 |
| འཆམ་མཐུན་ཐོག་སྡོད་མི་ སྤྱི་ཚོགས་ཀྱི་ ངོ་ཚབ་ཚུ། |
ཁོ་གིས་སླབ་མིའི་ནང་ དེའི་སྐོར་ལས་ འཆར་གཞི་༡༡ པའི་ནང་ ཚུད་ཡོདཔ་ལས་ ལཱ་དེ་ ཟླཝ་༢ དེ་ཅིག་གི་ནང་འཁོད་ལུ་ར་ འགོ་བཙུགས་ཚུགས་ཟེར་ཨིན་པས།
དེ་མ་ཚད་ དབུལ་ཕོངས་ཀྱི་དཀའ་ངལ་དེ་ཡང་ ལོ་༥ འི་ནང་འཁོད་ལུ་ རྩ་མེད་བཏང་སྟེ་ གྲོང་གཡུས་ཚུ་ནང་ ཁྲོམ་དང་དབྱེ་བ་མེདཔ་སྦེ་ དགའ་ཏོག་ཏོ་བཟོ་བའི་སྐབས་ གྲོང་གཡུས་ལས་ ཁྲོམ་ཁར་གནས་སྤོ་འོང་མི་ཚུ་ བཀག་ཚུགས་ཟེར་ཨིན་པས།
ཞི་གཡོག་གི་ཐད་ལུ་འབདཝ་བ་ཅིན་ འབྲུག་ཕུན་སུམ་ཚོགས་པ་གིས་ ཞི་གཡོགཔ་ཚུ་ དགོངས་ཞུ་འབད་བའི་སྐབས་ ཐིམ་ཕུ་ལུ་ སྡོད་ཁྱིམ་ཉོ་ཚུགས་པའི་ ལམ་ལུགས་ཡང་ བཟོ་ནི་ཟེར་ཨིནམ་མ་ཚད་ གཡུས་ཚན་ཚུ་ནང་ འཕྲུལ་གླང་གི་ལམ་ཚུ་ ཟད་འགྲོ་ག་དེ་ཉུང་ཉུང་གི་ཐོག་ལས་ སེལ་ནི་དང་ མི་རྒན་རྒས་ཚུ་ སྡོད་སའི་ཁྱིམ་རྐྱབ་ནི་ དེ་ལས་ ཁོང་འགྲོ་འགྲུལ་འབད་བའི་སྐབས་ གླ་ཆ་མར་ཕབ་ཀྱི་ཐོག་ལས་ སྐྱེལ་འདྲེན་གྱི་ཞབས་ཏོག་ཚུ་ཡང་ ཐོབ་ཚུགསཔ་བཟོ་ནི་ཟེར་ཨིནམ་ལས་ དེ་ཚུ་འགྲུབ་ཐབས་ལུ་ ད་རུང་ འབྲུག་ཕུན་སུམ་ཚོགས་པ་ལུ་ ཚོགས་རྒྱན་བཙུགས་གནང་ཟེར་ཨིན་པས།
མི་སེར་དམངས་གཙོ་ཚོགས་པའི་ངོ་ཚབ་འདེམས་ངོ་ རྟ་མགྲིན་དབང་ཕྱུག་གིས་འབད་བ་ཅིན་ རྒྱལ་ཁབ་ནང་ གློ་བུར་གྱི་རྐྱེན་ངན་བྱུང་བའི་སྐབས་ ལག་ལེན་འཐབ་ནིའི་དོན་ལུ་ གནམ་གྲུ་ཧེ་ལི་ཀོབ་ཊར་༢ མཁོ་སྒྲུབ་འབད་ནི་ཟེར་ཨིནམ་ད་ མ་གཞི་གནམ་གྲུ་ཟེར་ སླབ་པའི་སྐབས་ གོང་ཚད་སྦོམ་གནས་ནི་བཟུམ་ཡོད་རུང་ ཚོགས་པ་དེ་ གཞུང་སྐྱོང་ནིའི་གོ་སྐབས་འཐོབ་པ་ཅིན་ ཉོ་ཚུགས་ཟེར་ཨིན་པས།
