བཀྲིས་ཕུན་ཚོགས།
༉ གཞལམ་སྒང་རྫོང་ཁག་ ཀྲོང་རྒེད་འོག་ བེར་ཏི་གཡུས་ཚན་གྱི་ མི་སེར་ཚུ་ ཉ་ཚོང་བསྒྱུར་ཐོག་ལས་ འོང་འབབ་བཟོ་བཅུག་ནིའི་དོན་ལུ་ བེར་ཏི་ཆུ་དང་ མང་སྡེ་ཆུ་ནང་ ཉ་བཟུང་ཆོག་པའི་ ས་ཁོངས་བྱིན་ཡོདཔ་ལས་ ད་ལས་ཕར་ དབུལ་ཕོངས་ཀྱི་དཀའ་ངལ་ སེལ་ཐབས་ལུ་ ལྷན་ཐབས་འབྱུང་ཚུགས་ནི་ཨིན་པས།
གནས་ཚུལ་གསར་བཏོན་དང་འཁྲིལཝ་ད་ སྤྱི་ཟླ་༣ པའི་ཚེས་༥ ལུ་ སོ་ནམ་དང་ནགས་ཚལ་ལྷན་ཁག་གི་ དྲགོས་དྲུང་ཆེན་ ཤེས་རབ་རྒྱལ་མཚན་གྱིས་ གཡུས་མི་ཚུ་ལུ་ ཉ་བཟུང་ནིའི་དོན་ལུ་ བེར་ཏི་ཆུའི་མཐའམ་ལས་ ས་ཁོངས་ཀི་ལོ་མི་ཊར་༡༠ དང་ མང་སྡེ་ཆུའི་མཐའམ་ལས་ ས་ཁོངས་ཀི་ལོ་མི་ཊར་༥ སྤྲོད་ཡོདཔ་ཨིན་པས།
ཀྲོང་རྒཔོ་ རྡོ་རྗེ་དབང་ཕྱུག་གིས་ སླབ་མིའི་ནང་ བེར་ཏི་གཡུས་ཚན་ནང་ སྔོན་གོང་ལས་ར་ ཉ་བཟུང་སྟེ་ ཚོང་འབྲེལ་འཐབ་ནིའི་ ལམ་ལུགས་ཡོད་རུང་ བར་སྐབས་ཅིག་ བཀག་བཞག་ཡོདཔ་ད་ ད་རེས་ ལྷན་ཁག་ལས་ མི་སེར་གྱི་ སྐྱིད་སྡུག་དང་འདྲཝ་སྦེ་ ཉ་གཟུང་ནིའི་ ས་ཁོངས་གནང་མི་དེ་གིས་ མི་སེར་ཉམ་ཆུང་ཚུ་གི་ འཚོ་བའི་གནས་སྟངས་ ཡར་དྲག་གཏང་ཚུགས་ཟེར་ཨིན་པས།
རྒྱལ་ཡོངས་ཆུ་དྲོད་ཉ་གསོ་སྐྱོང་ལྟེ་བའི་ ལས་རིམ་མདོ་ཆེན་ རྣམ་རྒྱལ་རྡོ་རྗེ་གིས་ སླབ་མི་དང་འཁྲིལཝ་ད་ ལྷན་ཁག་དང་ བེར་ཏི་མི་སྡེ་༢ ཀྱི་བར་ན་ ཆིངས་ཡིག་བཟོ་མི་ལུ་བརྟེན་ མི་སེར་ཚུ་གིས་ བདག་དབང་ཐོག་ ཉ་བཟུང་ཆོག་ནི་ཨིནམ་ད་ ལྷག་པར་དུ་ ལྷན་ཁག་ལས་ ཉ་སྐམ་ནི་དང་ མཛོད་ཁང་གི་རྒྱབ་སྐྱོར་ཚུ་ བྱིན་ནི་ཟེར་ཨིན་པས།
དྲག་ཤོས་དྲུང་ཆེན་གྱིས་ སླབ་དོ་བཟུམ་འབད་བ་ཅིན་ ལྷན་ཁག་གིས་ ཉ་གསོ་སྐྱོང་ཐོག་ ཚོང་འབྲེལ་འཐབ་ཆོག་པའི་ བདག་དབང་སྤྲོདཔ་དང་འབྲེལ་ མི་སེར་ཚུ་གིས་ ས་ཁོངས་སྤྲོད་མི་དེ་ ཡུན་རིངམོ་སྦེ་ ལག་ལེན་འཐབ་ཚུགས་ནིའི་དོན་ལུ་ ལེགས་ཤོམ་སྦེ་ འཛིན་སྐྱོང་འཐབ་དགོཔ་གལ་ཆེ་ཟེར་ཨིན་པས།
གཡུས་ཚན་ནང་ལས་ མི་སེར་ལ་ལུ་ཅིག་གིས་ ད་རེས་ ལྷན་ཁག་ལས་ གོ་སྐབས་གནང་མི་དེ་གིས་ མི་སེར་ཉམ་ཆུང་ཚུ་གི་ འཚོ་བའི་གནས་སྟངས་ ཡར་དྲག་གཏང་ནི་དང་ འོང་འབབ་བཟོ་ནི་ལུ་ ཁེ་ཕན་སྦོམ་ཡོདཔ་ལས་ རང་མགོ་རང་འདྲོངས་སྦེ་ སྡོད་ཚུགས་ནི་མས་ཟེར་ཨིན་པས།
དེ་བཟུམ་སྦེ་ ལ་ལུ་ཅིག་གིས་འབད་བ་ཅིན་ གཞུང་གི་སྲིད་བྱུས་དང་འཁྲིལ་ མ་འོངས་པ་ལུ་ ཕྱིའི་ལྟ་བཤལཔ་ཚུ་ཡང་ འོང་ནི་ཨིནམ་ལས་ ཉ་ཚོང་འབྲེལ་འཐབ་སྟེ་ འོང་འབབ་བཟོ་མི་དེ་གིས་ མི་སྡེ་གོང་འཕེལ་གཏང་ནི་ལུ་ ཕན་ཐོགས་ཚུགསཔ་མ་ཚད་ སློབ་གྲྭའི་ཨ་ལུ་ཚུ་གི་དོན་ལུ་ ཟད་འགྲོ་གཏང་ནི་ལུ་ཡང་ ལྷན་ཐབས་འབྱུང་ནི་མས་ཟེར་ བཤདཔ་ཨིན་པའི་གནས་ཚུལ།
No comments:
Post a Comment