 |
སྤྱིར་བཏང་གྲོས་འཛོམས་ འགོ་འདྲེན་འཐབ་པའི་བསྒང་། |
དུས་ཡུན་སྐར་མ་༡༠ གི་ གསལ་བཤད་ལས་རིམ་ནང་ དང་པ་ར་ འབྲུག་སྤྱིར་དབང་ཚོགས་པའི་འདེམས་ངོ་ ཨེསི་བི་ ག་ལེ་གིས་ ཚོགས་པའི་ངོ་རྟགས་དང་ སྲིད་འཛིན་གྱི་རྒྱབ་ཁུངས་ཚུ་ གསལ་བཤད་འབད་བའི་ཤུལ་ལས་ ཚོགས་པའི་ནང་ཡོད་མི་ འདེམས་ངོ་ཚུ་ རྒན་གཞོན་བར་གསུམ་སྦེ་ ཡོད་མི་དེ་ མི་སེར་ཡོངས་ཀྱི་དཀའ་ངལ་ཚུ་ ཧ་གོ་ཚུགས་ནིའི་དོན་ལུ་ ཨིན་ཟེར་ སླབ་ཨིན་པས།
སྐྱེས་ལོ་༥༨ ལང་མི་འདེམས་ངོ་དེ་གིས་ འབད་བ་ཅིན་ འབྲུག་སྤྱིར་དབང་ཚོགས་པ་དེ་ ཉམ་ཆུང་གི་ཚོགས་པ་ཨིནམ་ལས་ མི་སེར་ཉམ་ཆུང་གི་དཀའ་ངལ་དེ་ བསལ་ནིའི་དོན་ལུ་ མི་སེར་ཉམ་ཆུང་ཚུ་ འབྲེལ་གཏོགས་འབད་དགོཔ་ ཁག་ཆེ་ཟེར་ཨིན་པས།
ཁོ་གིས་ སླབ་མིའི་ནང་ ཚོགས་པ་དེ་ བཙག་འཐུ་གྲུབ་པ་ཅིན་ ཨམ་སྲུའི་དབང་ཆ་ ཡར་དྲག་གཏང་ནི་དང་ ན་གཞོན་གྱི་དཀའ་ངལ་ མི་སེར་སོ་ནམ་པའི་ དཀའ་ངལ་བསལ་ནི་ལུ་ གཙོ་བོར་བཏོན་ནི་ཟེར་ཨིན་པས།
འབྲུག་མཉམ་རུབ་ཚོགས་པའི་འདེམས་ངོ་ བིམ་ ཐ་པ་གིས་ སྲིད་འཛིན་གྱི་ རྒྱབ་ཁུངས་ཚུ་བཤད་པའི་ཤུལ་ལས་ ཚོགས་པའི་ངོ་རྟགས་ ཁམ་ཤིང་མེ་ཏོག་སྦེ་ བཞག་དགོ་མི་དེ་ ཁམ་ཤིང་མེ་ཏོག་ཚུ་ རྒྱལ་ཁབ་ཀྱི་ས་གནས་ག་ཏེ་ཡང་ ཤར་དོ་བཟུམ་སྦེ་ ཚོགས་པ་དེ་གིས་ མི་སེར་གྱི་དཀའ་ངལ་ག་སྟེ་འཐོན་རུང་ ནམ་དགོ་རུང་ ལྷོད་ཚུགས་ནིའི་ རྟགས་མཚན་ཨིན་ཟེར་ སླབ་ཡོདཔ་ཨིན་པས།
སྐྱེས་ལོ་༤༥ ལང་མི་བིམ་ ཐ་པ་གིས་ སླབ་མིའི་ནང་ ཚོགས་པ་གིས་ བཙག་འཐུ་འགྲུབ་པ་ཅིན་ འཆར་གཞི་༡༡ པའི་ལས་སྣ་ཚུ་ འགྲུབ་ནི་ལུ་ རྒྱབ་སྐྱོར་འབད་ནི་དང་ དབུལ་ཕོངས་དཀའ་ངལ་ ད་ལྟོ་ བརྒྱ་ཆ་༡༢ ཡོད་མི་ལས་ མར་ཕབ་འབད་ནི་ དེ་ལས་ སྲིད་བྱུས་དང་ འཆར་གཞི་བཟོ་སའི་གནས་རིམ་ནང་ཡོད་པའི་ ངན་ལྷད་དང་ སྐྱ་ནམ་གྱི་གོང་ཚད་ ཡར་སེང་འགྱོ་མི་དེ་ མར་ཕབ་འབད་ནི་ལུ་ གཙོ་རིམ་བཟུང་ནི་ཨིན་ཟེར་ཨིན་པས།
