༠༥/༠༥/༢༠༡༣ ༉ སྤ་རོ་ཤར་པ་
འབྲུག་གི་བསྟན་སྲུང་དམག་སྡེའི་
བྱང་གསེང་༧ པའི་ དམག་མི་ཅིག་
སྤྱི་ཟླ་༤ པའི་ཚེས་༢༨ ལུ་
སྤ་ཆུའི་ནང་ ཤི་ཡོདཔ་མཐོང་ནུག།
ལོ་རྒྱུས་དང་འཁྲིལཝ་ད་
ཚེ་འདས་དམག་མི་དེ་ དམག་མི་གཞན་༣
དང་ ཉ་བཟུང་བར་ སོང་ཡོད་པའི་
དོགས་པ་ཡོད་མི་དེ་ཡང་
ནགས་ཚལ་ལྟ་རྟོག་སྡེ་ཚན་གྱིས་
དེ་ཚེ་དྲོ་པའི་ཆུ་ཚོད་༡.༣༠
ལུ་ དམག་མི་༤ ཤར་པ་རྒེད་འོག་དང་
སྦྲེལ་མཐུད་འབད་མི་
ཟམ་གྱི་སྦོ་ལོགས་ཁར་
ཉ་བཟུང་སྡོད་སར་ མཐོང་ཡོདཔ་ཨིན་པས།
ནགས་ཚལ་སྡེ་ཚན་གྱིས་
དམག་མི་༢ བཟུང་ཡོད་རུང་
ཚེ་འདས་དང་ དམག་མི་གཞན་དེ་
བྱོག་ཡར་སོཔ་ཨིན་པས།
ནགས་ཚལ་ལས་བྱེདཔ་ཚུ་གིས་
འཛིན་བཟུང་འབད་མི་ དམག་མི་༢
ཀྱིས་ ཆ་རོགས་གཞན་༢ ལུ་
ལོག་འོང་དགོཔ་སྦེ་ སྐད་རྐྱབ་ད་
དམག་མི་༡ ལོག་འོང་ནུག་ཟེར་
སྤ་རོ་ལས་ གནས་ཚུལ་བཤད་མི་ཅིག་གིས་
བཤད་ཡོདཔ་ད་ ཚེ་འདས་དེ་
གཙང་ཆུ་བརྒལ་ཏེ་
ཆུ་ཕར་ཁ་ཡར་སོཔ་འོང་ནི་མས་ཟེར་
མནོ་ཡོདཔ་ཨིན་པས།
གནད་དོན་དེ་གི་སྐོར་ལས་
ནགས་ཚལ་གྱི་ ཁ་ཐུག་ལས་
བྱང་གསེང་འགོ་དཔོན་ཚུ་ལུ་
སྙན་ཞུ་མ་འབད་བར་ ནགས་ཚལ་འགོ་དཔོན་དང་
དམག་མི་ཚུ་གི་བར་ན་ གོ་བརྡའི་ཐོག་
བདེ་སྒྲིག་བཟོ་ཡོད་རུང་
དམག་མི་ཅིག་ གཙང་ཆུ་ནང་ཐིམ་སྟེ་
ཤི་རྐྱེན་བྱུང་པའི་ཤུལ་ལུ་
བྱང་གསེང་འགོ་དཔོན་ཚུ་གིས་
བསྟན་སྲུང་དམག་སྡེའི་
གཙོ་ཁང་ནང་ སྙན་ཞུ་འབད་དེ་
ནགས་ཚལ་ལས་བྱེདཔ་ཚུ་ལུ་
ཚེ་འདས་དམག་མི་དེ་
རྡོ་བླུགས་མི་ལུ་བརྟེན་
ཤི་རྐྱེན་བྱུང་ཡོད་པའི་
ཁ་ཉེས་བཀལ་ཡོདཔ་ཨིན་པས།
ལོ་རྒྱུས་དང་འཁྲིལ་བ་ཅིན་
སྤ་རོའི་གསོ་བའི་འགོ་དཔོན་དང་
བསྟན་སྲུང་དམག་སྡེའི་
སྨན་བཅོས་འགོ་དཔོན་ཚུ་གིས་
ཡིག་ཚང་གཙོ་ཁང་ལས་ མདོ་འཛིན་ཅིག་གིས་
འགོ་ཁྲིད་འབད་མི་
སྤ་རོའི་ནགས་ཚལ་ལས་བྱེདཔ་དང་
ཁྲིམས་སྲུང་འགག་པ་ཚུ་ཡོད་མི་
ཆེ་མཐོའི་གནས་རིམ་གྱི་
ཞིབ་དཔྱད་སྡེ་ཚན་ངོ་འཛོམས་ཐོག་ལུ་
རོ་བརྟག་དཔྱད་འབད་བའི་སྐབས་ལུ་
ཚེ་འདས་ཀྱི་གཟུགས་ཕྱི་ནང་ལུ་
རྨ་སྐྱོན་ག་ནི་ཡང་མེད་པའི་
ངོས་འཛིན་བྱུང་པའི་
ལོ་རྒྱུས་གོ་ཡི་ཟེར་ གཅིག་གིས་
བཤདཔ་ཨིན་པས།
གནད་དོན་དེ་གི་སྐོར་ལས་
ཞིབ་དཔྱད་འབད་བའི་བསྒང་ཡོད་ཟེར་སླབ་སྟེ་
ནགས་ཚལ་འགོ་དཔོན་ཚུ་གིས་
ག་ནི་ཡང་ སླབ་མ་བཏུབ་ཨིན་རུང་
སྤ་རོའི་གསོ་བའི་འགོ་དཔོན་ཚུ་གིས་འབད་བ་ཅིན་
བརྟག་དཔྱད་སྙན་ཞུ་ཆ་མཉམ་ར་
དམག་སྡེ་ལུ་ སྤྲོད་ཡོདཔ་ལས་
ཁོང་གིས་རྐྱངམ་གཅིག་
གསོ་བའི་གྲུབ་འབྲས་ཚུ་
གསལ་སྟོན་འབད་འོང་ཟེར་ཨིན་པའི་གནས་ཚུལ།
No comments:
Post a Comment