 |
| དབྱངས་ཅན་ཕུག་འབྲིང་རིམ་སློབ་གྲྭ་གོང་མའི་ སློབ་ཕྲུག་ཚུ་ལུ་ བསྐུལ་ཁྱབ་གོ་བརྡའི་ལས་རིམ་ འགོ་འདྲེན་འཐབ་པའི་བསྒང་། |
འབྲུག་སྨྱོ་རྫས་བཀག་འཛིན་ལས་སྡེའི་ འགོ་དཔོན་ཚུ་གིས་ སྤྱི་ཟླ་༩ པའི་ཚེས་༦ ལུ་ ཐིམ་ཁྲོམ་ནང་འཁོད་ཀྱི་ སློབ་གྲྭ་ཁག་གི་གྲས་ལས་ འགོ་དང་པ་ དབྱངས་ཅན་ཕུག་འབྲིང་རིམ་སློབ་གྲྭ་གོང་མའི་ ན་གཞོན་སློབ་ཕྲུག་ཚུ་ལུ་ འགོ་བཙུགས་པའི་ཤུལ་ལས་ མུ་ཏིག་ཐང་འབྲིང་རིམ་སློབ་གྲྭ་གོང་མའི་ནང་ཡང་ བསྐུལ་ཁྱབ་གོ་བརྡའི་ལས་རིམ་ འགོ་འདྲེན་འཐབ་ཡོདཔ་ཨིན་པས།
འབྲུག་སྨྱོ་རྫས་བཀག་འཛིན་ལས་སྡེའི་ ཁྲིམས་དོན་འགོ་དཔོན་ བསོད་ནམས་ཚེ་རིང་གིས་ སླབ་མི་དང་འཁྲིལཝ་ད་ ཐིམ་ཕུ་ཁྲོམ་གྱི་ སློབ་གྲྭ་ཁག་གི་ ན་གཞོན་སློབ་ཕྲུག་ཚུ་གིས་ ཏམ་ཁུའི་ཐོན་སྐྱེད་དང་ སྨྱོ་རྫས་ལག་ལེན་འཐབ་མིའི་ གྱངས་ཁ་ཡར་འཕར་འགྱོ་དོ་ཡོད་པའི་སྐོར་ལས་ མི་ཚུ་གིས་ སྙན་ཞུ་བསྐྱལ་མི་དང་འཁྲིལ་ ཏམ་ཁུའི་ཐོན་སྐྱེད་ཚུ་ ལག་ལེན་འཐབ་པ་ཅིན་ ཉེས་བྱ་དང་ ཉེས་ཁྲིམས་དེ་ལས་ ཏམ་ཁུའི་བཅའ་ཁྲིམས་ཀྱི་སྐོར་ལས་ བསྐུལ་ཁྱབ་གོ་བརྡ་སྤྲོད་དོ་ཟེར་ སླབ་ཨིན་པས།
དེ་བཟུམ་མའི་ ལས་རིམ་འགོ་འདྲེན་འཐབ་དགོ་པའི་ དམིགས་ཡུལ་དེ་ཡང་ རྒྱལ་ས་ཐིམ་ཕུ་དེ་ མི་མང་འཛོམས་སའི་ ས་གནས་ཅིག་ཨིནམ་བཞིན་དུ་ ན་གཞོན་འདྲ་མིན་སྣ་ཚོགས་ཡོད་མི་ཚུ་མེདཔ་ཐལ་མི་ལས་ བཀག་ཐབས་དང་ལམ་སྟོན་འབད་ནི་ ཏམ་ཁུའི་ཐོན་སྐྱེད་ཚུ་ ལག་ལེན་འཐབ་མ་ཆོག་པའི་སྐོར་ལས་ ཏམ་ཁུའི་ཉེས་བྱ་དང་ཉེས་ཁྲིམས་ཚུ་ ག་ཅི་སྦེ་ བཀལཝ་ཨིན་ནའི་སྐོར་ ལས་ གོ་བརྡ་སྤྲོད་དོ་ཡོདཔ་ཨིན་པས།
