སྦྱོར་ལག་ཁྱེར་ཐོབ་མི་ ཀུན་ལེགས་རྡོ་རྗེ་གིས་ སླབ་མིའི་ནང་ མཉམ་རུབ་ཚོགས་པ་གིས་ རྒྱལ་ཁབ་དང་ མི་སེར་གྱི་ མཐའ་དོན་ལུ་ དུས་རྟག་པར་རྒྱུན་དུ་ ཕྱག་ཞུ་ནི་ལུ་ བརྩོན་ཤུགས་བསྐྱེད་ནི་ཨིན་པའི་ བློ་གཏད་ཡིད་ཆེས་ཧྲིལ་བུ་ཡོད་མི་ལུ་བརྟེན་ ཚོགས་པ་འདི་ནང་ འཛུལ་ཞུགས་འབད་ཡི་ཟེར་ཨིན་པས།
བསྟན་འཛིན་ལེགས་འཕེལ། བར་མཚམས་-གཤོང་ཕུག་འདེམས་ཁོངས། བཀྲིས་སྒང་།
འབྲུག་མཉམ་རུབ་ཚོགས་པ་ གཞི་བཙུགས་འབད་མི་ཅིག་ཨིན་མི་ སྐྱེས་ལོ་༤༩ ལང་མི་ བསྟན་འཛིན་ལེགས་འཕེལ་གྱིས་ ཚོགས་པའི་འདེམས་ངོ་སྦེ་ བར་མཚམས་-གཤོང་ཕུག་འདེམས་ཁོངས་ལས་ འབྲེལ་གཏོགས་འབད་ནི་ཨིན་པས།
དགའ་གླིང་ལས་ཨིན་མི་ བསྟན་འཛིན་ལེགས་འཕེལ་གྱིས་ གཞུང་གཡོག་ནང་ གོ་གནས་སོ་སོའི་ཐོག་ལུ་ ཕྱག་ཞུ་བའི་ཤུལ་ལུ་ ད་ལྟོ་ ཚོང་འབྲེལ་འཐབ་དོ་ཡོདཔ་ད་ འབྲུག་གི་དམངས་གཙོའི་རིང་ལུགས་འདི་ འགོ་བཙུགསཔ་ཅིག་ར་ཨིནམ་ལས་ ཁོང་གིས་ གཞི་འགྱམ་སྒྲིང་སྒྲིང་བཙུགས་ཏེ་ གཅིག་མཐུན་ཐོག་ ཚུལ་ལྡན་ལམ་ཕྱོགས་ལུ་ ཞུགས་བཅུག་ནི་དེ་ ག་ནི་བ་ གལ་ཆེ་ཟེར་ སླབ་ཨིན་པས།
བཀྲིས། འབྲུག་རྗེ་སྒང་-བརྩེ་བཟང་འདེམས་ཁོངས། དར་དཀར་ནང་།
བཟོ་སྐྲུན་དང་འབྲེལ་བའི་ ཚོང་ལཱ་འཐབ་མི་ སྐྱེས་ལོ་༣༠ ལང་མི་ བཀྲིས་དེ་ དར་དཀར་ནང་ འབྲུག་རྗེ་སྒང་-བརྩེ་བཟང་འདེམས་ཁོངས་ལས་ ཚོགས་པ་འདི་གི་ འདེམས་ངོ་ཨིན་པས།
ཁོ་ར་སྐྱེས་ས་སྦོམ་སའི་ གཡུས་ཚན་ནང་ སྡོད་ཡོདཔ་ལས་ གྲོང་གཡུས་ཚུ་ནང་ དཀའ་སྡུག་དང་ མི་སེར་ཚུ་ལུ་ དཀའ་ངལ་ག་ཅི་ཡོདཔ་ཨིན་ན་ ལེགས་ཤོས་སྦེ་ ཧ་གོ་ཡོདཔ་ཨིན་རུང་ ཁོ་ར་ སྲིད་དོན་ནང་འཛུལ་ཏེ་ བཅའ་མར་ཧྲིལ་བུམ་སྦེ་ མ་གཏོགས་ཚུན་ཚོད་ གྲོང་གཡུས་ཀྱི་ དཀའ་ངལ་ཚུ་ སེལ་མི་ཚུགས་ནི་ཨིནམ་ ཤེས་རྟོགས་བྱུང་ཡི་ཟེར་ བཀྲིས་ཀྱིས་ སླབ་ཨིན་པས།
འཇིགས་མེད་ལྷུན་གྲུབ། སྦྱིས་-དཀའ་འཚོ་འདེམས་ཁོངས། ཧཱ།
