གཟིགས་གནང་མི་ལུ་བཀའ་དྲིན་ཆེ།

༉ ང་བཅས་ཀྱིས་ ཉིན་བསྟར་བཞིན་དུ་

ཡོངས་འབྲེལ་འཆར་སྒོ་འདི་ནང་

གནས་ཚུལ་ཚུ་ དུས་མཐུན་བཟོ་སྟེ་ གསལ་བཀོད་འབདཝ་ཨིན།

We update at the earliest possible for you!

རྫོང་ཁའི་གནས་ཚུལ་གཟིགས་ དུས་མཐུན་ཞུགས་ཚུགས།

གསོ་བའི་འགོ་དཔོན་༤ ལུ་ ཉེས་པ་མེད་པའི་ འཁྲུན་ཆོད་གནང་མི་ལུ་མཐོ་གཏུགས།

༧/༦/༢༠༡༣   ད་རུང་ རྩོད་དཔོན་ཡོངས་ཁྱབ་ཡིག་ཚང་གིས་ སྤྱི་ཟླ་༦ པའི་ཚེས་༥ ལུ་ མངོན་མཐོ་ཁྲིམས་ཀྱི་འདུན་སར་ མཐོ་གཏུགས་འབད་ནིའི་དོན་ལུ་ ཞུ་ཡིག་བཙུགས་ཡོདཔ་ཨིན་པས།
༉ བདུན་ཕྲག་གཉིས་ཀྱི་ཧེ་མར་ ཆེ་མཐོ་ཁྲིམས་འདུན་གྱིས་ སྤྱི་ལོ་༢༠༠༩ ལུ་ ཇར་མ་ནི་དང་ རྒྱ་ནག་ལུ་ གཞུང་འབྲེལ་ལྟ་སྐོར་ལུ་སོང་མི་ གསོ་བའི་འགོ་དཔོན་༤ ལུ་ ཉེས་མེད་ཉེས་གྲོལ་གྱི་ འཁྲུན་ཆོད་གནང་མི་ལུ་ བསམ་པ་མ་རྫོགས་པར་ གཞུང་གི་ཁ་ཐུག་ལས་ ཉེས་བཤེར་འབད་མི་ རྩོད་དཔོན་ཡོངས་ཁྱབ་ཡིག་ཚང་གིས་ མངོན་མཐོ་ཁྲིམས་ཀྱི་འདུན་སར་ མཐོ་གཏུགས་འབད་ཡོདཔ་ཨིན་པས།


