དེ་ཡང་ རྒྱལ་སྤྱི་གནས་ཚད་ནང་ མི་སྡེའི་བརྡ་བརྒྱུད་ཞབས་ཏོག་ དཔེ་འབད་བ་ཅིན་ ཨིང་སྐད་ནང་ ཕེསི་བུཀ་ཟེར་མི་དང་ རྫོང་ཁའི་ནང་འབད་བ་ཅིན་ ཡོངས་འབྲེལ་གདོང་དེབ་ཟེར་ ཡོངས་གྲགས་ཡོད་མི་དེ་དང་ ཊིའུ་ཊར་བཟུམ་མའི་ བསམ་བཀོད་ཡོངས་འབྲེལ་ལ་སོགས་པའི་ མི་སྡེའི་བརྡ་བརྒྱུད་ཞབས་ཏོག་ ལག་ལེན་མ་འཐབ་མི་ འཛམ་གླིང་ག་ཏེ་ཡང་མེདཔ་ལས་ རྒྱལ་སྤྱིའི་གནས་ཚད་ནང་ ཁྱད་པར་སྦོམ་བཟོ་ཚུགས་པའི་ ནུས་ཤུགས་ཅན་གྱི་ ཡོངས་འབྲེལ་ཞབས་ཏོག་ཅིག་ཨིན་པའི་ ངོས་འཛིན་འབད་ཡོདཔ་ཨིན་པས།
འབྲུག་ལུ་ཡང་ འདི་བཟུམ་གྱི་མཐུན་རྐྱེན་ཚུ་ མི་མང་ཆེ་འབྲིང་ཆུང་གསུམ་ ཆ་མཉམ་གྱིས་ ལག་ལེན་འཐབ་དོ་ཡོད་པའི་ཁར་ རྒྱལ་སྤྱིའི་གནས་ཚད་ ཨེ་མི་རི་ཀ་ལ་སོགས་པའི་ རྒྱལ་ཁབ་ཀྱི་སྲིད་བློན་དང་ སྲིད་འཛིན་ཚུ་གིས་ཡང་ ལག་ལེན་འཐབ་དོ་ཡོདཔ་ལས་ ཡོངས་འབྲེལ་དེ་གི་ཐོག་ལས་ བརྡ་སྤེལ་འབད་མི་གིས་ སྐར་ཆ་༡ གི་ནང་འཁོད་ལུ་ འཛམ་གླིང་ནང་ ཁྱབ་སྤེལ་འབདཝ་ཨིན་པས།
དེ་འབད་ནི་དེ་གིས་ བཙག་འཐུའི་སྐབས་ སྲིད་ཚོགས་ཀྱིས་ གོ་སྐབས་ལེན་ཐོག་ལས་ ཡོངས་འབྲེལ་ཞབས་ཏོག་ཚུ་ ལག་ལེན་འཐབ་ནིའི་ འོས་འབབ་ཡོདཔ་ལས་ ལག་ལེན་འགོ་མ་བཙུགསཔ་ལས་ར་ ལྟ་རྟོག་གི་ལམ་ལུགས་ཚུ་ གྲ་སྒྲིག་འབད་ནིའི་དོན་ལུ་ བཙག་འཐུའི་བྱ་རིམ་ཚུ་ འཐབ་པའི་གནས་ཡུན་ནང་ མི་སྡེའི་ཡོངས་འབྲེལ་ཞབས་ཏོག་གི་ ལག་ལེན་དང་འབྲེལ་བའི་ སྲིད་བྱུས་ཅིག་ ཟིན་བྲིས་བཀོད་ནུག།
