༉ ངན་ལྷད་བཀག་སྡོམ་ལྷན་ཚོགས་ཀྱིས་ རྒྱལ་པོའི་ཞིང་གི་ ཁྲོམ་ས་ཚུལ་མིན་བགོ་བཀྲམ་དང་འབྲེལ་བའི་ ཉེས་འཛུགས་འབད་མི་ རྒྱལ་ཡོངས་ཚོགས་འདུའི་ ཚོགས་དཔོན་དང་ ནང་སྲིད་བློན་པོ་གཉིས་ལུ་ དགོངས་ཕོག་གི་ བཀའ་རྒྱ་བཏོན་མི་དེ་ ཆེ་མཐོ་ཁྲིམས་འདུན་གྱིས་ གནས་སྐབས་ཅིག་ མཚམས་འཇོག་བཞག་དགོ་པའི་ བཀའ་རྒྱ་བཏོན་ནུག།
དེ་ཡང་ ངན་ལྷད་བཀག་སྡོམ་ལྷན་ཚོགས་ཀྱིས་ ཚོགས་དཔོན་འཇིགས་མེད་ཚུལ་ཁྲིམས་དང་ ནང་སྲིད་བློན་པོ་མི་འགྱུར་རྡོ་རྗེ་གཉིས་ལུ་ ཉེས་རྩོད་ཀྱི་ ཉེས་འཛུགས་འབད་མི་དང་བསྟུན་ སྤྱི་ཟླ་༡༡ པའི་ཚེས་༡༥ ལུ་ དགོངས་ཕོག་གི་ བཀའ་རྒྱ་བཏོན་པའི་ཤུལ་ལས་ རྩོད་དཔོན་ཡོངས་ཁྱབ་ཀྱིས་ རེས་གཟའ་མིག་དམར་ལུ་ ཆེ་མཐོ་ཁྲིམས་འདུན་ལུ་ དགོངས་ཕོག་བཀའ་རྒྱ་ཆ་མེད་དང་ ཡང་ཅིན་ གནས་སྐབས་ཅིག་ བཀའ་རྒྱ་བསྟར་སྤྱོད་མ་འབད་བར་ བཞག་དགོ་པའི་ གསོལ་ཞུ་འབད་ཡོདཔ་ཨིན་པས།
རྩོད་དཔོན་ཡོངས་ཁྱབ་ཀྱིས་ ཆེ་མཐོ་ཁྲིམས་འདུན་ལུ་ཕུལ་མི་ ཞུ་ཡིག་ནང་ ཚོགས་དཔོན་འཇིགས་མེད་ཚུལ་ཁྲིམས་དང་ ནང་སྲིད་བློན་པོ་མི་འགྱུར་རྡོ་རྗེ་༢ པོ་དེ་ ངན་ལྷད་ཀྱི་ གནད་འབྲེལ་ལས་བརྟེན་ ཉེས་འཛུགས་བཀོད་པའི་ ཟླ་ཚེས་ལས་ འགོ་བཙུགས་ཏེ་ གནད་དོན་དེ་གི་སྐོར་ མཐོ་གཏུགས་གང་རུང་གི་ མཐའ་འབྲས་མ་འཐོན་རིག་ དགོངས་ཕོག་བཀའ་རྒྱ་དེ་ ཆ་མེད་གཏང་དགོཔ་སྦེ་ བཀོད་ནུག།
ཆེ་མཐོ་ཁྲིམས་འདུན་གྱི་ ཁྲིམས་སྤྱི་ངོ་ཚབ་ དྲང་དཔོན་སངས་རྒྱས་མཁའ་འགྲོ་གིས་ སླབ་མིའི་ནང་ འབྲུག་གི་རྩ་ཁྲིམས་ཆེན་མོ་རྩ་ཚན་༢༡ པའི་དོན་ཚན་༡༠ པ་དང་ ཞི་རྩོད་དང་ ཉེས་རྩོད་བྱ་བའི་ གནད་སྤྱོད་ཀྱི་ ཁྲིམས་དེབ་དོན་ཚན་༣༢.༡ ག་པའི་དགོངས་དོན་དང་འཁྲིལ་ ཆེ་མཐོ་ཁྲིམས་ཀྱི་འདུན་ས་ལས་ བཀའ་རྒྱ་ལོགས་སུ་མ་གནང་རིང་ ངན་ལྷད་བཀག་སྡོམ་ལྷན་ཚོགས་ཀྱི་ དགོངས་ཕོག་བཀའ་རྒྱ་དེ་ སྐབས་ཐོག་མཚམས་འཇོག་འབད་དགོ་པའི་ ཁྲིམས་ཀྱི་བཀའ་རྒྱ་གནང་ཡི་ཟེར་ཨིན་པས།
