༉ དུས་ཅི་ སྤུ་ན་ཁ་ལུ་སྦེ་ འགོ་དང་པ་ མི་མང་ལུ་ གནང་ནི་ཨིན་མི་ དཔལ་བདེ་མཆོག་འཁོར་ལོ་སྡོམ་པའི་ བཀའ་དབང་གི་དོན་ལུ་ བཅའ་སྒྲིག་རྐྱབ་པའི་བསྒང་ཡོད་མིའི་གྲུབ་འབྲས་ ལྟ་རྟོག་འབད་ནིའི་དོན་ལུ་ ལྷན་རྒྱས་གཞུང་ཚོགས་ཀྱི་དྲུང་ཆེན་ དྲགོས་དཔལ་ལྡན་དབང་ཕྱུག་གིས་གཙོས་པའི་ ལྷན་ཁག་དང་ ལས་སྡེའི་ ཆེ་མཐོའི་འགོ་དཔོན་སྡེ་ཚན་ཚུ་གི་བར་ན་ སྤུ་ན་ཁ་ ཁུ་རུ་ཐང་ དམ་ཆེན་བཟའ་ཁང་ནང་སྦེ་ ཞལ་འཛོམས་ཅིག་འཚོགས་ཅི།
ཞལ་འཛོམས་ནང་ སྤྱི་ཟླ་༡༡ པའི་ཚེས་༡༥ ལུ་ ཁོང་ཆ་ཁྱབ་དང་ བཀའ་དབང་འགོ་འདྲེན་འཐབ་མི་ ཚོགས་ཆུང་གི་བར་ན་ ཞལ་འཛོམས་ཅིག་ འཚོགས་མིའི་གྲོས་ཆོད་གུ་ གསུངས་གྲོས་གནང་ཡོདཔ་བཞིན་དུ་ དབང་ཞུ་མི་ཚུ་ལུ་ གསང་སྤྱོད་ཀྱི་དཀའ་ངལ་ མི་འབྱུང་ནིའི་དོན་ལུ་ གསང་སྤྱོད་༢༠༠ དེ་ཅིག་དང་ ཆབ་གསང་བསྡུསཔ་གཏང་སའི་ ས་གོ་༡༤༠ བཟོ་ནི་ཨིན་མི་ཚུ་ ལེགས་ཤོམ་དགོ་ཟེར་ དྲགོས་དཔལ་ལྡན་དབང་ཕྱུག་གིས་ སླབ་ཨིན་པས།
ཁོ་གིས་འབད་བ་ཅིན་ དབང་ཞུ་མི་ འབུམ་ལས་བཅད་དེ་ འཛོམས་པའི་སྐབས་ལུ་ གསང་སྤྱོད་ཀྱི་ཞབས་ཏོག་དེ་ ག་དེ་དྲག་དྲག་ ལེགས་ཤོམ་སྦེ་ བཟོ་དགོ་ཟེར་ཨིན་པས།
གསང་སྤྱོད་ཀྱི་བཟོ་བཀོད་ཚུ་ ཐིམ་ཕུ་ཁྲོམ་སྡེ་ལས་འཛིན་གྱིས་ བཟོ་ཡོདཔ་ད་ ཁྲོམ་དཔོན་ཀུན་ལེགས་རྡོ་རྗེ་གིས་ འབད་བ་ཅིན་ གསང་སྤྱོད་ཚུ་ག་ར་ ཆུ་གིས་བཤལ་བཏུབ་པའི་ཁར་ གསང་སྤྱོད་འཁྱུ་མི་༢༠ དེ་ཅིག་ བཙུགས་ནི་ཨིནམ་ལས་ གསང་སྤྱོད་ཀྱི་ དཀའ་ངལ་མི་འཐོན་ནིའི་ རེ་བ་ཡོད་ཟེར་ཨིན་པས།
དེ་ལས་ ཕྱགས་སྙིགས་འཛིན་སྐྱོང་གི་དོན་ལུ་ ས་ཁོངས་ནང་ ཕྱགས་སྙིགས་བཀོ་སའི་ཧོད་༡༠༠ དེ་ཅིག་ བཙུགས་ནི་ཟེར་ཨིན་པས།