འདེམས་ཁོངས་གོང་འཕེལ་གནང་བྱིན་མ་དངུལ་ ལོ་ཅིག་ནང་ རྒེད་འོག་རེ་ལུ་ དངུལ་ཀྲམ་ས་ཡ་༢ རེ་བྱིན་ནི་ཟེར་ཨིནམ་ད་ དབང་འདུས་ཕོ་བྲང་ལུ་ རྒེད་འོག་༡༥ ནང་ ལོ་༡ ནང་ དངུལ་ཀྲམ་ ས་ཡ་༣༠ དེ་ཅིག་བྱིན་ནི་ཟེར་ ཁས་བླངས་འབད་ཡོདཔ་མ་ཚད་ སོ་ནམ་ཞིང་ལམ་ཚུ་ ལེགས་ཤོམ་མེདཔ་ལས་ ཚོགས་པ་གིས་ གནམ་བྱཱར་དགུན་མེད་པ་ ལམ་འགྲུལ་འབད་ཚུགསཔ་ བཟོ་ནི་ཨིན་པའི་ཁར་ རྒེད་འོག་ལྟེ་བའི་ལམ་ཚུ་ རྩི་གནག་གཏང་ནི་ཟེར་ཨིན་པས།
ཁོང་གིས་ རྒེད་འོག་ག་རའི་ནང་ ས་སྣུམ་གྱི་རིགས་དང་ མེ་རླུང་གེསི་གི་ཞབས་ཏོག་ ཐོབ་ཚུགསཔ་བཟོ་ནི་ཨིན་པའི་ཁར་ སོ་ནམ་པ་ཚུ་ལུ་ འབྱུང་བཞིའི་རྐྱེན་ངན་ལུ་བརྟེན་ ལོ་ཐོག་མེདཔ་བཏང་མིའི་རྒུད་འཐུས་ཚུ་ཡང་ གཞུང་མིན་ལས་ཚོགས་ཚུ་དང་གཅིག་ཁར་ མཉམ་འབྲེལ་གྱི་ཐོག་ལས་ ལཱ་འབད་དེ་ ཐོབ་ཚུགསཔ་བཟོ་ནི་ཟེར་ཨིན་པས།
འབྲུག་སྤྱིར་དབང་ཚོགས་པའི་འཐུས་མི་ ཕྱག་རྡོར་རྣམ་རྒྱལ་གྱིས་འབད་བ་ཅིན་ གལ་སྲིད་ ཚོགས་པ་དེ་ གཞུང་སྐྱོང་སྦེ་ བཙག་འཐུ་འགྲུབ་པ་ཅིན་ དམངས་གཙོའི་རིང་ལུགས་ཀྱི་ གཞི་འགྱམ་སྒྲིང་སྒྲིང་བཟོ་ནི་ལུ་ ཤུགས་གཏོན་ནི་ཟེར་ཨིནམ་མ་ཚད་ མི་སྡེ་དཔལ་འབྱོར་ ཡར་དྲག་གཏང་ནིའི་དོན་ལུ་ སྒེར་སྡེ་ཚུ་ལུ་ རྒྱབ་སྐྱོར་འབད་དེ་ ལཱ་གཡོག་གི་གོ་སྐབས་ སྤྲོད་ནི་ཟེར་ཨིན་པས།
ན་གཞོན་ ལཱ་གཡོག་མ་ཐོབ་པའི་ དཀའ་ངལ་ བསལ་ཐབས་ལུ་ ན་གཞོན་ཚུ་ སློབ་གྲྭ་ནང་ལས་ མཐར་འཁྱོལཝ་ཅིག་ ཁོང་གི་ཤེས་ཚད་དང་བསྟུན་པའི་ ལཱ་གཡོག་སྦྱོང་བརྡར་བྱིན་ནི་ཟེར་ཨིན་པས།