རྩོད་དཔོན་ཡོངས་ཁྱབ་ཀྱིས་ དགོངས་ཕོག་བཀའ་རྒྱ་ཆ་མེད་ཀྱི་ གསོལ་ཞུ་ནང་ བཀོད་པའི་ནང་གསལ་ འབྲུག་གི་རྩ་ཁྲིམས་ཆེན་མོའི་ རྩ་ཚན་༢༩ པའི་དོན་ཚན་༣ པ་དང་འཁྲིལཝ་ད་ ངན་ལྷད་བཀག་དམ་གྱི་བཅའ་ཁྲིམས་༢༠༡༡ ཅན་མའི་ཐོག་ ཉེས་འཛུགས་འབད་མི་དང་འབྲེལ་བའི་ དགོངས་ཕོག་བཏོན་དགོཔ་སྦེ་ ཞུ་བ་འབད་ན་མ་གཏོགས་ ངན་ལྷད་བཀག་སྡོམ་ལྷན་ཚོགས་ལུ་ མི་ག་ཡང་ དགོངས་ཕོག་བཏོན་ནི་གི་ དབང་ཚད་མེད་ཟེར་ཨིན་པས།
དེ་མ་ཚད་ ངན་ལྷད་བཀག་སྡོམ་བཅའ་ཁྲིམས་དེ་ ཆ་འཇོག་གམ་ བསྟར་སྤྱོད་འབད་ནི་ འགོ་མ་བཙུགས་པའི་ཧེ་མར་ ལཱ་བྱ་འཐབ་མི་ལུ་ ཉེས་འཛུགས་ཐོག་ ཁྲིམས་རྒྱབ་ལོག་ཐོག་ བསྟར་སྤྱོད་འབད་ཐབས་མེད་ཟེར་ རྩོད་དཔོན་ཡོངས་ཁྱབ་ ཕུན་ཚོགས་དབང་འདུས་ཀྱིས་ སྤྱི་ཟླ་༡༡ པའི་ཚེས་༡༩ ལུ་ ཆེ་མཐོ་ཁྲིམས་འདུན་ལུ་ཕུལ་མི་ ཞུ་ཡིག་ནང་ བཀོད་ཡོདཔ་ཨིན་པས།
ངན་ལྷད་བཀག་སྡོམ་བཅའ་ཁྲིམས་ཀྱི་ དོན་ཚན་༡༦༨ དང་འཁྲིལ་བ་ཅིན་ ལྷན་ཚོགས་ཀྱིས་ སྤྱི་གཡོགཔ་ཚུ་ལུ་ ཉེས་འཛུགས་དང་ ཡང་ཅིན་ ཉེས་ཁྲིམས་ཕོག་པའི་སྐབས་ལུ་ སྒྲིག་ཁྲིམས་དང་འབྲེལ་བའི་ ངོས་ལེན་ལེན་ནིའི་དོན་ལུ་ འབྲེལ་ཡོད་ལས་སྡེའི་ འགོ་འཛིན་ལུ་ སྙན་ཞུ་འབད་དགོཔ་ཨིན་པས།
དེ་འབདཝ་ད་ ད་རིས་ཀྱི་ རྩོད་དོན་ནང་ལྷོདཔ་ད་ གཞུང་སྐྱོང་དབུ་ཁྲིད་ བློན་ཆེན་ལུ་ སྙན་ཞུ་དང་ ཡང་ཅིན་ བསྟུན་གྲོས་མ་ཞུ་བར་ ཐད་ཀར་དུ་ དགོངས་ཕོག་བཀའ་རྒྱ་བཏོན་མི་དེ་ ཁྲིམས་མཐུན་མིན་པའི་ ལག་ལེན་ཅིག་ཨིན་པས་ཟེར་ རེས་གཟའ་མིག་དམར་ལུ་ བློན་ཆེན་འཇིགས་མེད་འོད་ཟེར་འཕྲིན་ལས་མཆོག་གིས་ ཀུན་གསལ་ལུ་གསུངས་ཡི།