དེ་ལས་ དབང་གི་སྐབས་ལུ་ ནདཔ་ཚུ་བལྟ་ནིའི་དོན་ལུ་ གསོ་བའི་ཞབས་ཏོག་ཚུ་ ས་ཁོངས་༣ ལས་ འཐོབ་ནི་ཨིནམ་མ་ཚད་ གསོ་བའི་གློ་བུར་ཞབས་ཏོག་ཚུ་ཡང་ འཐོབ་ཚུགས་ནི་ཨིན་པས།
དབང་གནང་སའི་ས་ཁོངས་ནང་ ཐལཝ་ཚུ་ ལོང་མི་བཅུག་ནིའི་དོན་ལུ་ སྤུ་ན་གཙང་ཆུ་གློག་མེ་ལས་འགུལ་གྱིས་ ཆུ་བླུག་མི་འཕྲུལ་ཆས་༣ དེ་ཅིག་ བཙུགས་ནི་ཨིན་པས།
དབང་གི་སྐབས་ལུ་ སྣུམ་འཁོར་གྱི་རྒྱུན་ལམ་ལུ་ བཀག་ཆ་མི་འབྱུང་ནིའི་དོན་ལུ་ ཁྲིམས་སྲུང་འགག་སྡེ་གིས་ མི་མང་ལུ་འགྲུལ་འཁོར་བཱསི་གི་ ཞབས་ཏོག་ཚུ་ བྱིན་ནི་ཨིནམ་ད་ དེ་ཡང་ འཛོམས་གླིང་ཐང་ལས་ ལྕང་ཡུལ་ཚུན་དང་ ལས་སྐྱིད་ཐང་དང་ ཁུ་རུ་ཐང་ལས་ མོ་ཆུ་སྦ་ཟམ་ཚུན་ཨིན་པས།
གལ་སྲིད་ སྒེར་གྱི་སྣུམ་འཁོར་བདའ་མི་ཡོད་པ་ཅིན་ མི་ཚུ་དབང་གནང་སར་བཏོན་ཞིནམ་ལས་ སྣུམ་འཁོར་དེ་ ལོག་ཁུ་རུ་ཐང་ལུ་བཞག་དགོ་ཟེར་ཨིནམ་ད་ དེ་ཡང་ དབང་གནང་སར་ མགྱོནམ་གི་སྣུམ་འཁོར་མ་གཏོགས་ གཞན་བཞག་སའི་ ས་ཁོངས་མེདཔ་ལས་བརྟེན་ཨིན་པས།
དབང་ཆེན་དེ་ སྐྱབས་རྗེ་རྗེ་མཁན་ སྤྲུལ་སྐུ་འཇིགས་མེད་ཆོས་གྲགས་མཆོག་གིས་ གནང་ནི་ཨིནམ་བཞིན་དུ་ སྐྱབས་རྗེ་བཞུགས་ནིའི་དོན་ལུ་ དཀྱིལ་འཁོར་དང་ ཆོས་ཁང་༢ རྩི་ས་དང་ལྕགས་ཀྱིས་ བཟོ་བའི་བསྒང་ཡོདཔ་ད་ མི་༦༠ དེ་ཅིག་གི་ ཤོང་ཚད་ཡོད་མི་ དཀྱིལ་འཁོར་ནང་ མི་དབང་མངའ་བདག་རིན་པོ་ཆེ་མཆོག་གི་བཞུགས་ཁྲི་དང་ མགྱོནམ་སྡོད་ས་ཚུ་བཟོ་ནི་ཨིན་མས།