ཨམ་སྲུ་གི་ ལྕོགས་གྲུབ་གོང་འཕེལ་གཏང་ནིའི་དོན་ལུ་ ཨམ་སྲུ་ཚུ་ལུ་ གོ་སྐབས་འདྲ་མཉམ་བྱིན་ནི་ཨིན་པའི་ཁར་ སྲིད་བྱུས་དང་ ལམ་ལུགས་ཚུ་ཡང་ གསརཔ་བཟོ་ནི་ཟེར་ཨིན་པས།
འབྲུག་མཉམ་རུབ་ཚོགས་པའི་འདེམས་ངོ་ རིན་ཆེན་རྣམ་རྒྱལ་གྱིས་འབད་བ་ཅིན་ ཁོང་གི་ཚོགས་པ་དེ་ མི་སེར་ སྤྱིར་བཏང་ལུ་ ཕན་ཐོགས་ཚུགས་པའི་ ཚོགས་པ་ཅིག་ཨིནམ་ལས་ མི་སེར་ཚུ་གི་ དཀའ་ངལ་ཧ་གོ་ནི་ལུ་ གཙོ་བོ་གཏོན་ནི་ཟེར་ཨིན་པས།
མི་སེར་གྱི་ གདམ་འཐུ་འབད་བའི་ཚོགས་པ་མིན་པར་ གཞུང་སྐྱོང་གི་ཚོགས་པ་ ཁ་ཅན་དབང་ཅན་གྱི་ ལག་པ་ཚུད་སོ་པ་ཅིན་ ཁོང་གི་དོན་ལུ་མ་གཏོགས་ མི་སེར་གྱི་མཐའ་དོན་ལུ་ མི་བལྟ་ནི་ཨིནམ་ལས་ སྲིད་ཚོགས་དེ་ ཉམ་ཆུང་དང་འབྲེལ་གནད་ཡོད་མི་ཅིག་ བཙག་འཐུ་འབད་དགོ་ཟེར་ཨིན་པས།
ཁོང་ལུ་ འབྲུག་ཕུན་སུམ་ཚོགས་པ་དང་ མི་སེར་དམངས་གཙོའི་ཚོགས་པ་བཟུམ་ ཁས་བླངས་གསལ་བསྒྲགས་འབད་ནི་མེད་རུང་ རྒྱལ་ཁབ་ནང་ ངན་ལྷད་དེ་རྩ་མེད་གཏང་ནི་ལུ་ གཙོ་བོ་གཏོན་ནི་ཟེར་ཨིནམ་ད་ དེའི་དོན་ལུ་ སྲིད་ཚོགས་དེ་ འཐུས་མི་ སྤྱི་མཐུན་གྱི་ ཤེས་རབ་ལས་གྲུབ་པའི་ འབྲུག་མཉམ་རུབ་ཚོགས་པ་ལུ་ ཚོགས་རྒྱན་བཙུགས་གནང་ཟེར་ཨིན་པས།
སྤྱིར་བཏང་གྲོས་འཛོམས་དེ་ ཉིན་ཕྱེད་ལས་ དར་དཀར་རྒེད་འོག་ནང་ འགོ་འདྲེན་འཐབ་པའི་སྐབས་ མི་༨༥ དེ་ཅིག་གིས་ བཅའ་མར་གཏོགས་ཡོདཔ་ད་ ཨ་ཐང་ལུ་འབད་བ་ཅིན་ མི་༤༥ ལས་བརྒལ་མེདཔ་ལས་ རྒེད་འོག་༢ ནང་ ཁྱད་ལྡན་གྱི་ཚོགས་རྒྱན་བཙུགས་མི་༨༠༠ ལྷགཔ་ཅིག་ ཡོདཔ་ཨིན་པའི་གནས་ཚུལ།
དབང་འདུས་ལས་ བསྟན་འཛིན་རྣམ་རྒྱལ།
No comments:
Post a Comment