ཁྲོ་མང་ལྷ་ཁང་གི་དཀོན་གཉེར་ བཀྲིས་དོན་གྲུབ་ཀྱིས་ སླབ་མིའི་ནང་ ཆོས་པོ་ཏི་༡ གི་ དཔེ་ཆ་ཤོག་གྲངས་༥༢ ལྷགཔ་ཅིག་ ཆརཔ་གིས་ མེདཔ་བཏང་ཡོདཔ་མ་ཚད་ དཔེ་ཆ་གཞན་ཚུ་ཡང་ ཉམས་སྐྱོན་ཤོརཝ་མས་ཟེར་ཨིན་པས།
དཀོན་གཉེར་གྱིས་འབད་བ་ཅིན་ མཆོད་བཤམ་དང་ དཔེ་ཆ་བཞག་སའི་ ལྕགས་སྒྲོམ་མེད་མི་ལུ་བརྟེན་ བྱི་ཙི་ཚུ་གིས་ དཔེ་ཆ་དང་ སྐུ་རྟེན་ཚུ་ལུ་ གནོདཔ་བཀལཝ་མས་ཟེར་ཨིནམ་ད་ ཁོ་གིས་ དཔེ་ཆ་ཚུ་ ཉམས་སྲུང་འབད་ནིའི་དོན་ལུ་ ལྕགས་སྒྲོམ་ཉོ་ནི་གི་ དཔའ་བཅམ་རུང་ དངུལ་ཀྲམ་འབུམ་༡ དེ་ཅིག་ གནས་དོ་ཡོདཔ་ལས་ མ་དངུལ་མེད་པར་ ཉོ་མ་ཚུགས་ཟེར་ཨིན་པས།
ཁྲོ་མང་ལྷ་ཁང་དེ་ ཅ་གླིང་རྩིབས་སྒྲོ་གཡུས་ཚན་ལས་ དུས་ཡུན་ཆུ་ཚོད་༡ ལམ་འགྱོ་དགོ་པའི་ས་ཁར་ ཡོདཔ་ཨིན་པས།
ཁྲོ་མང་ལྷ་ཁང་དེ་ བཀྲིས་གཡང་རྩེ་ རིགས་གསུམ་དགོན་པ་དང་ པདྨ་དགའ་ཚལ་ཡོང་ལ་དགོན་པ་གཉིས་དང་ བྱིན་ཅན་འདྲན་འདྲ་ཡོདཔ་སྦེ་ ཆ་བཞག་པའི་ཁར་ མི་ལོ་༡༠༧༠ ལང་མི་ ཆོས་འབུམ་པོ་ཏི་༡༦ དེ་ཡང་ ཅ་རྙིང་ཅིག་ཨིནམ་ལས་ གསུང་རྟེན་བྱིན་བརླབས་ཅན་ཅིག་ཨིནམ་སྦེ་ བརྩི་འཇོག་འབད་དོ་ཡོདཔ་ཨིན་པས།
ངག་རྒྱུན་ལོ་རྒྱུས་དང་འཁྲིལཝ་ད་ ཆོས་འབུམ་ཚུ་ འབྱོགཔ་ཚུ་གི་ གནས་བདག་ཨིན་མི་ ཨ་མ་ཇོ་མོ་གིས་ བོད་ར་ལུང་ལས་ བྲོས་བྱོལ་སྦེ་བྱོནམ་ད་ འབྲུག་ལུ་ ལུག་གུ་བཀལ་ཏེ་ བསྣམས་བྱོན་བྱོནམ་ཨིནམ་སྦེ་ ཆ་བཞགཔ་ཨིན་པས།
ས་གནས་ཀྱི་ མི་ཚུ་གིས་ སླབ་དོ་བཟུམ་འབད་བ་ཅིན་ ཨ་མ་ཇོ་མོ་གིས་ འབྲུག་པའི་ས་ཁོངས་ནང་ ཕེབས་པའི་ཤུལ་ལུ་ འོས་ལྡན་གྱི་ ས་གནས་ཅིག་ འཚོལ་མ་ཐོབ་ལས་ དཔེ་ཆ་པོ་ཏི་ཚུ་ ལུང་བསྟན་ག་ཏེ་ཡོད་སར་ ཆགས་བཅུག་ཟེར་ སྨོན་ལམ་བཏབ་སྟེ་ ཆོས་གཏོར་རྩེ་ལས་ བཀག་བཏངམ་ད་ ཁྲོ་མང་ལྷ་ཁང་གི་རྒྱབ་ཁར་ཡོད་མི་ སྤོ་ཏོག་གུ་ ཆགས་ནུག་ཟེར་ཨིན་པས།
