དེ་ཡང་ ལྡོག་ཕྱོགས་ཚོགས་པའི་ སྤྱི་ཚོགས་འཐུས་མི་ དམ་ཆོས་རྡོ་རྗེ་གིས་ སླབ་མིའི་ནང་ གཞུང་གིས་ ཕྱག་ལཱ་ག་ཅི་ར་མཛད་རུང་ གྲུབ་འབྲས་ལེགས་ཤོམ་འབྱུང་པ་ཅིན་ དེ་ལུ་ངལ་རངས་བསྐྱེད་དགོ་ཟེར་ཨིནམ་ད་ གཞུང་གིས་ འཐུས་ཤོར་རེ་བྱུང་སྟེ་འབད་རུང་ ངོས་ལེན་མཛད་དགོཔ་ཨིན་རུང་ འཐུས་ཤོར་བྱུང་མི་དེ་ ངོས་ལེན་མ་མཛད་པར་ ཐབས་ཤེས་དང་སྲིད་བྱུས་ཐོག་ལས་ སྐྱོན་བསུབ་རྐྱབ་པའི་ གསལ་སྟོན་འབདཝ་མས་ཟེར་ཨིན་པས།
ཁོ་གིས་སླབ་མིའི་ནང་ ལྡོག་ཕྱོགས་ཚོགས་པའི་ཁ་ཐུག་ལས་ རྩ་ཁྲིམས་དང་འཁྲིལ་བའི་ འགན་ཁུར་དང་བསྟུན་ཏེ་ རྒྱལ་ཁབ་དང་མི་སེར་གྱི་མཐའ་དོན་ལུ་ བསམ་འཆར་དང་ ཚ་གྱང་བཀོད་མི་ལུ་ བློན་ཆེན་མཆོག་གིས་ རྒྱལ་ཁབ་ལུ་ ཤ་ཚ་མེད་པའི་ཁར་ ཐ་དམ་ཚིག་མེད་པའི་བློ་ཨིན་མས་ཟེར་ གསུངས་གནངམ་ལས་ བློ་འགྱོད་སྦོམ་སྦེ་ར་ བསྐྱེད་དགོཔ་བྱུང་ཡི་ཟེར་ཨིན་པས།
ལྡོག་ཕྱོགས་འགོ་ཁྲིདཔ་ ཚེ་རིང་སྟོབས་རྒྱས་ཀྱིས་འབད་བ་ཅིན་ གལ་སྲིད་ གཞུང་གིས་ ལྡོག་ཕྱོགས་ཀྱིས་བཀོད་མི་ བསམ་འཆར་དེ་ གནད་དོན་ག་ཅི་ལུ་བརྟེན་ འཛོལ་སོཔ་ཨིན་ནའི་ གསལ་བཤད་གསུངས་གནང་པ་ཅིན་ འགག་བཤེར་དང་ཚད་མཉམ་གྱི་ དམངས་གཙོའི་རིང་ལུགས་ཨིན་རུང་ དེ་སྦེ་མིན་པར་ མ་ཉེས་ཁ་གཡོགས་བཀལ་ཐོག་ལས་ ཟིང་སློང་བའི་ སྐྱོན་བརྗོད་ཚུ་འབད་མི་དེ་ མ་རུངམ་ཅིག་ཨིན་པའི་ཁར་ ཁྲིམས་དང་འགལ་བའི་གནད་དོན་ཅིག་ཡང་ ཨིན་ཟེར་བཤད་ཅི།
དེ་ལུ་ བརྡ་བརྒྱུདཔ་ཅིག་གིས་ གཞུང་གིས་ མ་ཉེས་ཁ་གཡོགས་འབད་ཡོད་པའི་ ཉེས་བཙུགས་དང་འབྲེལ་ ལྡོག་ཕྱོགས་ཀྱིས་ གནད་དོན་དེ་ ཁྲིམས་གཏུགས་འབད་འོང་ག་ཟེར་ དྲི་བའི་ལན་ལུ་ ལྡོག་ཕྱོགས་འགོ་ཁྲིདཔ་གིས་འབད་བ་ཅིན་ མ་གཞི་ ཁྲིམས་གཏུགས་འབད་རུང་ འབད་ཆོག་པའི་རྩ་དོན་ཡོད་ཟེར་ཨིནམ་ད་ ཨིན་རུང་ རྩོད་རྙོགས་དེ་ ཟིང་མི་སློང་ནིའི་དོན་ལུ་ ཁྲིམས་གཏུགས་མི་འབད་ཟེར་སླབ་ཅི།