ཁོ་གིས་ བཤད་དོ་བཟུམ་འབད་བ་ཅིན་ དབུལ་ཕོངས་ཀྱི་དཀའ་ངལ་དེ་ མཐོ་ཤོས་གཡུས་སྒོ་ཚུ་ནང་ཨིནམ་ད་ དེ་ནང་ལས་ཡང་ ཤུགས་ཆེ་ཤོས་ཅིག་ ལྷོ་མཚམས་ཀྱི་ རྫོང་ཁག་ཚུ་ནང་ཨིན་མས་ཟེར་ཨིན་པས།
ལྷ་མཚམས་རྫོང་ཁག་ཚུ་ནང་ དབུལ་ཕོངས་ཀྱི་ དཀའ་ངལ་ལེ་ཤ་ཐོན་མི་དེ་ མི་རྩིས་མེད་པའི་ དཀའ་ངལ་དང་འཁྲིལ་ ལཱ་གཡོག་མ་ཐོབ་མི་ལུ་བརྟེན་ཨིན་པས།
དེ་འབདཝ་ལས་ འབྲུག་མཉམ་རུབ་ཚོགས་པ་དེ་ བཙག་འཐུ་འགྲུབ་པ་ཅིན་ དབུལ་ཕོངས་ཀྱི་ དཀའ་ངལ་བསལ་ནིའི་ནང་ ཤུགས་བཏོན་ནི་ཟེར་ བིམ་ཐ་པ་གིས་ བཤདཔ་ཨིན་པས།
འབྲུག་ཕུན་སུམ་ཚོགས་པའི་འདེམས་ངོ་ ཚོགས་དཔོན་འོགམ་བགྲེསཔ་ གཡང་ཁུག་ཚེ་རིང་གིས་ སླབ་མིའི་ནང་ ཚོགས་པ་གིས་ གཞུང་སྐྱོང་ཚོགས་པ་སྦེ་ ལོ་༥ འི་རིང་ གྲུབ་འབྲས་ཅན་ཅིག་སྦེ་ མཐར་འཁྱོལ་བྱུང་མི་དེ་ རྒྱལ་ཁབ་ནང་ སྤྱི་ཚོགས་ཀྱི་ བཙག་འཐུ་འགོ་དང་པ་ འགོ་འདྲེན་འཐབ་པའི་སྐབས་ མི་སེར་ཚུ་གིས་ བློ་གཏད་ཡིད་ཆེས་བསྐྱེད་དེ་ བཙག་འཐུ་འབད་མི་ལུ་བརྟེན་ཏེ་ ཨིན་ཟེར་ཨིན་པས།
ཁོ་གིས་ བཤད་མི་དང་འཁྲིལཝ་ད་ འབྲུག་ཕུན་སུམ་ཚོགས་པ་གིས་ གྲོང་གསེབ་ཀྱི་དཔལ་འབྱོར་དང་ ཁྲོམ་གྱི་བདེ་བ་འགྲུབ་ནི་ལ་སོགས་པའི་ ཁས་བླངས་ལེ་ཤ་ཡོད་མི་ཚུ་ལུ་ གཙོ་བོར་བཏོན་ཏེ་ ལཱ་འབད་ནི་ཨིནམ་ལས་ མི་སེར་ཚུ་གིས་ མ་འོངས་རྒྱལ་ཁབ་དང་ བུ་གཞི་ཚུ་གི་ མཐའ་དོན་ལུ་དམིགས་ཏེ་ ཚོགས་པ་ གདམ་འཐུ་འབད་དགོཔ་དེ་ ཁག་ཆེ་ཟེར་ཨིན་པས།
མ་གཞི་ སྲིད་དོན་ཚོགས་པ་༤ པོ་ཆ་ར་ ལེགས་ཤོམ་ཡོད་རུང་ གཞུང་སྐྱོང་གི་ལཱ་དེ་ ལཱ་ཁག་ཡོདཔ་ལས་ མི་སེར་ཚུ་གིས་ མནོ་བསམ་ལེགས་ཤོམ་བཏང་སྟེ་ སྲིད་ཚོགས་དྲག་ཤོས་གདམ་འཐུ་འབད་དགོཔ་ཁག་ཆེ་ཟེར་ གཡང་ཁུག་ཚེ་རིང་གིས་ བཤདཔ་ཨིན་པས།