དེ་ལས་ ཨ་མ་ཇོ་མོ་གིས་ སྤོ་ཏོག་དེ་གུ་ ཁྲོ་མང་ལྷ་ཁང་བཞེངས་ཡོད་མི་དེ་ཡང་ ས་གནས་ཀྱི་དཔོན་ དཀྱིལ་གླིང་རྒྱལ་པོ་དང་གཅིག་ཁར་ ས་དང་གསེར་བརྗེ་སོར་འབད་ཐོག་ལས་ ལྷ་ཁང་བཞེངས་ཡོདཔ་བཞིན་དུ་ ཤུལ་ལས་ སྒང་ཏོག་གུ་ལས་ ཆོས་འབུམ་བཀོག་སའི་ རི་དེ་གི་མིང་ཡང་ ཆོས་གཏོར་རྩེ་ཟེར་ བཏགས་ཡོདཔ་ཨིན་པས།
ལྷ་ཁང་དེ་ ལོ་གོ་༢༠ གི་ཧེ་མར་ ཉམས་གསོ་ཞུ་ཡོད་རུང་ མ་ཎི་ལག་འཁོར་ལོ་ཚུ་ ཕྱི་ཁར་ཐོན་འགྱོ་དོ་ཡོདཔ་མ་ཚད་ གྱང་རྩིག་ཚུ་གུ་ སེར་གུ་ཐོན་ཏེ་ རམ་འགྱོ་ནི་གི་ གནོད་ཉེན་ཡོདཔ་ཨིན་པས།
དེ་མ་ཚད་ ཤིང་ཆས་ཚུ་ཡང་ རུལ་ཉམས་ཐལ་ཡོདཔ་མ་ཚད་ ལྷ་ཁང་གི་ ཤམ་བར་ནང་ལས་མར་ ཆརཔ་འཛགས་དོ་ཡོདཔ་ལས་ལྷག་པར་དུ་ གནས་སྟངས་སྐྱོ་དྲགས་བཟོཝ་མས་ཟེར་ཨིན་པས།
རྒེད་འོག་བདག་སྐྱོང་འགོ་དཔོན་ཚུ་གིས་ སླབ་མིའི་དང་ ལྷ་ཁང་ཉམས་གསོའི་དོན་ལུ་ འཆར་དངུལ་མེདཔ་ལས་ ཁྲོ་མང་ལྷ་ཁང་དེ་ཉམས་གསོ་འབད་མ་ཚུགས་ཟེར་ཨིན་པས།
གཤོང་ཕུག་རྒཔོ་ ཀུན་བཟང་དབང་འདུས་ཀྱིས་ སླབ་མིའི་ནང་ དཔེ་ཆ་ཚུ་ ཉམས་སྲུང་སྦེ་ བཞག་ནི་གི་ མཐུན་རྐྱེན་ཚུ་ ཤུལ་མའི་འཆར་གཞི་༡༡ པའི་ནང་མ་གཏོགས་ མཁོ་སྒྲུབ་འབད་མི་ཚུགས་ནི་བཟུམ་འདུག་ཟེར་ཨིན་པས།
དཀོན་གཉེར་བཀྲིས་དོན་གྲུབ་ཀྱིས་ སླབ་མིའི་ནང་ ད་ལྟོ་ དགོས་མཁོ་སྦོམ་ཤོས་ར་ དཔེ་ཆ་ཚུ་བཞག་སའི་ མཐུན་རྐྱེན་ཚུ་དགོཔ་ཡོདཔ་ལས་ དེ་མེད་པ་ཅིན་ དཔེ་ཆ་ཚུ་ བྱི་ཙི་ཚུ་གིས་ མེདཔ་གཏང་ནི་གི་ ཉེན་ཁ་འདུག་ཟེར་ཨིན་པའི་གནས་ཚུལ།
རྩོམ་འབྲི་ལས་བྱེདཔ།
No comments:
Post a Comment