ཆེ་མཐོ་ཁྲིམས་འདུན་གྱི་ ཁྲིམས་ཁྲི་དང་པའི་ རྩོད་དྲུང་ཅིག་གིས་ སླབ་མིའི་ནང་ རྩོད་དཔོན་ཡོངས་ཁྱབ་ཡིག་ཚང་གི་ ངོ་ཚབ་ཀྱིས་ འཁྲུན་ཆོད་བཏོན་ཏེ་ ཞག་གྲངས་༡༠ ཀྲིག་ཀྲི་ཚང་པའི་ཉིན་མར་ མངོན་མཐོ་ཁྲིམས་འདུན་ལུ་ མཐོ་གཏུགས་འབད་ནིའི་དོན་ལུ་ ཞུ་ཡིག་བཙུགས་ཡོདཔ་ཨིན་རུང་ མཐོ་གཏུགས་འབད་དགོ་པའི་ གནད་ཁུངས་ ག་ཅི་ཨིན་ན་ གསལ་བཀོད་འབད་འབདཝ་ མིན་འདུག་ཟེར་ཨིན་པས།
གནད་དོན་དེ་གི་སྐོར་ལས་ རྩོད་དཔོན་ཡོངས་ཁྱབ་ཡིག་ཚང་དང་གཅིག་ཁར་ བརྒྱུད་འཕྲིན་ཐོག་ལས་ འབྲེལ་བ་འཐབ་ནི་གི་ དཔའ་བཅམ་ད་ འབྲེལ་བ་འཐབ་མ་ཚུགས།
ཨིན་རུང་ ན་ཧིང་ ཐིམ་ཕུ་རྫོང་ཁག་ཁྲིམས་འདུན་གྱིས་ རྒྱལ་ཡོངས་གཙོ་བསྟེན་སྨན་ཁང་གི་ རུས་ཚིགས་གཤག་བཅོས་དྲུང་འཚོ་ ཚེ་དབང་འཕྲིན་ལས་དང་ སོ་དང་ཟ་ལྟབ་གསོ་བཅོས་དྲུང་འཚོ་ བསམ་གྲུབ་ཨར་དབང་ཕྱུག་ སྨན་རིགས་དང་ སྨན་ཁབ་ མཁོ་ཆས་སྡེ་ཚན་གྱི་ མཁོ་སྒྲུབ་གཙོ་འཛིན་འགོ་དཔོན་བགྲེསཔ་ ངག་དབང་རྡོ་རྗེ་ དེ་ལས་ གསོ་བའི་ལྷན་ཁག་གི་ བདག་སྐྱོང་གཙོ་འཛིན་འགོ་དཔོན་བགྲེསཔ་ གནག་མདོག་འབྲུག་པ་༤ ལུ་ ཉེས་མེད་པའི་ འཁྲུན་ཆོད་གནང་མི་ལུ་ རྩོད་དཔོན་ཡོངས་ཁྱབ་ཡིག་ཚང་གིས་ བསམ་པ་མ་རྫོགས་པར་ ཆེ་མཐོ་ཁྲིམས་འདུན་ལུ་ མཐོ་གཏུགས་འབད་ཡོདཔ་ཨིན་པས།
མཐོ་གཏུགས་འབད་དགོ་པའི་ གནད་དོན་དེ་ཡང་ གསོ་བའི་འགོ་དཔོན་ཚུ་གིས་ ནང་གསུག་ལེན་ཡོད་རུང་ ཉེས་ཁྲིམས་མ་བཀལ་བའི་ཁར་ གཞུང་ལུ་ དངུལ་ཀྲམ་ས་ཡ་༡.༢༧༨ སོར་ཆུད་མ་འབད་ནི་དེ་གིས་ཨིན་པས།
དེ་ལས་ ཆེ་མཐོ་ཁྲིམས་འདུན་གྱིས་ དུས་ཡུན་ཟླ་ངོ་༦ དེ་ཅིག་གི་རིང་ རྩོད་བཤེར་དང་ ཐོག་མའི་ཁྲིམས་འདུན་གྱི་ འཁྲུན་ཆོད་ལུ་ བསྐྱར་ཞིབ་མཐིལ་ཕྱིན་མཛདཔ་ད་ བསྒྱུར་བཅོས་འབད་དགོཔ་ ག་ནི་ཡང་ མ་ཐོནམ་ལས་ སྤྱི་ཟླ་༥ པའི་ཚེས་༢༡ ལུ་ རྫོང་ཁག་ཁྲིམས་འདུན་གྱི་ གྲོས་ཆོད་དེ་ གཞི་འཛིན་ཐོག་ རྩོད་དཔོན་ཡོངས་ཁྱབ་ཡིག་ཚང་གི་ མཐོ་གཏུགས་བཤེར་ཡིག་དེ་ ཆ་མེད་བཏང་ནུག།
ན་ཧིང་ སྤྱི་ཟླ་༥ པའི་ནང་ ངན་ལྷད་བཀག་སྡོམ་ལྷན་ཚོགས་ཀྱི་ ཞིབ་དཔྱད་སྙན་ཞུ་དང་འཁྲིལ་ རྩོད་དཔོན་ཡོངས་ཁྱབ་ཡིག་ཚང་གིས་ རྩོད་ཟླ་༤ ལུ་ སྦྱིན་བདག་ཐོག་ འགོ་འདྲེན་འཐབ་མི་ ལྟ་སྐོར་དང་འབྲེལ་བའི་ ནང་གསུག་དང་ ཡིག་ཚང་བྱ་སྤྱོད་ངན་པའི་ ཉེས་འཛུགས་ཐོག་ རྩོད་བཤེར་འབད་ཡོདཔ་ཨིན་པས།