སྲིད་བྱུས་དེ་ནང་ སྲིད་ཚོགས་དང་ བརྡ་བརྒྱུད་ དེ་ལས མི་མང་གིས་ བཙག་འཐུའི་བྱ་རིམ་འཐབ་པའི་གནས་ཡུན་ལུ་ ཡོངས་འབྲེལ་ཞབས་ཏོག་ ལག་ལེན་འཐབ་ཐངས་དང་ བསྐུལ་བསྒྲགས་ཀྱི་སྐབས་ལུ་ ཡོངས་འབྲེལ་དང་འབྲེལ་བའི་ གནད་དོན་ཚུལ་མཐུན་དང་ ཚུལ་མིན་ གང་རུང་ ལག་ལེན་འཐབ་པ་ཅིན་ ལྷན་ཚོགས་ཀྱིས་ གདོང་ལེན་དང་ ངོས་ལེན་ཚུ་ ག་དེ་སྦེ་ར་ འབད་ནི་ཨིན་ན་ཚུ་གསལ་བཀོད་འབད་ནི་ཨིན་པས།
ཟིན་བྲིས་ནང་བཀོད་པའི་ སྲིད་བྱུས་དེ་ ཁ་ཙ་ ལྷན་ཚོགས་ཀྱིས་ བརྡ་བརྒྱུད་ངོ་ཚབ་ཚུ་དང་ རྒྱལ་ཁབ་ནང་ ཡོངས་འབྲེལ་ཞབས་ཏོག་འགོ་འདྲེན་འཐབ་མི་ འབྲུག་བརྒྱུད་འཕྲིན་དང་ བརྡ་དོན་བརྒྱུད་འབྲེལ་དང་འབྲེལ་བའི་ ཁྲིམས་མཐུན་གྱི་དབང་འཛིན་ འབྲུག་བརྡ་དོན་བརྒྱུད་འབྲེལ་དབང་འཛིན་གྱི་ འགོ་དཔོན་ཚུ་དང་ གྲོས་བསྡུར་ཞལ་འཛོམས་ཅིག་ འགོ་འདྲེན་འཐབ་ཅི།
གྲོས་བསྡུར་སྐབས་ འཐུས་མི་ལ་ལུ་ཅིག་གིས་ སྲིད་བྱུས་ཀྱི་ ཟིན་བྲིས་བཀོད་དེ་འབད་རུང་ ལག་ལེན་འཐབ་ནིའི་ནང་ བྱ་སྟབས་བདེ་ཧིང་ཚུ་ ག་དེ་སྦེ་འོང་ག་ཟེར་ བསམ་བཀོད་འབད་མི་དེ་ཡང་ ཡོངས་འབྲེལ་ལག་ལེན་འཐབ་མི་ མང་ཤོས་ར་ རང་སོའི་ ངོ་སྤྲོད་གསལ་བཀོད་མེད་པར་ རྫུས་བཟོའི་ཐོག་ ལག་ལེན་འཐབ་དོ་ཡོདཔ་ལས་ དེ་གིས་ བཙག་འཐུའི་སྐབས་ རང་གིས་དགའ་མི་དང་ མ་དགའ་མིའི་སྲིད་ཚོགས་དང་ འདེམས་ངོ་ཚུ་ལུ་ སྐྱོན་བརྗོད་དང་ རྒྱབ་སྐྱོར་ཀྱི་ བརྡ་སྤེལ་འབད་བ་ཅིན་ ཁྲིམས་མཐུན་གྱི་ ངོས་ལེན་ཚུ་ ག་དེ་སྦེ་ འཐབ་ཚུགས་ག་ཟེར་ཨིན་པས།
བཙག་འཐུ་ལྷན་འཛིན་སྤྱི་ཁྱབ་དྲགོས་ཀུན་བཟང་དབང་འདུས་ཀྱིས་ ཡོངས་འབྲེལ་ལག་ལེན་འཐབ་མི་ཚུ་གིས་ འབྲུག་བརྒྱུད་འཕྲིན་གྱི་ རྒྱབ་སྐྱོར་ཐོག་ལས་ རྗེས་དཔྱད་འབད་ནིའི་ གདམ་ཁ་ཡོདཔ་འོང་ཟེར་ སླབ་ཨིན་རུང་ འབྲུག་བརྒྱུད་འཕྲིན་གྱི་ འགོ་དཔོན་ཅིག་གིས་ འབད་བ་ཅིན་ ལས་སྡེ་ལུ་ཡང་ ཁྲིམས་མཐུན་གྱི་ རྒྱབ་སྐྱོར་འབད་ནིའི་ འོས་འབབ་ཚད་ཅིག་ལས་བརྒལ་མེད་ཟེར་ བཤདཔ་ཨིན་པས།