སྐྱེས་ལོ་༢༨ ལང་མི་ འཇིགས་མེད་ལྷུན་གྲུབ་ཀྱི་དོན་ལུ་ སྲིད་དོན་ནང་ འཛུལ་ཞུགས་འབད་ནི་དེ་ གཙོ་བོ་ར་ དམངས་གཙོའི་རིང་ལུགས་ཀྱི་ ལམ་ཕྱོགས་གསར་པའི་ནང་ སོར་བསྒྱུར་འབད་མི་ རྒྱལ་ཁབ་ལུ་ ཕྱག་ཞུ་ཐབས་ལུ་ཨིན་པས།
ལྟ་བཤལ་ལས་སྡེ་ཅིག་ཡོད་མི་ འཇིགས་མེད་ལྷུན་གྲུབ་ཀྱིས་ ཧཱ་སྦྱིས་-དཀའ་འཚོ་འདེམས་ཁོངས་ལས་ ཚོགས་པའི་འདེམས་ངོ་སྦེ་ དོ་འགྲན་འབད་ནི་ཨིནམ་ད་ ཁོ་གིས་འབད་བ་ཅིན་ ལྟ་བཤལ་ལས་སྡེའི་ནང་ ལཱ་འབད་མི་དེ་གིས་ གྲོང་གཡུས་གནས་ཚད་ནང་ མི་སྡེ་ཚུ་དང་ འབྲེལ་འཛིན་འབདཝ་ད་ ལམ་སྲོལ་དང་ གོམས་གཤིས་ཚུ་གི་སྐོར་ལས་ ཤེས་རྟོགས་བྱུང་ཚུགས་ཅི་ཟེར་ཨིན་པས།
ཚེ་རིང་དོན་གྲུབ། དགོན་ཁ་སྟོད་-ལུང་ནག་ནང་འདེམས་ཁོངས། མགར་ས།
སྲིད་དོན་པ་སྦེ་ ཕྱག་ཞུ་ནི་གི་དོན་ལུ་ ལཱ་གཡོག་ལེགས་ཤོམ་ཅིག་ བཤོལ་བཞག་ཡོདཔ་སྦེ་སླབ་མི་ སྐྱེས་ལོ་༢༨ ལང་མི་ ཚེ་རིང་དོན་གྲུབ་དེ་ མགར་ས་དགོན་ཁ་སྟོད་-ལུང་ནག་ནང་འདེམས་ཁོངས་ཀྱི་དོན་ལུ་ མཉམ་རུབ་ཚོགས་པའི་ འདེམས་ངོ་ཨིན་པས།
ནང་པའི་མཐོ་རིམ་ཤེས་ཚད་ཡོད་མི་ འདེམས་ངོ་དེ་གིས་ གཞུང་དང་སྒེར་གྱི་སློབ་གྲྭ་ལེ་ཤ་ཅིག་ནང་ སློབ་སྟོན་འབད་ཡོདཔ་ད་ ང་ སྲིད་དོན་ནང་ འཛུལ་ཞུགས་འབད་མི་དེ་ཡང་ རྩ་ཁྲིམས་ཆེན་མོའི་ དགོངས་དོན་དང་འཁྲིལཝ་ད་ འབྲུག་མི་ཡོངས་དང་ རྒྱལ་ཁབ་ལུ་ ཕྱག་ཞུ་སྟེ་ ཁྱད་པར་བཟོ་ནི་གི་ འགན་ཁུར་རྩ་ཅན་འབག་དགོཔ་ཡོད་མི་ལུ་བརྟེན་ཨིན་ཟེར་ ཚེ་རིང་དོན་གྲུབ་ཀྱིས་ སླབ་ཨིན་པས།
ཕུན་ཚོགས་རྣམ་རྒྱལ། ཆུ་སྨད་-ཨུ་ར་འདེམས་ཁོངས། བུམ་ཐང་།
སྤྱི་ལོ་༢༠༠༦ ལུ་ མཐོ་རིམ་སློབ་གྲྭ་མཇུག་བསྡུཝ་ཅིག་ བཟོ་སྐྲུན་ལས་སྡེའི་ནང་ ལཱ་འབད་མི་ སྐྱེས་ལོ་༢༧ ལང་མི་ ཕུན་ཚོགས་རྣམ་རྒྱལ་གྱིས་ རྒྱལ་ཁབ་ནང་འཁོད་ལུ་ བཟོ་སྐྲུན་ལས་འགུལ་མང་རབས་ཅིག་ནང་ བཅའ་མར་གཏོགས་ཡོདཔ་ཨིན་པས།