འབྲུག་སྨྱོ་རྫས་བཀག་འཛིན་ལས་སྡེ་ནང་ མི་སྟོབས་མ་ལང་པའི་ དཀའ་ངལ་ཡོདཔ་ལས་ འབྲུག་རྒྱལ་ཁབ་ནང་ ཉིན་བསྟར་བཞིན་དུ་ ཏམ་ཁུའི་བཅའ་ཁྲིམས་དང་འཁྲིལ་ མི་སེར་ཚུ་གིས་ ལག་ལེན་འཐབ་དོ་ཡོད་མེད་ཀྱི་ བརྟག་ཞིབ་འབད་ནི་དང་ གོ་བརྡའི་ལས་རིམ་ཚུ་ སྤྲོད་ནི་ལུ་ དོ་འགྲན་བྱུང་དོ་ཡོདཔ་ལས་ སློབ་གྲྭའི་ན་གཞོན་བུཚ་དང་བུམོ་ལུ་ དེ་བཟུམ་མའི་ ལས་རིམ་འགོ་འདྲེན་འཐབ་ད་ ཁེ་ཕན་འབྱུང་ནི་ལུ་དམིགས་གཏད་བསྐྱེདཔ་ཨིན་པས།
ཨིན་རུང་ འབྲུག་སྨྱོ་རྫས་བཀག་འཛིན་ལས་སྡེའི་ འགོ་དཔོན་ཚུ་གིས་ སླབ་དོ་བཟུམ་འབད་བ་ཅིན་ ཏམ་ཁུའི་བཅའ་ཁྲིམས་ཀྱི་ གོ་བརྡའི་ལས་རིམ་ཚུ་ གཞུང་གི་གཙུག་སྡེ་དང་ ལས་སྡེ་ ལས་འཛིན་ སྒེར་སྡེ་ གཞུང་མིན་ལས་ཚོགས་ རྫོང་ཁག་ ས་གནས་གཞུང་ དེ་ལས་ གྲོང་གསེབ་གཡུས་སྒོའི་མི་སེར་ཚུ་ལུ་ གོ་བརྡའི་སྦྱོང་བརྡར་ལས་རིམ་ཚུ་ འགོ་འདྲེན་འཐབ་ཡོད་མིའི་གྲས་ལས་ གྲོང་གསེབ་གཡུས་སྒོའི་མི་སེར་ཚུ་ལུ་ ལེགས་ཤོམ་སྦེ་ ཕན་ཐོགས་ནུག་ཟེར་ཨིན་པས།
དབྱངས་ཅན་ཕུག་འབྲིང་རིམ་སློབ་གྲྭ་གོང་མའི་ སློབ་རིམ་༡༠ པའི་སློབ་ཕྲུག་ སྐྱེས་ལོ་༡༨ འབད་མི་ ཕུན་ཚོགས་ཆོས་སྒྲོན་གྱིས་ སླབ་མིའི་ནང་ དེ་བཟུམ་མའི་ སྦྱོང་བརྡར་ལས་རིམ་འགོ་འདྲེན་འཐབ་མི་དེ་གིས་ ཏམ་ཁུའི་བཅའ་ཁྲིམས་ག་ཅི་ཨིན་ན་ ལག་ལེན་འཐབ་ཐངས་དང་ དེ་གི་ཉེས་ཁྲིམས་ ད་ལས་ ན་གཞོན་སློབ་ཕྲུག་ཚུ་ལུ་ འགན་ཁུར་འབག་སྟེ་ ལཱ་འབད་དགོ་པའི་སྐོར་ ཤེས་ཡོན་ལེགས་ཤོམ་ཐོབ་ཡོདཔ་ལས་ ཕན་ཐོགས་བྱུང་ཡི་ཟེར་ཨིན་པས།
དེ་བཟུམ་སྦེ་ ད་རེས་ཐོབ་མི་ ཡོན་ཏན་དང་ཉམས་མྱོང་ཚུ་ ན་གཞོན་སློབ་ཕྲུག་དང་ ཆ་རོགས་ ཕམ་སྤུན་ཆ་ དེ་ལས་ མི་གཞན་གྱིས་ ཏམ་ཁུའི་ཐོན་སྐྱེད་ལག་ལེན་འཐབ་སར་མཐོང་རུང་ ཡོན་ཏན་དང་ ལམ་སྟོན་ དེ་ལས་ ག་དེ་སྦེ་ ཆ་རོགས་འབད་ནིའི་རེ་བ་ཡོད་ཟེར་ སླབ་ཨིན་པས།