རྩོད་དཔོན་ཡོངས་ཁྱབ་ཀྱིས་ ཞུ་ཡིག་ནང་ བཀོད་པའི་ནང་གསལ་ ངན་ལྷད་བཀག་སྡོམ་ལྷན་ཚོགས་ཀྱིས་ སྤྱི་ཚོགས་ཀྱི་ འཐུས་མི་ཚུ་ བསྟུན་གྲོས་ག་ནི་ཡང་མེད་པར་ དགོངས་ཕོག་བཏོན་མི་དེ་གིས་ དམངས་གཙོའི་རིང་ལུགས་ཀྱི་ གཞི་རྩ་ལུ་ གནོད་ཉེན་ཡོད་མི་དེ་ཡང་ དགོངས་ཕོག་བཏོན་པའི་བསྒང་ལས་ རང་སོའི་འདེམས་ཁོངས་ལས་ མི་སེར་གྱི་ འཐུས་ཚབ་སྦེ་ སྤྱི་ཚོགས་ནང་ འབྲེལ་གཏོགས་འབད་མི་ཚུགས་ཟེར་ཨིན་པས།
འདི་འབདཝ་ལས་ དགོངས་ཕོག་བཀའ་རྒྱ་དེ་ ཆ་མེད་གཏང་ནི་དང་ དེ་མིན་རུང་ གནས་སྐབས་ཅིག་ བསྟར་སྤྱོད་འབད་མ་དགོ་པའི་ ཁྲིམས་ཀྱི་བཀའ་རྒྱ་གནང་དགོ་ཟེར་ རྩོད་དཔོན་ཡོངས་ཁྱབ་ཀྱིས་ ཞུ་ཡིག་ནང་བཀོད་ནུག།
ངན་ལྷད་བཀག་སྡོམ་ལྷན་ཚོགས་ཀྱིས་ རྒྱལ་པོའི་ཞིང་གི་ ཁྲོམ་ས་བགོ་བཀྲམ་ལུ་ ཞིབ་དཔྱད་འབདཝ་ད་ སྤྱི་ལོ་༡༩༩༩ ལས་༢༠༠༦ གི་བར་ན་ ས་ཚན་༩༩ བགོ་སྤྲོད་འབད་མིའི་གྲས་ལས་༦༧ འབདཝ་ད་ ས་ཆ་ཨེ་ཀར་༡༤.༡༢ ཁྲིམས་འགལ་གྱི་ཐོག་ལས་ བགོ་སྤྲོད་འབད་ཡོདཔ་མ་ཚད་ ས་གནས་དབང་འཛིན་འགོ་དཔོན་དང་ ཁེ་ཕན་ཐོབ་མི་ ས་ཆའི་ཇོ་བདག་ཚུ་གི་བར་ན་ ཁ་ཚིག་བཟོ་བའི་ གན་རྒྱ་དང་འཁྲིལ་ ལག་ལེན་མ་འཐབ་པའི་ ངོས་འཛིན་བྱུང་ནུག།
ལྷན་ཚོགས་ཀྱིས་ ས་ཚན་བསྡོམས་༧༥ ཉོ་བཙོང་བཀག་འཛིན་འབད་མིའི་གྲས་ལས་༦༧ དེ་ ཐོབ་ལམ་མེད་པའི་ སྒེར་མི་སོ་སོ་ལུ་ བགོ་སྤྲོད་འབད་ཡོད་པའི་ ངོས་འཛིན་བྱུང་ཡོདཔ་ད་ ཧེ་མར་ མོང་སྒར་རྫོང་བདག་སྦེ་བཞུགས་མི་ ཚོགས་དཔོན་འཇིགས་མེད་ཚུལ་ཁྲིམས་དང་ བློན་པོ་མི་འགྱུར་རྡོ་རྗེ་དེ་ ཁྲོམ་ས་བགོ་བཀྲམ་ཚོགས་ཆུང་གི་ ཁྲི་འཛིན་ཨིན་པའི་གནས་ཚུལ།
རིག་འཛིན་དབང་ཕྱུག།
No comments:
Post a Comment