རྒྱ་གར་ཀཱོལ་ཀ་ཊ་ལུ་ཡོད་མི་ གསོ་བའི་མཁོ་ཆས་བཀྲམ་སྤེལ་བ་ བི་ཀཱསི་ཚོང་སྡེ་དང་ དེ་གི་ ཚོང་འབྲེལ་མཉམ་འབྲེལ་པ་ ཀེ་ཨེལ་ཨེསི་ མར་ཊིན་གུ་རུབ་ཚོང་སྡེ་༢ ཀྱིས་ ཁོང་གིས་ བཀྲམ་སྤེལ་འབད་མི་ གསོ་བའི་མཁོ་ཆས་ཚུ་ ལྟ་སྐོར་འབད་བར་ འོང་འདོད་ཡོད་པ་ཅིན་ ཤོག་ཟེར་བའི་ མགྲོན་བརྡ་ཡི་གུ་ སྤྱི་ལོ་༢༠༠༩ ཟླཝ་༥ པའི་ཚེས་༡༤ ལུ་ གསོ་བའི་ལྷན་ཁག་ལུ་ བཏང་ཡོདཔ་བཞིན་དུ་ མགྲོན་བརྡའི་ཡི་གུ་ནང་ ལྟ་སྐོར་དང་འབྲེལ་བའི་ ཟད་འགྲོ་ཚུ་ག་ར་ མགྲོན་བརྡ་འབད་མི་ ཚོང་སྡེ་གིས་ གཏང་ནི་ཨིན་པའི་ ཁས་བླངས་འབད་ཡོདཔ་ཨིན་པས།
མགྲོན་བརྡའི་ཡི་གུ་དང་འཁྲིལ་ གསོ་བའི་ལྷན་ཁག་གི་ མི་སྟོབས་ཚོགས་ཆུང་གིས་ བདག་སྐྱོང་དང་འབྲེལ་བའི་ ལམ་ལུགས་དང་འཁྲིལ་ གསོ་བའི་མཁོ་ཆས་ལྟ་ཞིབ་འབད་བར་ གསོ་བའི་འགོ་དཔོན་ཚུ་ བཏང་ཡོདཔ་ཨིན་པས།
ལྟ་སྐོར་གྱི་སྐབས་ལུ་ ཚོང་སྡེ་དེ་གཉིས་ཀྱིས་ གསོ་བའི་འགོ་དཔོན་རེ་ལུ་ ཇར་མ་ནི་ལུ་འགྱོཝ་ད་ ཡུ་རོ་༡,༥༠༠ དང་ དངུལ་ཀྲམ་༩༣,༣༢༣ རེ་དང་ རྒྱ་ནག་ལུ་འགྱོ་བའི་སྐབས་ ཌོ་ལར་༡,༥༠༠ རེ་དང་ དངུལ་ཀྲམ་༧༣,༥༧༤ རེ་སྤྲོད་ཡོདཔ་ ངེས་བདེན་ཨིན་རུང་ ལྟ་སྐོར་ལུ་ འགོ་དཔོན་༤ གིས་ ཐག་རང་བཅད་ཐོག་མིན་པར་ གསོ་བའི་ལྷན་ཁག་གིས་ གནང་བ་གྲུབ་མི་དང་འཁྲིལ་ སོང་ཡོདཔ་མ་གཏོགས་ གཞུང་ལུ་ སྐུ་གྱོང་ག་ནི་ཡང་ མ་ཕོག་པས་ཟེར་ འཁྲུན་ཆོད་ནང་བཀོད་ནུག།
དེ་མ་ཚད་ ལྟ་སྐོར་འབད་བའི་རྗེས་སུ་ གསོ་བའི་མཁོ་ཆས་ཚུ་ མཁོ་སྒྲུབ་འབད་ནིའི་དོན་ལུ་ ཁས་ལེན་གནས་གོང་རིན་བསྡུར་འབདཝ་ད་ གོང་ཚད་ཉུང་ཤོས་བཀོད་མི་ ནོར་རྒྱས་མེ་ཌི་ཀཱལ་ཨིན་རུང་ བི་ཀཱསི་མེ་ཌི་ཀཱལ་གྱི་མཉམ་རོགས་ཅིག་ཨིན་མི་ དེབ་བཱ་ས་ལུ་ བྱིན་ནི་གི་ དཔའ་བཅམ་ཡོདཔ་ལས་ གསུག་འབུལ་དང་ ཡིག་ཚང་བྱ་སྤྱོད་ངན་པའི་ གནོད་འགེལ་འཐབ་པའི་ ཉེས་འཛུགས་འབད་ཡོདཔ་ཨིན་པས།
དེ་འབདཝ་ད་ ཆེ་མཐོ་ཁྲིམས་འདུན་གྱིས་ དབྱེ་བཤེར་མཛདཔ་ད་ རྩོད་ཟླ་ཚུ་གིས་ རང་སོའི་འགན་འཁྲི་དང་འཁྲིལ་མ་གཏོགས་ མི་ངོ་རེ་རེ་གཉིས་ཀྱི་ ཁས་ལེན་གནས་གོང་བཙག་འཐུ་དང་ རིན་བསྡུར་ཐག་བཅད་གྲུབ་ཐབས་མེད་པའི་ ངོས་འཛིན་བྱུང་མི་ལུ་བརྟེན་ ཁོང་༤ ལུ་ ཉེས་ཁྲིམས་བཀལ་ཐབས་མ་བྱུངམ་ལས་ ཐོག་མའི་ཁྲིམས་འདུན་གྱི་ འཁྲུན་ཆོད་དེ་ རང་འཇགས་སྦེ་ གཞི་འཛིན་འབད་ཡོད་པའི་གནས་ཚུལ།

No comments:

Post a Comment