སློབ་ཕྲུག་ནོར་བུ་ཚེ་རིང་ལེཔ་ཅ་གིས་ སླབ་མིའི་ནང་ སྦྱོང་བརྡར་ལས་རིམ་དེ་བཟུམ་ འགོ་འདྲེན་ མ་འཐབ་འདྲཝ་ཅིག་འབད་བ་ཅིན་ ཏམ་ཁུའི་བཅའ་ཁྲིམས་ཟེར་མི་དེ་ ག་ཅི་ལུ་ སླབ་ནི་ཨིན་ན་དང་ བཅའ་ཁྲིམས་དེ་ལས་འགལ་བ་ཅིན་ ཉེས་ཁྲིམས་དེ་ གཞི་ག་བཟུམ་ཅིག་ལུ་བཞག་སྟེ་ བཀལ་དོ་ཡོདཔ་ཨིན་ན་ ད་ལྟོ་ཡང་ ཧ་གོ་མ་ཚུགསཔ་འོང་ཟེར་ཨིན་པས།
ད་རེས་འབད་བའི་བསྒང་ལས་ ཏམ་ཁུའི་ཐོན་སྐྱེད་ཚུ་ ལག་ལེན་འཐབ་པ་ཅིན་ མི་སྡེ་དང་ རྒྱལ་ཁབ་ དེ་ལས་ རང་བཞིན་གནས་སྟངས་ལུ་ ཉེས་པ་ག་བཟུམ་ཡོད་ག་དང་ ལག་ལེན་མ་འཐབ་པ་ཅིན་ ཕན་པ་ག་དེ་སྦེ་ཡོད་ག་ ལེགས་ཤོམ་སྦེ་ ཤེས་ཡོན་ཐོབ་ཡོདཔ་ལས་ མི་མང་དང་ ཆ་རོགས་ ཕམ་སྤུན་ཆ་ཚུ་ལུ་ བསླབ་བྱ་དང་ ཁ་བཀོད་བྱིན་ནིའི་ འགན་ཁུར་ཕོག་ལུགས་ ད་ལས་ཕར་ གཞུང་གིས་ ད་རུང་ ཆང་གི་བཅའ་ཁྲིམས་བཟོ་ནིའི་ འཆར་གཞི་དང་ སྲིད་བྱུས་ཡོད་པ་ཅིན་ ལྷག་ནར་དུ་ ཕན་ཐོགས་འབྱུང་ཚུགས་ནི་ཨིནམ་ལས་ ཏམ་ཁུའི་བཅའ་ཁྲིམས་ལུ་ ངོས་ལེན་ཡོདཔ་ཅིག་མཛད་གནང་ཟེར་ སླབ་ཨིན་པས།
གཞུང་གི་གཙུག་སྡེ་དང་ ལྷན་ཁག་གི་ དབུ་ཁྲིདཔ་ཚུ་གིས་ བཅའ་ཁྲིམས་ཚུ་ བརྩམས་ཡོདཔ་བཞིན་དུ་ རྒྱལ་ཁབ་ཀྱི་ མི་སེར་ཚུ་གིས་ ངོས་ལེན་ཡོདཔ་ཅིག་འབད་བ་ཅིན་ རྒྱལ་ཡོངས་དགའ་སྐྱིད་དཔལ་འཛོམས་ཀྱི་ དམིགས་དོན་ཡང་ འགྲུབ་ཚུགས་ནི་ཨིནམ་མ་ཚད་ འཛམ་གླིང་ནང་ ཆོས་ལྡན་རྒྱལ་ཁབ་ཀྱི་ གཏམ་སྙན་གྲགས་འཐོན་ནི་མས་ཟེར་ ན་གཞོན་ཚུ་གིས་ བསམ་འཆར་བཀོད་པའི་གནས་ཚུལ།
བཀྲིས་ཕུན་ཚོགས།
No comments:
Post a Comment