ཨིན་རུང་ ཁོ་གིས་ སླབ་མིའི་ནང་ མི་སྡེའི་ཡོངས་འབྲེལ་ཞབས་ཏོག་ ཕེསི་བུཀ་བཟུམ་ཅིག་ནང་འབད་བ་ཅིན་ འགོ་ཐོག་ལས་ར་ འབྲུག་གི་ བཙག་འཐུའི་བྱ་རིམ་འཐབ་པའི་ གནས་ཡུན་དེ་ནང་ ཚུལ་མིན་སྐྱོན་བརྗོད་ལ་སོགས་པའི་ བརྡ་སྤེལ་གྱི་རིགས་ བཀག་ཆ་འབད་དགོ་པའི་ ཡི་གུ་གཏང་པ་ཅིན་ ཡོངས་འབྲེལ་འགོ་འདྲེན་འཐབ་མི་ཚུ་གིས་ རྒྱབ་སྐྱོར་འབད་ནིའི་ ལམ་ལུགས་ཅིག་ འདུག་ཟེར་ཨིན་པས།
སྲིད་བྱུས་དེ་ མཐའ་བཅད་མ་བཟོ་བའི་སྔ་གོང་ལས་ རྩ་ཁྲིམས་ཆེན་མོའི་ དགོངས་དོན་དང་མཐུན་པའི་ གནས་སྟངས་ཚུ་ བལྟ་ཞིབ་འབད་དགོཔ་ཡོད་རུང་ སྲིད་བྱུས་དེ་ དགོས་མཁོ་དང་བསྟུན་པའི་ དུས་ཚོད་ཁར་ཨིན་མས་ཟེར་བཤད་ཅི།
ལྷན་ཚོགས་ཀྱིས་ རྩོད་དཔོན་ཡོངས་ཁྱབ་ལུ་ཡང་ སྲིད་བྱུས་དང་འབྲེལ་བའི་ བསམ་བཀོད་ཀྱི་ རྒྱབ་སྐྱོར་ཞུ་བའི་ལན་ལུ་ སྲིད་བྱུས་དེ་ ནང་འཁོད་ཀྱི་ དོན་ཚན་ཚུ་དང་འཁྲིལཝ་ད་ ཁྲིམས་ལུགས་བཟུམ་ཅིག་སྦེ་ མཐོངམ་མས་ཟེར་ཨིན་པའི་ཁར་ གྲོས་བསྡུར་ནང་ བཅའ་མར་གཏོགས་མི ལ་ལུ་ཅིག་གིས་འབད་བ་ཅིན་ འབད་ཆོག་དང་ མི་ཆོག་གི་དོན་ཚན་ཚུ་ མང་སུ་ཡོདཔ་ལས་ ཁྲིམས་ལུགས་སྦེ་ ལག་ལེན་འཐབ་པ་ཅིན་ཟེར་ བསམ་བཀོད་འབད་རུང་ ལྷན་ཚོགས་ཀྱིས་ སྲིད་བྱུས་དེ་ བསྐྱར་ཞིབ་འབད་དེ་ ད་རུང་ འབྲེལ་ཡོད་ལྷན་ཁག་ཚུ་དང་ མཉམ་འབྲེལ་ཐོག་ལས་ ཆ་འཇོག་ འབད་ནི་ཨིན་པའི་གནས་ཚུལ།
བསམ་གཏན་ཡེ་ཤེས།
No comments:
Post a Comment