བཟོ་སྐྲུན་ལས་སྡེའི་ནང་ ལཱ་འབད་བའི་ ངེ་གི་ ཉམས་མྱོང་དེ་གིས་ གྲོང་གསེབ་མི་སྡེའི་ གནས་སྟངས་དང་ འབྲེལ་བ་འཐབ་ནི་གི་ གོ་སྐབས་བཟང་པོ་ཐོབ་ཅི་ཟེར་ བུམ་ཐང་ཆུ་སྨད་-ཨུ་ར་འདེམས་ཁོངས་ལས་ མཉམ་རུབ་ཚོགས་པའི་ འདེམས་ངོ་སྦེ་ བཅའ་མར་གཏོགས་ནི་ཨིན་མི་ ཕུན་ཚོགས་རྣམ་རྒྱལ་གྱིས་ བཤདཔ་ཨིན་པས།
བསོད་ནམས་དོན་གྲུབ། ན་ནོང་-ཤུ་མར་འདེམས་ཁོངས། པདྨ་དགའ་ཚལ།
འདེམས་ངོ་གསརཔ་༨ ཀྱི་གྲས་ལས་ གཞོན་ཤོས་ཅིག་ཨིན་མི་ བསོད་ནམས་དོན་གྲུབ་ སྐྱེས་ལོ་༢༦ ལང་མི་དེ་ པདྨ་དགའ་ཚལ་ན་ནོང་-ཤུ་མར་འདེམས་ཁོངས་ཀྱི་དོན་ལུ་ མཉམ་རུབ་ཚོགས་པའི་ འདོམས་ངོ་ཨིན་པས།
མི་དབང་ཡབ་སྲས་གཉིས་ཀྱིས་ ང་བཅས་ལུ་ གནང་སྦྱིན་སྦེ་གནང་མི་ དམངས་གཙོའི་རིང་ལུགས་ནང་ ང་གིས་ ལྷན་ཐབས་འབད་ཚུགས་ནི་མས་མནོ་སྟེ་ སྲིད་ཚོགས་ནང་ འཛུལ་ཡོདཔ་ལས་ མི་ག་དང་ཡང་ དོ་འགྲན་འབད་ནི་ལུ་ དམིགས་ཏེ་ འཛུལ་འཛུལཝ་མེན་ཟེར་ བསོད་ནམས་དོན་གྲུབ་ཀྱིས་ སླབ་ཨིན་པས།
སངས་རྒྱས་ཕུར་པ། དཀར་སྦྱིས་-རྟ་ལོག་འདེམས་ཁོངས། སྤུ་ན་ཁ།
ལྟ་བཤལ་སྡེ་ཚན་ནང་ ལོ་ངོ་༢༠ ལྷགཔ་ཅིག་ ལཱ་འབད་བའི་ ཉམས་མྱོང་ཡོད་མི་ སྐྱེས་ལོ་༤༥ ལང་མི་ སངས་རྒྱས་ཕུར་པ་གིས་ ཁོ་རའི་ཚེ་གཡོག་ ལྟ་བཤལ་ལམ་སྟོན་པ་སྦེ་ འགོ་བཙུགས་པའི་ཤུལ་ལུ་ ལྟ་བཤལ་ལས་སྡེ་ཅིག་ གཞི་བཙུགས་འབད་ཡོདཔ་ད་ ཁོ་གིས་ ཚོགས་པའི་འདེམས་ངོ་སྦེ་ དཀར་སྦྱིས་-རྟ་ལོག་འདེམས་ཁོངས་ལས་ དོ་འགྲན་འབད་ནི་ཨིན་པས།
སྲིད་དོན་ནང་ འཛུལ་ཞུགས་འབད་ནི་དེ་ འགན་ཁུར་སྦོམ་ཅིག་ཨིནམ་ལས་ ད་རིས་ འཛུལ་ཞུགས་འབད་བ་ཅིན་ རྒྱལ་ཁབ་ལུ་ ཕྱག་ཞུ་ནི་གི་ དུས་ཚོད་འོས་ལྡན་ཨིནམ་སྦེ་མནོ་སྟེ་ ཐག་བཅད་ཅི་ཟེར་ སངས་རྒྱས་ཕུར་པ་གིས་ སླབ་ཨིན་པའི་གནས་ཚུལ།
རྩོམ་འབྲི་ལས་བྱེདཔ།
No comments:
Post a Comment