ལམ་འོག་ལས་མར་ མི་ཊར་༢༥༠ གི་ས་ཁར་ རྦོབ་རིལ་སོང་མི་སྣུམ་འཁོར། |
སྣུམ་འཁོར་དེ་ དེད་གཡོགཔ་རྩིས་ཏེ་ འགྲུལ་པ་༦ འབག་སྟེ་ སྒོམ་དར་རྒེད་འོག་ནང་ སོང་བའི་སྐབས་ བསམ་གྲུབ་ལྗོངས་མཁར་ལས་ ཀི་ལོ་མི་ཊར་༣༨ དེ་ཅིག་གི་ས་གནས་ མེ་ཏིང་ཁ་ལུ་ལྷོདཔ་ད་ རྦོལ་རིལ་སོང་ནུག།
དེ་བསྒང་ འགྲུལ་པ་སྐྱེས་ལོ་༤༨ དང་༢༨ ལང་མི་ ཨམ་སྲུ་༢ དང་ སྐྱེས་ལོ་༤༣ ལང་མི་ ཕོ་སྐྱེས་ལུ་ རྨ་སྐྱོན་བྱུང་ཡོད་རུང་ དེད་གཡོགཔ་དང་ འགྲུལ་པ་གཞན་ཅིག་ལུ་ གནོད་སྐྱོན་མ་བྱུང་པས།
ཚེ་འདས་ཨམ་སྲུ་དེ་ ཝང་ཕུག་རྒེད་འོག་ སྲོག་ཤིང་སྤང་ཐང་ལས་ཨིནམ་ད་ བསམ་གྲུབ་ལྗོངས་མཁར་གྱི་ ཁྲིམས་སྲུང་འགག་པ་གིས་ སླབ་མིའི་ནང་ རྨ་སྐྱོན་བྱུང་མི་ འགྲུལ་པ་༣ ཆ་ར་ དེ་འཕྲོ་ལས་ བདེ་བ་ཐང་སྨན་ཁང་ནང་ བསྐྱལ་ཡོདཔ་ལས་ ད་ལྟོ་ གནས་སྟངས་ལེགས་ཤོམ་ཐོག་ལུ་ཡོད་ཟེར་ཨིནམ་ད་ ཁོང་༣ གྱི་གྲས་ལས་ སྐྱེས་ལོ་༢༨ ལང་མི་ ཨམ་སྲུ་དེ་གི་ རྐངམ་གཡས་པ་དེ་ ཆག་དཀྲུམས་ཡར་སོ་ནུག་ཟེར་ཨིན་པས།
ཁྲིམས་སྲུང་འགག་པ་གིས་འབད་བ་ཅིན་ ཁོང་ཆ་ཁྱབ་ ས་ཁོངས་དེ་ནང་ མ་ལྷོད་པའི་ཧེ་མར་ ལམ་རྒྱ་བསྐྱེད་ཀྱི་ ལམ་སེལ་ལཱ་ཚུ་ལུ་ ལྟ་རྟོག་འབད་མི་ གི་རིཕ་གི་ འགོ་དཔོན་དང་ ལས་མི་ཚུ་གིས་ རྨ་སྐྱོན་བྱུང་མི་ཚུ་ བདེ་བ་ཐང་སྨན་ཁང་ནང་ བསྐྱལ་ཚར་ནུག་ཟེར་ཨིན་པས།
རྐྱེན་ངན་དེ་ ག་དེ་སྦེ་ བྱུང་བྱུངམ་ཨིན་ན་ ཧ་གོ་མ་ཚུགསཔ་ལས་ ཁྲིམས་སྲུང་འགག་པ་གིས་ ཞིབ་དཔྱད་འབད་བའི་བསྒང་ཡོདཔ་ཨིན་པའི་གནས་ཚུལ།
No comments:
Post a Comment