བཀྲིས་ཕུན་ཚོགས།
༉ ཐིམ་ཕུ་གྲོང་སྡེ་ལས་འཛིན་གྱིས་ མི་མང་ལུ་ ཕྱགས་སྙིགས་འཛིན་སྐྱོང་འབད་ཐངས་ཀྱི་ གོ་བརྡའི་ ལས་རིམ་ཚུ་ ཚར་ལེ་ཤ་ཅིག་ར་ འགོ་འདྲེན་འཐབ་ཡོདཔ་ཨིན་རུང་ གྲུབ་འབྲས་ལེགས་ཐོན་མ་བྱུངམ་ལས་ ཕྱགས་སྙིགས་འཛིན་སྐྱོང་གི་ གནད་དོན་དེ་ དོ་འགྲན་ཅན་ཅིག་སྦེ་ར་ གནས་ཏེ་ཡོདཔ་ཨིན་པས།
དེ་ཡང་ ད་རེས་ནངས་པ་ གྲོང་སྡེ་ལས་འཛིན་གྱིས་ ཐིམ་ཕུ་ཁྲོམ་ཁ་ལས་ ཉིན་བསྟར་བཞིན་དུ་ ཕྱགས་སྙིགས་མེ་ཊིག་ཏཱོན་༥༠ དེ་རེ་ བསྡུ་བསྒྱོམ་འབད་ཐོག་ལས་ མེ་མེ་ལ་ཁ་ལུ་ བཀོ་དོ་ཡོདཔ་ཨིན་རུང་ ས་ཁོངས་དེ་ནང་ཡང་ ཕྱགས་སྙིགས་ཀྱིས་ གང་ཡོདཔ་ཨིན་པས།
དཀའ་ངལ་དེ་ གཙོ་བོ་ར་ མི་ཚུ་གིས་ ཕྱགས་སྙིགས་ཀྱི་རིགས་ཚུ་ སོ་སོར་དབྱེ་ཐོག་ལས་ མ་བཀོ་མི་ལུ་བརྟེན་བྱུངམ་མས་ཟེར་ ལས་འཛིན་གྱི་ ལས་འགུལ་འགོ་དཔོན་ བསོད་ནམས་བཀྲིས་ཀྱིས་ སླབ་ཨིན་པས།
ཁོ་གིས་འབད་བ་ཅིན་ ཐིམ་ཕུ་ལུ་ སྡོད་མི་ཚུ་གིས་ ཕྱགས་སྙིགས་མར་ཕབ་དང་ སླར་ལོག་སྤྱོད་བཏུབ་བཟོ་ནིའི་དོན་ལུ་ ཐབས་ལམ་ཚུ་ བཏོན་པ་ཅིན་ མེ་མེ་ལ་ཁའི་ ས་ཁོངས་དེ་ ཡུན་རིངམོ་སྦེ་ ལག་ལེན་འཐབ་ཚུགས་པའི་ འོས་འབབ་ཡོད་ཟེར་ཨིན་པས།
གྲོང་སྡེ་ལས་འཛིན་གྱི་ འགོ་དཔོན་ཅིག་གིས་ སླབ་མིའི་ནང་ ཕྱགས་སྙིགས་རུལ་བཏུབ་དང་ མ་བཏུབ་མི་ཚུ་ སོ་སོར་མ་དབྱེ་བར་ ག་ར་སླ་བསྲེས་ཏེ་ བཞག་མི་ལུ་བརྟེན་ ཕྱགས་སྙིགས་བླུག་སའི་ ས་ཁོངས་དེ་ མགྱོགས་དྲགས་སྦེ་ གངམ་མས་ཟེར་ཨིན་པས།
ད་ལས་ཕར་ ཁྲིམས་ལུགས་ལུ་མ་གནས་མི་ཚུ་ ཕྱགས་སྙིགས་འཛིན་སྐྱོང་བཅའ་ཁྲིམས་དང་འཁྲིལ་ ཉེས་བྱ་དང་ ཉེས་ཁྲིམས་ཚུ་ བཀལ་ནི་ཨིན་ཟེར་ གྲོང་སྡེ་ལས་འཛིན་གྱི་ ཁྲིམས་དོན་འགོ་དཔོན་ ཀུན་བཟང་གིས་ བཤདཔ་ཨིན་པའི་གནས་ཚུལ།
No comments:
Post a Comment