ཞལ་འཛོམས་ནང་ བཅའ་མར་གཏོགས་མི་ཚུ། |
བློན་ཆེན་འཇིགས་མེད་འོད་ཟེར་འཕྲིན་ལས་མཆོག་གིས་ སྤྱི་ཟླ་༡༡ པའི་ཚེས་༢༡ ལས་ དབུས་ཕྱོགས་རྫོང་ཁག་ཚུ་ནང་ གཟིགས་སྐོར་གནངམ་དང་འབྲེལ་ གཞལམ་སྒང་རྫོང་ཁག་བདག་སྐྱོང་གི་ འགོ་དཔོན་ཚུ་དང་གཅིག་ཁར་ ཞལ་འཛོམས་འཚོགས་པའི་སྐབས་ གནད་དོན་ག་ཅི་ལུ་བརྟེན་ གཡུས་ཚན་ཚུ་ནང་ གློག་མེ་བཀྲམ་སྤེལ་འབད་མ་ཚུགས་པར་ ལུས་སོཔ་ཨིན་ན་ཟེར་ དྲི་བཀོད་འབད་ཡོདཔ་ད་ འཆར་གཞི་ཚུ་དང་འཁྲིལ་ཏེ་ འབད་མ་ཚུགས་པ་ཅིན་ འགོ་དཔོན་ཚུ་ ལྕོགས་གྲུབ་མེད་པའི་གྲངས་སུ་ བརྩི་དགོཔ་འོང་ཟེར་བློན་ཆེན་མཆོག་གིས་གསུངས་ཡི།
འབྲུག་གློག་མེ་ལས་འཛིན་གྱི་ ཡོངས་ཁྱབ་འཛིན་སྐྱོང་པ་ གྲུབ་ཆུ་རྡོ་རྗེ་གིས་ སླབ་མིའི་ནང་ རྫོང་ཁག་གི་གཡུས་སྒོ་ཚུ་ མང་ཤོས་ར་ ས་ཆ་དོག་དྲགས་སྦེ་ ཡོད་མི་ཚུ་ནང་ ཆགས་ཏེ་ཡོད་པའི་ཁར་ སྣུམ་འཁོར་གྱི་ལམ་དང་ ཟམ་ཚུ་མེད་པ་ལུ་བརྟེན་ གློག་མེ་བཀྲམ་སྤེལ་གྱི་ལཱ་ཚུ་ ཡུན་འགྱངས་ལུས་ཏེ་ཡོད་ཟེར་ཨིན་པས།
མི་སེར་ཚུ་གིས་ གློག་ཐག་སྤྲིངས་ནིའི་དོན་ལུ་ ལཱ་ཚུ་འབད་བའི་སྐབས་ལུ་ གློག་མེ་ཀཝ་ཚུ་ སྐྱེལ་འདྲེན་འབད་ནི་ནང་ དཀའ་ངལ་སྦོམ་སྦེ་ར་ བྱུང་སྟེ་ཡོདཔ་ད་ གློག་མེ་དང་འབྲེལ་བའི་ ཅ་ཆས་ཚུ་ མང་ཤོས་ར་ ལྗིད་ཡོད་ནི་དེ་གིས་ ཧེང་སྐལ་ར་ དུས་ཚོད་ཁར་ ལཱ་མཇུག་བསྡུ་མ་ཚུགས་པའི་ དཀའ་ངལ་བཟོཝ་མས་ཟེར་ཨིན་པས།
ཁོ་གིས་འབད་བ་ཅིན་ ས་ཆ་དོག་དྲགས་ཡོད་མི་དང་ ལཱ་འབད་སའི་གནས་སྟངས་ ལེགས་ཤོམ་མེད་པ་ལུ་བརྟེན་ཏེ་ རྒྱ་གར་གྱི་ལས་མི་ཚུ་གིས་ཡང་ ལཱ་འབད་མ་བཏུབ་པའི་ ཉོགས་བཤད་བཀོདཔ་མས་ཟེར་ཨིནམ་ད་ ཡོངས་ཁྱབ་འཛིན་སྐྱོང་པ་གིས་འབད་བ་ཅིན་ འཆར་གཞི་ཚུ་ག་ར་ ལེགས་ཤོམ་སྦེ་ འགྱོ་ཚུགས་པ་ཅིན་ རྫོང་ཁག་ནང་ གློག་མེ་བཀྲམ་སྤེལ་གྱི་ བརྒྱ་ཆ་༦༠ དང་༧༠ དེ་ཅིག་ལུ་ ལྷོད་ལྷོདཔ་འོང་ཟེར་ཨིན་པས།
བློན་ཆེན་མཆོག་གིས་ གྲོས་འཛོམས་ནང་ བཅའ་མར་གཏོགས་མི་ཚུ་ལུ་ གསལ་བཤད་འབད་མིའི་ནང་ སྒོ་ཤིང་རྒེད་འོག་ནང་ གློག་ཤུགས་མེ་ག་ཝཱཊ་༧༧༠ འབད་མི་ ལྕམ་མཁར་ཆུ་གློག་མེ་ལས་འགུལ་ བཟོ་སྐྲུན་འབད་བའི་བསྒང་ཡོད་མི་དེ་གིས་ ཁེ་ཕན་འབྱུང་ཚུགས་ཟེར་ ཨིན་པའི་གནས་ཚུལ།
གཞལམ་སྒང་ལས་ བཀྲ་ཤིས་བསྟན་འཛིན།
No comments:
Post a Comment