མི་སེར་དམངས་གཙོ་ཚོགས་པའི་འདེམས་ངོ་ ཡོ་གེཤི་ ཏ་མང་གིས་ དབང་ཚད་ཕྱིར་སྤེལ་གྱི་ ལམ་ལུགས་ཀྱི་སྐོར་ལས་ གསལ་བཤད་འབད་ཡོདཔ་མ་ཚད་ ཚོགས་པ་དེ་ བཙག་འཐུ་འགྲུབ་པ་ཅིན་ འདེམས་ཁོངས་གོང་འཕེལ་མ་དངུལ་དང་ ས་གནས་གཞུང་གི་ལས་བྱེདཔ་ཚུ་གི་ ཐོབ་ལམ་བཅའ་ཡིག་བཟོ་ནི་ལུ་ གཙོ་བོར་བཏོན་ནི་ ཨིན་ཟེར་ཨིན་པས།
དེ་མ་ཚད་ ཚོགས་པ་གིས་ མི་སྡེའི་དཔལ་འབྱོར་གོང་འཕེལ་གཏང་ནི་དང་ འཆར་གཞི་དང་སྲིད་བྱུས་ཚུ་ མི་སེར་དང་གྲོས་བསྟུན་ཐོག་ བཟོ་ནི་དང་ སྤུས་ཚད་ལྡན་པའི་ཤེས་རིག་དང་ གསོ་བ་ སྣུམ་འཁོར་ གློག་མེ་ བརྒྱུད་འཕྲིན་ཞབས་ཏོག་གཞི་བཙུགས་ ན་གཞོན་ལཱ་གཡོག་མེད་པའི་ དཀའ་ངལ་བསལ་ནི་ལུ་ ཐབས་ཤེས་ཚུ་བཏོན་ནི་ཟེར་སླབ་ཨིན་པས།
རྫོང་ཁག་འོག་གི་ རྒེད་འོག་༡༢ ཆ་མཉམ་ནང་ ཚར་རེ་འགོ་འདྲེན་འཐབ་ནི་ཨིན་མི་ སྤྱིར་བཏང་གྲོས་འཛོམས་དེ་ ཁ་ཉིནམ་ལས་ འགོ་བཙུགས་ཡོདཔ་ད་ བཙག་འཐུ་ལྷན་ཚོགས་ཀྱི་ རེའུ་མིག་དང་འཁྲིལ་ ཚེས་༡༩ ལུ་ མཇུག་བསྡུ་ནི་ཨིན་པས།
དེ་གི་ཤུལ་ལས་ འདེམས་ངོ་ཚུ་གིས་ ངོ་རྐྱང་གི་ ཁས་བླངས་གསལ་བསྒྲགས་ཚུ་ འབད་ནིའི་འཆར་གཞི་ཡོདཔ་ཨིན་པས།
དེ་བཟུམ་སྦེ་ འཕྲལ་ཁམས་ཅིག་ཁར་ འབྲུག་སྤྱིར་དབང་ཚོགས་པ་དང་ འབྲུག་མཉམ་རུབ་ཚོགས་པ་ དེ་ལས་ འབྲུག་ཕུན་སུམ་ཚོགས་པ་༣ གྱིས་ འགྲམ་ཕུག་ཁྲོམ་ཁར་ ཚོགས་པའི་ཡིག་ཚང་ཚུ་ སྒོ་ཕྱེ་ཡོདཔ་ཨིན་རུང་ མི་སེར་དམངས་གཙོ་ཚོགས་པ་གིས་ ད་ལྟོ་ ཡིག་ཚང་གཞི་བཙུགས་མ་འབད་བར་ཡོདཔ་ཨིན་པས།
རྩི་རང་རྫོང་ཁག་འདེམས་ཁོངས་༢ ནང་ ཁྱད་ཚད་ལྡན་པའི་ ཚོགས་རྒྱན་བཙུགས་མི་བསྡོམས་༢༠,༩༧༩ དེ་ཅིག་ ཡོདཔ་ཨིན་པའི་གནས་ཚུལ།
རྩི་རང་ལས་ ཚེ་རིང་རྣམ་རྒྱལ།
No comments:
Post a Comment