དབང་ཆེན་དེ་ རྫོང་གི་རྒྱབ་ཕྱོགས་ལུ་ ཐང་བཟང་ནང་ གནང་བའི་སྐབས་ལུ་ དབང་ཞུ་མི་༥༠,༠༠༠ ལས་༡༠༠,༠༠༠ ཤོང་ཚད་ཡོད་པའི་ དབང་ཁང་གི་དོན་ལུ་ ཙོག་ཕུར་བརྡབ་པའི་བསྒང་ཡོདཔ་ད་ དེའི་མཇུག་ལུ་ གསང་སྤྱོད་ཚུ་གི་ བཙོག་མཛོད་ཁང་༤ རྐྱབ་ནི་ཨིན་མིའི་ལཱ་ཚུ་ཡང་ འབད་དོ་ཡོདཔ་ཨིན་པས།
བཅའ་སྒྲིག་གི་ལཱ་ཚུ་ བསྟན་སྲུང་དམག་མི་༢༠༠ གིས་འབད་དོ་ཡོདཔ་ད་ ལཱ་འགོ་འདྲེན་འཐབ་མི་ དམག་སྲིད་འཕྲིན་ལས་སྟོབས་རྒྱས་ཀྱིས་ འབད་བ་ཅིན་ ད་ཚུན་གྱི་བར་ན་ ལཱ་བརྒྱ་ཆ་༢༠ དེ་ཅིག་ མཇུག་བསྡུ་ཡོདཔ་ལས་ ལྷག་ལུས་དེ་ སྤྱི་ཟླ་༡༢ པའི་ཚེས་༡༤ དེ་ཅིག་ལུ་ མཇུག་བསྡུ་ཚུགས་པའི་ རེ་བ་ཡོད་ཟེར་ཨིནམ་ད་ དབང་ཆེན་དེ་ སྤྱི་ཟླ་༡༢ པའི་ཚེས་༢༠ ལས་ འགོ་བཙུགས་ནི་ཨིན་པས།
ད་ལྟོ་ བཅའ་སྒྲིག་ཚུ་ གཞུང་གི་གྲོགས་རམ་མ་དངུལ་ དངུལ་ཀྲམ་ས་ཡ་༡.༨ ཀྱི་ཐོག་ལས་ རྐྱབ་དོ་ཡོདཔ་ཨིན་རུང་ མ་དངུལ་གྱི་ རྒྱབ་སྐྱོར་ངོ་མ་དེ་ དཔལ་བདེ་མཆོག་འཁོར་ལོ་སྡོམ་པའི་ ཚོགས་ཆུང་གིས་ ཞལ་འདེབས་བསྡུ་ལེན་ འབད་ཐོག་ལས་ འཛིན་སྐྱོང་འཐབ་ནི་ཨིན་པས།
ཉིན་གྲངས་༡༥ འི་རིང་ གནང་ནི་ཨིན་མི་དབང་ཆེན་ཀྱི་སྐབས་ལུ་ བདེ་མཆོག་དབང་གི་རིགས་ རྐྱངམ་གཅིག་མིན་པ་ གྲུབ་ཐོབ་བརྒྱད་ཅུ་དང་ རྡོ་རྗེ་ཕག་མོ་ དེ་ལས་ དཔལ་ལྡན་འབྲུག་པའི་ལུགས་ཀྱི་ དབང་ཚུ་ཆ་མཉམ་ར་ གནང་ནི་ཟེར་ རྡོ་རྗེ་སློབ་དཔོན་ ཀུན་ལེགས་མཆོག་གིས་ གསུངམ་ཨིན་པས།
དཔལ་བདེ་མཆོག་འཁོར་ལོ་སྡོམ་པའི་དབང་ཆེན་དེ་ སྤུ་ན་ཁ་ལུ་སྦེ་ གནང་དགོ་མི་དེ་ཡང་ བདེ་མཆོག་འཁོར་ལོ་སྡོམ་པའི་ གནས་ ཡོད་ནི་དེ་གིས་ཨིན་པའི་གནས་ཚུལ།
སྤུ་ན་ཁ་ལས་ བསྟན་འཛིན་རྣམ་རྒྱལ།
No comments:
Post a Comment