ལྡོག་ཕྱོགས་ཀྱིས་འབད་བ་ཅིན་ རྩ་ཁྲིམས་ཀྱི་དགོངས་དོན་ལྟར་དུ་ ལྡོག་ཕྱོགས་ལུ་ཕོག་པའི་འགན་འཁྲི་དེ་ འཐུས་ཤོར་མེད་པར་ ཕྱག་ཞུ་སྟེ་ཡོདཔ་ཨིན་ཟེར་ཨིནམ་ད་ དེ་ནང་ འགན་འཁྲི་དང་བསྟུན་པའི་ ཚ་གྱང་དང་བསམ་ཚུལ་བཀོད་མི་ལུ་ མ་ཉེས་ཁ་གཡོགས་ཀྱི་ སྐྱོན་བརྗོད་འབད་དགོ་པའི་ འོས་འབབ་ཅིག་ མ་མཐོང་ཟེར་ཨིན་པས།
ལྡོག་ཕྱོགས་ཀྱིས་འབད་བ་ཅིན་ གཞུང་གིས་ དེ་སྦེ་ མ་ཉེས་ཁ་གཡོགས་དང་ སྐྱོན་བརྗོད་འབད་མི་ལུ་ ཧ་ལས་དགོཔ་ཅིག་མ་བྱུང་ཟེར་ཨིནམ་ད་ དེ་ཡང་ དེ་བཟུམ་མའི་གནད་དོན་ ཧེ་མ་ཡང་ ལེ་ཤ་ཐོན་ཡོད་ནི་དེ་གིས་ཨིན་ཟེར་བཤད་ཅི།
ལྡོག་ཕྱོགས་ཀྱི་འཐུས་མི་ དམ་ཆོས་རྡོ་རྗེ་གིས་ གསལ་བཤད་འབད་མའི་ནང་ དཔེར་ན་ འདས་པའི་ ཁྲལ་དང་འབྲེལ་བའི་རྩ་ཁྲིམས་ཀྱི་རྩོད་དོན་ནང་ཡང་ གཞུང་གི་རྩོད་གཞི་དེ་ ཕམ་སོ་རུང་ ངོས་ལེན་མ་འབད་བར་ དྲང་ཁྲིམས་ལྷན་སྡེ་ལུ་ཡང་ སྐྱོན་བརྗོད་འབད་དེ་ གནམ་མེད་ས་མེད་ གནོད་ཡོདཔ་ཨིན་ཟེར་བཤད་ཅི།
ད་རུང་ གཞན་ཡང་ བརྡ་བརྒྱུད་དང་ རང་དབང་ཅན་གྱི་གཙུག་སྡེ་ ངད་ལྷད་བཀག་སྡོམ་ལྷན་ཚོགས་དང་ བཙག་འཐུ་ལྷན་ཚོགས་ལ་སོགས་པ་ཚུ་ལུ་ཡང་ སྐྱོན་བརྗོད་འབད་ཡོདཔ་ཨིན་ཟེར་ཨིན་པས།
དེ་འབད་ནི་འདི་གིས་ གཞུང་གིས་འཐུས་ཤོར་རེ་བྱུངམ་ད་ དེ་སྦེ་ སྐྱོན་བསུབ་རྐྱབ་ནི་མིན་པར་ ངོས་ལེན་མཛད་ཐོག་ལས་ ད་ལས་ཕར་ ལེགས་བཅོས་ག་དེ་སྦེ་ འབད་ནི་ཨིན་ན་ལུ་ བརྩོན་ཤུགས་བསྐྱེད་དགོཔ་དེ་ གལ་ཆེཝ་ཨིན་རུང་ གཞུང་གིས་འཐུས་ཤོར་བྱུང་མི་ལུ་ ངོས་ལེན་མཛད་ནི་དེ་ དཀོན་སུ་ཅིག་ཨིན་མས་ཟེར་ཨིན་པས།
ཁ་ཙ་ ལྡོག་ཕྱོགས་ཀྱིས་ བརྡ་བརྒྱུད་ལུ་ གནས་ཚུལ་གསར་བཏོན་ལས་རིམ་ འགོ་འདྲེན་འཐབ་མི་དེ་ གཞུང་གིས་ དེ་སྦེ་ དམངས་གཙོའི་རིང་ལུགས་ཀྱི་ གཞི་རྩ་ལས་བརྒལ་བའི་ གཅིག་གིས་གཅིག་ལུ་ སྐྱོན་བརྗོད་འབད་ནི་དེ་ མཚམས་འཇོག་ཐོག་ དོན་སྨིན་ཅན་གྱི་ འགག་བཤེར་དང་ཚད་མཉམ་གྱི་ གནད་དོན་ལུ་གཙོ་བོར་བཏོན་དགོ་པའི་ ཞུ་བསྐུལ་འབད་ཐབས་ལུ་ཨིན་ཟེར་ བཤདཔ་ཨིན་པའི་གནས་ཚུལ།
བསམ་གཏན་ཡེ་ཤེས།
No comments:
Post a Comment