 |
| ཆུ་རུད་ཀྱིས་འཕྱགས་བདའ་མི་ མཁར་ཟམ་གདུང་ཆུའི་ཟམ། |
དེ་ཡང་ ཞིང་ལམ་དེ་ འགོ་དང་པ་ བསལ་བའི་ལོ་ལུ་ སྣུམ་འཁོར་དང་འཕྲུལ་གླང་ཚུ་ རྒྱུན་འབྲེལ་འཐབ་ཡོད་རུང་ ལོ་དེ་ནང་ར་ མཁར་ཟམ་གདུང་ཆུའི་ཟམ་དེ་ འཕྱག་འབག་ཞིནམ་ལས་ ཟམ་མེད་པར་ ལམ་དེ་ཡང་ ལག་ལེན་འཐབ་མ་ཚུགས་པར་ དེ་སྦེ་ར་ ལུས་ཡོདཔ་ལས་ ལུད་སི་སྦིས་གཡུས་ཚན་ལུ་ ཕན་ཐོགས་བྱུང་མ་ཚུགསཔ་ཨིན་པས།
སྨན་ཆུ་སྒང་གི་ཚོང་པ་ བསོད་ནམས་དབང་འདུས་ཀྱིས་ སླབ་དོ་བཟུམ་འབད་བ་ཅིན་ ལམ་འགོ་དང་པ་སེལ་བའི་སྐབས་ ཆུ་དེ་ནང་ ཤིང་ཟམ་རྐྱབ་ཡོད་མི་དེ་གིས་ སྣུམ་འཁོར་ཚུ་ཡང་ འགྲོ་འགྲུལ་འབད་ཚུགས་རུང་ ཤུལ་ལས་ ཟམ་མེད་པར་ལུས་སོ་ཡི་ཟེར་ཨིན་པས།
ལུད་སི་སྦིས་གཡུས་ཚན་ལས་ ལྷ་སྒྲོན་ལྷ་མོ་གིས་ སླབ་དོ་བཟུམ་འབད་བ་ཅིན་ འཁོར་ལམ་དེ་ནང་ ཟམ་མེད་པར་ ལོ་དག་པ་ཅིག་སོང་ཡོདཔ་ལས་ གཡུས་ཚན་ཚུ་ནང་བཏོན་ཡོད་མི་ ལམ་ཁག་མང་ཤོས་ཅིག་ བསུབས་ཡོད་པའི་ཁར་ ས་ཁོངས་དག་པ་ཅིག་ནང་ལས་ ཆུ་རུད་ཀྱིས་ འཕྱག་བདའ་མི་ལུ་བརྟེན་ ལོག་སྟེ་བཅོ་དགོཔ་བཟུམ་འདུག་ཟེར་ཨིན་པས།
མོ་གིས་ སླབ་མིའི་ནང་ ལམ་དེ་ཡོད་པ་ཅིན་ གཡུས་ཚན་དེ་ནང་གི་མི་ཚུ་གིས་ ཀེ་བ་ཚུ་བཙོང་པར་འབག་ནི་ལུ་ ཕན་ཐོགས་སྦོམ་འབྱུང་ནི་མས་ཟེར་ཨིན་མི་དེ་ཡང་ གཡུས་ཚན་དེ་ སོ་ནམ་ཞིང་ལམ་ངོ་མ་ལས་ ཀི་ལོ་མི་ཊར་༣ དེ་ཅིག་གི་ ས་ཁར་ཡོདཔ་ལས་ ཀེ་བ་ཚུ་ག་ར་ རྟ་གུ་བཀལ་ཏེ་ འབག་འགྱོ་དོ་ཡོདཔ་ཨིན་པས།
མོ་གི་ཆ་རོགས་ཅིག་གིས་ བཤད་དོ་བཟུམ་འབད་བ་ཅིན་ ད་ལྟོ་ ཀེ་བ་བཙོང་ནི་གི་ དུས་ཚོད་ཨིནམ་ལས་ ཀེ་བ་ཚུ་ ག་དེ་སྦེ་ འཁོར་ལམ་ཚུན་ འབག་བཀལ་ཚུགས་ག་ཟེར་བའི་ ཚ་གྱང་ལང་སྟེ་ཡོད་ཟེར་ཨིནམ་ད་ ཀེ་བ་ཚུ་རྟ་གུ་འབག་སྐྱེལ་བའི་སྐབས་ ཟད་འགྲོ་ཡང་ ཐེབས་གནསཔ་མས་ཟེར་བཤད་ཅི།
ཆོས་འཁོར་རྒེད་འོག་བདག་སྐྱོང་འགོ་དཔོན་ འཇིགས་མེད་རྡོ་རྗེ་གིས་ སླབ་མིའི་ནང་ ཧེ་མ་ སྦ་ཟམ་ཡོད་མི་དེ་ གཙང་ཆུ་གིས་ འཕྱག་བདའ་ཡོདཔ་ལས་ ད་ལྟོ་ སྣུམ་འཁོར་ཚུ་ རྒྱུན་འགྲུལ་འཐབ་ཚུགས་པའི་ཟམ་ཅིག་ རྐྱབ་ནི་གི་དོན་ལུ་ ཁག་འབགཔ་ལུ་ ལཱ་ཚུ་སྤྲོད་དེ་ཡོད་ཟེར་ཨིན་པས།
ཁོ་གིས་ ད་རེས་ཀྱི་ཟམ་དེ་ ཕྱོགས་གཉིས་ནང་ རྩི་ས་དང་ལྕགས་ཀྱིས་ ཀཝ་ལྷོང་སྟེ་ བར་ན་ལས་ ཤིང་ཚུ་བཙུགས་ཐོག་ལས་ བཟོ་ནི་ཨིནམ་ལས་ མ་དངུལ་འབུམ་༨ དེ་ཅིག་སྦེ་ ཁག་འབག་ཐོག་ལུ་སྤྲོད་དེ་ཡོད་ཟེར་ཨིན་པའི་གནས་ཚུལ།
བུམ་ཐང་ལས་ བཀྲ་ཤིས་བསྟན་འཛིན།
No comments:
Post a Comment